NA RUKUDA DA PA-PAHURUNGU 11 - Na Huratu Matua

Na pa-patàka-na i Peturu la kabungguru la Yeruhali

¹ Da pa-pahurungu dàngu da mapawai la nggubulu Yundia darongu-ka, da tau da manda tama la anggama Yahundi ba da-kataku-mbuyaka na puluna i Ala.

² Tunaka nu ba nalua-ka i Peturu la Yeruhali, da tau Yahundi da mambàda pawai, da-paaka-nya i Peturu.

³ Dapanii, “Nggikina nyumu hiu lua la umada da tau manda kàri? Màlai bau nga da-mbunjaka!” wàdanya.

⁴ Jia-duyaka i Peturu hi pa-kaloka-nja da mambàda njadi piti welingu la pakiri-na. Napanii i Peturu,

⁵ “Talànga hamayangu-nggu la paraingu Yopi, hi kuita-ya la harii mata, ba hama tera hinggi mbàlaru-ya, na pa-dulurungu welingu la awangu, na-kandiwalu la patu mbua kabihu-na, tunaka nu hi natàka la lihinggu.

⁶ Ba ku-kanandaru-haka daa ita-nggunjaka da banda kapatu mbungungu wihi, da banda matàmba, da banda mabei lupa da ma-hawurungu matàmba.

⁷ Ka rongu-nggunyaka na lii na mapeka-ngga, ‘Màla hadangu Peturu! Rupuwa kau ngangu!’ wànangga.

⁸ Tàka kuhema nyungga, ‘Ndia-a Miri! Ndedi ku-handàkangu-ma duku pangangu manda hida dàngu mairaku,’ hi wànggu.

⁹ Tàka na lii nuna hili peka-mananyai welingu la awangu, ‘Da mauku ba mbàda wàna i Ala, àmbu hili panda ukuhai dumu nyumu,’ wànangga.

¹⁰ Ku-pandailu wundangu paita-ya na matuna nu, tàka nu na njàpuna, mbuu ndàbada pa-padita-ha la awangu.

¹¹ La rehi nuna jia pàkuyai na tàkada da tau madua haàtu welingu la Kaiharia, da papalewa lai nyungga, datàka la uma ngia patodu-nggu.

¹² Ka paràha-nanggaka na Ngahuna i Ala la palaku karia-nja nyuda dàngu nda kanodaru. Yiada da angu dedi tau manomu dalaku karia-ngga la Kaiharia, hi matama ndàba la umana i Koruneliu.

¹³ Tunaka nu i Koruneliu wàlahu-nanyaka lai nyuma jàka nggikina nyuna ba naita-ya na haàtu papalewa ba jia ndolaku biana la umana hi napanii dànya, ‘Paràhangu tau la Yopi ka da-ngàdalu-ya na haàtu na tau mini, na ma-tamungu Himungu Peturu.

¹⁴ Nyuna napa na ma-patàka-nggaunya na lii na ma-pamàna-nggau napa dàngu kuru umamu,’ wànanya.

¹⁵ Nu ba ku-pakiringu-ka pa-kareuku tunggu nu,” wàna i Peturu ba na-pangala-nya na paniina, “Tàka-ma-ananya, na Ngahuna i Ala lai nyuda, hama tuna na matàka-nda nyuta àmangu la kawunga-na.

¹⁶ Ka namu-dunggunya-ka ba mbàda paniina i Miri, ‘I Yuhani na-parunungu wàngu wai tàka nyimi napa pa-parunungu-kai wàngu Ngahuna i Ala,’ ba wàna.

¹⁷ Jia ba tuna lohangu-nanyaka, i Ala nawua-mbunyaka na tau na manda anggama Yahundi, hama tuna na pawua-nanda nyuta ba jiaya na wai-ndanya i Miri Yehu Karitu. Jiaya nu nggiki hama peku-naka nyungga ba kuhiri-nya i Ala!” wàna.

¹⁸ Ba darongu-yaka nuna, nda dahili panda-ayapa. Hàla wotu-danyaka i Ala. Dapanii, “Jàka tuna nu, pahia-mbuna-njaka paraïna Ala da tau nda Yahundi ka da-pambelingu welingu la njalada hi peku pàda-danya na luri langatàka!” wàdaka.

Na kabungguru la Atiokia

¹⁹ Ba pameti-yaka i Hitipanu, pakiringu-danyaka pakeha-nja lai nu - lai nu da tau da mapawai lai Yehu, hi lupa da-paihangu la nggi - nggi. Ningu mapalai tàka la Pinihia, ningumbu matàka la Hipuru dàngu la Atiokia. Da-bobaru-ya na lii welingu lai Ala mbulungu la tau Yahundi-a.

²⁰ Tàka welingu lai nyuda da tau da mapawai, da ma-pawelingu la Hipuru dàngu la Kireni, nimbunja da malaku la Atiokia hi da-bobaru-ya na Lii Mànangu rukuna i Yehu la tau manda anggama Yahundi-mbu.

²¹ Na kuaha-na i Miri nimanya lai nyuda hi lupa nadangu na tau na mapawai dàngu na ma-pajàmangu wikina lai Miri.

²² Na kareuku rukuda nu da matumbu - matumbu-ka natàka-mbuka la kabungguru la Yeruhali. Ka palewa-danyaka i Mbàranamba la Atiokia.

²³ Ba natàka-ka i Mbàranamba lai nàhu, dàngu ba naita-ha ba na-pakanyuru-nja paraïna i Ala, lalu nggaüru-ya na etina. Hi napanau-nja ka da-tuturu weli eti langatàka-da lai Miri.

²⁴ Yiana i Mbàranamba tau hàmu etiya dàngu na-kuaha-maya Ngahuna i Ala, màlai ba kanjupu wainanya i Miri hi lupa nadangu na tau na ma-kikungu lai Miri.

²⁵ Tunaka nu lua-nanyaka i Mbàranamba la Tàruhu pahimbu-ya i Hauluhu.

²⁶ Ba nahunggu-yaka i Hauluhu, karia-nanyaka i Hauluhu la Atiokia. Hau ndau tudada ba da-pauhi dànya na kabungguru lai nu, nadangu na tau na pa-ajaru-da. Lai nuduka la Atiokia na ngia pa-kawunga tikiha tau Karitu, da tau mapawai lai Yehu.

²⁷ La rehi nu ninja ba ana mapira-ha da wunangu la Yeruhali damai la Atiokia.

²⁸ Na haàtu na anguda nyuda, na tamuna Anggambu-ya. Paraï rukuna na Ngahuna i Ala, nyura-nanyaka ba nàmunya napa na rimba bokulu la nggubulu pinu tana. (Na rukuna nuna na-patubangu-ma ba jiaya na pareta-na na Hanganji Bokulu Kalaundiu.)

²⁹ Mbuu ndàbada da tau da ma-kikungu lai Yehu pa-hamangu-danyaka la pa-pangàndi-nja hunggu da angu dedi da ma-ngiangu la Yundia, haàtu - haàtu na-wuangu tutu ràka pa-màkana.

³⁰ Nuna na pa-pahama-da dawà-manya, hi da-pakata-nja i Mbàranamba dàngu i Hauluhu da papalewa-da pangàndi-ha da hunggu la liku uru - liku uru la kabungguru.