NA RUKUDA DA PA-PAHURUNGU 28 - Na Huratu Matua

La Màlata

¹ Ba lundungu ndàbaka dàngu nda nggàra ehima la mara, hinaka hi mapinya nuna na nuha ba jiaya la Màlata.

² Da tau da mangia-nya nuna na nuha lalu karàhaku-ha hanggangu lai nyuma. Danggepi dàngu hàmu ndàbada-nggama hi da-padukulu-nggama epi, nadu ba tàka-nanyaka na urangu, màlai ba maringu-mbunanya.

³ I Paulu naohu ai, hi natuha da ai daa la epi. Ba talànga tunaka nu, luhu-nanyaka na heu na kataru pupuhu paraï pambana na epi hi nakati-ya na limana.

⁴ Ba naita-yaka tau lai nu na kataru pupuhu ba na-kandiwalu la limana i Paulu, panii-danyaka dàngga anguda, “Na tau nina tau pameti tau-mayaka duna, nadu jiapa ka namara-kadu welingu la hanggàmaru la tehiku, na marapu pa-himbalungu nda na-pahia-mbunya paluri,” wàda.

⁵ Tàka i Paulu na-kàmbahu-ya nuna na kataru pupuhu daa la epi dàngu nda nggàra papàda-na-makatiu.

⁶ Na pareki-da hawutu-kiaka napa na limana i Paulu mbua-nanyaka jàka ndia napa nanjoru harabànda hi nameti wàda. Tàka ba da-patia mandaingu-kika tàka hi nda nggàra ehi biana i Paulu, panjilungu-nanyaka na kanandingu-da, marapu-ya dumu na ni, wàda-nyaika i Paulu.

⁷ Nda nggi tuna marauna welingu lai nu, ninya na tana manguna i Pumbuliu, na maningu wai ngabangu lai nu la nuha. Nawàngu hàmu etina ba nanggepi-kama la umana ba tailu mbua loduma pa-ariyaa lai nyuna.

⁸ La rehi nu hidu-nanya na amana, natuya pariti dàngu tai ria. I Paulu nalua pa-tadalu-ya, hi na-hamayangu dàngu hi na-padambaku-nya lima, ka màlaru-nanyaka.

⁹ Rukuna nuna na manjadi, mbuu ndàbada da tau da mahidu lai nu la nuha, mai-danyaka lai Paulu, hi na-pamàlaru-ha.

¹⁰ Nyuda dawua-padaa-nggama pawua juada, dàngu ba jia-yaka na rehi laku ba wàma, ngàndida-nggamaka mbuu ndàbada da pa-kalana-ma nàhu la ànda.

Welingu la Màlata laku la Roma

¹¹ Ba tailu mbua wula-maka lai nu, hadangu-manyaka welingu lai nu la nuha, hi mahei la kapalu na ma-pawelingu la Alikuhandaria, nu ba ngala wula maringu-ya ba na-palabungu lai nu la nuha. Na kapalu nuna ningu tandana “Marapu Anandua i Kàturu dàngu i Poluku,” wàna.

¹² Nyuma ma-palabungu la parai Hirakuha dàngu hi ma-ndàdiku lai nu tailu mbua loduma.

¹³ Welingu lai nu hili pa-lirungu-manyaka matundu pipitu la hingi lupa tàka la parai Renggiumu. Hadangu harii ngeri hapuputu-nanyaka na ngilu weli lurungu, hi lupa dàmbu lodu-ama tàka-maama-nya la parai Putioli.

¹⁴ Lai nu ma-patàbuku-danja da tau mapawai lai Yehu, dàngu hi dawànda-kama pa-ndàdiku dànja nyuda hau mingguma. Hàla laku-manyaka la Roma.

¹⁵ Da angu dedi la Roma da mapawai lai Yehu darongu-maka rukuma nyuma, jia hi damai lundu la Pahangu Apiu dàngu la Uma Todu Tailu la pa-hàmburu-kama. I Paulu ba na-pahàmburu dànjaka nyuda, pamalangu-nanyaka i Ala dàngu na-kapànduku wànyaka na etina.

La Roma

¹⁶ Ba natàka-ka la Roma, i Paulu da-pahia-nya pangia mehangu, dàngu nimanyai nyuna na haàtu na panjuri na mamangga-nya.

¹⁷ Pa-làngangu-ka tailu mbua lodu, paau-nanjaka i Paulu da tau Yahundi da ma-pangora lai nu. Ba da-pauhi-ka panii dàna-njaka paraïna i Paulu, “Angu dedi! Nyungga nda ningua duku panjala-nggu ngga - nggàra la banjaru-nda, jàka ndia la papangga-ya na huri na pa-bànjalu-danda da boku la mangilu-nda. Jiapa ka tuna nu dayàpa biaka la Yeruhali, hi da-pakata-ngga la lima tau Roma.

¹⁸ Ba da-hàlaka pa-pareha-ya na palakara-nggu ka pahàla-ya wàda-maka duda nadu ba lohangu-mananya-ka ba nda nggàrama duku panjala-nggu ràka pa-hukungu wànguka hukungu meti.

¹⁹ Tàka ba patarangu-mada-nyapa da tau Yahundi, ka jia-duyaka hi kukarai ka pekuna na palakara-nggu ka timbanya la rapatu Hanganji Bokulu Roma. Hi Kiri tunggu nu nda ningua hangia pakàla wànggunya na banjaru-nggu.

²⁰ Nu jia-duyaka na pakiri-na hi kukarai-kai nyimi la pa-pahàmburu dàngga, ka ku-pabanjaru dànja wànggunggai, kai pinya pakiri-na hi nanggàna-ka nggili bàhi, jia-maaya na rukuna na Ma-pamànangu na pamonu mànuna na banjaru Ihirailu,” wàna.

²¹ Hàla nyuda hi dapanii-nya, “Nyuma duma ndedi-mapa ma-ngalangu huratu welingu la Yundia rukumu nyumu angu dedi. Dàngu ndedi ningumbu haàtu weli nàmungu mangàndi-nggama lii na rukumu nyumu jàka ndia mapulu nda hàmunggau nyumu.

²² Tàka ma-mbuhangu-madu parongu-ya na rukuna na pawaimu, nadu nyuma mbuu ndàbama marongu-maka ba na-paaka-nya tau na lii pa-ajaru na pa-kawana-mu nyumu,” wàdanya.

²³ Ka pa-hamangu-danyaka dàngu i Paulu pa-kawuku hau lodu la pa-pahàmburu. La lodu nuna dangu tau mamai la ngia pa-ngiangu-na i Paulu. Piti weli mbarungu lundu malingu-na i Paulu ba na-pakaloka-nja dàngu ba na-hakahii-nya lai nyuda na lii rukuna jàka nggikina i Ala ba na-pareta ba Hanganji-ya. Na-palata-nja da nda - ndalaru la Mbukuna i Muha dàngu la Mbukuda da Wunangu ba na-titiru-ha nyuda la pawaiya na rukuna i Yehu.

²⁴ Ningu mawaiya jàka nggàraya na papanii-na i Paulu, tàka ningumai manda pawai.

²⁵ Ba dàngu palumu-danya na pa-ndolaku wàda, dunjaku-danyaka lai nu, ba nahàla-ka i Paulu papanii-nja na panii yiana lai nyuda, “Na-jàngapu ailulu jàka nggàra wàna na Ngahuna i Ala la boku la mangilu-mi nyimi na mali la ngaruna i Wunangu Yahaya.

²⁶ Napanii i Miri, ‘Luawa kai pekanya na banjaru yiana: Nyimi napa mirongu pangalangu tàka ndai pinya; nyimi napa itàngaru pangalangu tàka ndai tandaya jàka nggàraya na manjadi.

²⁷ Nadu na kanandingu-na na banjaru yiana ba kandubalu-mana-nyaka, da kahilu-da da-kawanga-ka, dàngu da matada da-kapudangu-ka. Nu hi tuna nu da matada ka àmbu dangita, da kahilu-da ka àmbu darongu, dàngu da kanandingu-da ka àmbu da-jàngapu ka àmbu dabeli lai Nyungga, napa ku-pamàlaru-duha,’ ba wàna,” hi wàna.

²⁸ Ba nanjàpu-ka panii-nanyaka i Paulu, “Angu dedi màta kai pinya na lii rukuna na mànangu na ma-pawelingu lai Ala, nàhu pa-bobaru-yaka la ba - banjaru hawiangu nda Yahundi. Nyuda napa datundu-nya!” wànanja. [

²⁹ Ba na-hàlaka papanii tuna nu i Paulu, dunjaku-danyaka lai nu da tau Yahundi dàngu pa-lumungu-da dàngga anguda.]

³⁰ Dàmbu ndauna i Paulu ba na-ndàdiku la Roma, la uma pahewa wikina. Nahàmu na etina ba nanapa ndàbaya na tau na mamai pa-tadalu-ya.

³¹ Dàngu natoru mbenima duna pa-bobaru-ya lai nyuda rukuna jàka nggikina i Ala ba na-pareta ba Hanganji-ya dàngu na rukuna i Miri Yehu Karitu. I Paulu ba na-palaku-ya nuna dàngu kalongga-mana, nda ningua ma-pabeta-nya.