Marco 9 - O Lašo Nevimos katar o Marko 1971 (Kalderaš)

INYA

¹ Tay mothodya lenge, “Mothav tumenge vorta ke vuni tumendar či merena anglal te dikhen e Amperatsiya le Devleski te avel la putyaryasa.”

² Tay pa šov dyes, o Isus ingerdya le Petros, le Yakobos tay le Yovanos pe rigate tay gele and ekh than p'ekh bari playin. Tay vo pařudinisaylo angla lenge yakha.

³ Leske gada blisčinas tay parnile, may parne de sar o yiv. Nas sar o parnimos kay dityol pe lumya.

⁴ Tay dityon o Elias tay vi o Moze tay denas duma le Isusosa.

⁵ Tay mothodya o Petro, “Raya, mišto amenge ke sam kate. Te keras trin tserhi. Yekh tuke, yekh le Mozeske tay yekh le Eliyaseske.”

⁶ Sa darayle tay či žanelas o Petro so te mothol.

⁷ Atunči, nakhlya opral pa lende ekh nuvero tay šudya vušalin pe lende. Tay ande kodoleste ašunde ekh glaso kay mothodya, “Kado si muŕo sav o drago. Ašunen pe leste.”

⁸ Tay frenedeyit, ambolde tay dikhlya ke nas khonik akana numa o Isus.

⁹ Atunči kana avenas tele pa e playin mothodya lenge o Isus te na mothon kanikaske so dikhlesas ži kana žuvindila‐pe pale o Šav le Manušesko.

¹⁰ Kadya, inkerde ande pende kodo so dikhle numa butivar dine duma pa leste tay vi pa leske vorbi, “žuvindil‐pe”.

¹¹ Tay pušle les, “Soste mothon le Zakonarya ke musay t'avel may anglal o Eliyas?”

¹² “Ey, čacěs,” phenke, “Si t'avel may anglal o Eilyas te vortol o drom tay, pala kodya, si ramome ke si te činuil‐pe o Šav le Manušesko tay vi te vuřitsil‐pe.

¹³ Numa, mothav tumenge ke aba avilo o Eliyas tay kerde el gaže sogodi kamenas lesa sar kay sas ramome.”

¹⁴ Tay kana avile palpale ka le aver vortača dikhle ke but žene tyidinisayle truyal lende tay le Zakonarya xanas‐pe lentsa.

¹⁵ Anda yekh, kana dikhle les, sa mirisayle le gaže tay prastaye leste tay denas leske, “dobroy tu”.

¹⁶ Tay pušlya len vo, “Pa soste xan‐tume lentsa?”

¹⁷ Tay yekh anda o narodo mothodya leske, “Raya, andem tute muŕe šaves ke ande leste si ekh nevužo kay mutsol les.

¹⁸ Kaygodi astarel les šudel les tele tay žal leske le salya anda o muy, bašavel le dandentsa tay tsepenin‐pe. Manglem tye manušen te gonin kadale nevužes numa či naštin.”

¹⁹ Tay dya leske anglal. “Yoy, nay tume pačayimos? Sode vryamya si ma te ašav tumentsa. Sode si te revdil tumentsa. Anen les mande.”

²⁰ Tay andine leste le šaves tay kana dikhlya les o nevužo, anda yekh, činosardya le šaves tay pelya tele o šav pe phuv tay tevelilas‐pe tay žalas leske le salya anda o muy.

^21-22 O Isus pušlya le manušes, “Sode vryamya sas nasvalo kadya?” Phenke, “De kin sas savoro. Butivar šudya les pe yag tay vi ando pay te mudarel les. Te daštis te keres voareso, mila amendar. Te ažutis amenge.”

²³ Mothodya o Isus, “So si kado ‘te daštis te kerav voareso’? Sa daštil‐pe kodoleske kay patyal‐pe.”

²⁴ Anda yekh, o gažo tsipisardya, “Patya ma, te ažutis mange te patya ma may but.”

²⁵ Tay kana dikhlya o Isus ke but žene tyidinisayle, porunčisadya le nevužoske, “Nevužeya, tu kay mutsos le šaves tay kerel les kašuko, porunčiv pe tute, av avri anda leste tay namay ža andre”.

²⁶ Atunči, o nevužo tsipisardya tay činosardya ži ka činosardya le šaves tay avilo avri anda leste. Sar kay ekh mulo sas o šav tay le may but mothonas, “Mulo‐lo.”

²⁷ Numa o Isus lya les vastestar tay vazdya les tay uštilo o šav.

²⁸ Atunči, kana gelo o Isus ando kher, pušline les leske vortača “Soste našti gonisas les ame?”

²⁹ Mothodya lenge, “Bi te rudžin‐tume našti gonin kasavestar nevužes.”

³⁰ Tay geline‐tar tay nakhle pa e Galileya tay vo kamelas te na žanelas khonik,

^31-32 Ke sityarelas peske, vortačen. Mothodya lenge, “O Šav le Manušesko si te astardyola and el vas le gaženge tay mudarena les. Numa kana mudaren les, pala trin dyes žuvindila‐pe.” Numa von či hačarenas lesko divano tay darayle te pušen lestar.

^33-34 Tay avilo ando Kaperneyo tay kana sas and ekh kher pušlya len “Pa soste denas duma po drom?” Numa či dine anglal ke, po drom, denas duma pa kaste sas o may baro maškar lende.

³⁵ Tay bešlya tay akhardya le deš‐u‐don leste tay mothodya, “Te kamel voarekon t'avel o angluno, musay t'avel o pasledno tay vi e sluga savoŕengi.”

³⁶ Tay lya ekhe šavoŕes tay thodya les maškar lende tay atunči, lya les and angali tay mothodya lenge,

³⁷ “Kongodi primil kasavestar šavoŕes pala mande, man primil ma. Kongodi primil ma, primil vi kodoles kay bišaldya ma.”

³⁸ Tay mothodya leske o Yovano, “Dikhlem ekhe manušes kay gonilas ekhe nevužes ande tyiro anav tay ame ašadyam les ke či inkerel amentsa.”

³⁹ Numa mothodya o Isus, “Te na ašaven les ke kon kerel ekh čuda ande muŕo anav našti akušel ma p'ekh data.

⁴⁰ Kodo kay nay dušmano, inkerel amentsa.

⁴¹ Vorta mothav tumenge, kongodi del tume ekh taxtay pay te pen soste e pečata le Kristoski si pe tumende, avel počindo.

⁴² Kongodi potignila ande bezex yekhes anda kadale šave kay patyan ande mande, mothav tuke ke may vorta leske te phanden pe lesko koř ekh baro bař le asavesko tay te šuden les ando pay.

^43-44 Tay te tyo vas potignila tu ande bezex, šin les tele tutar. May vorta tuke te žas ando trayo o bi‐agoresko yekhe vastesa tay te na žas ande prada, ande yag e bi‐agoreski do vastentsa.

^45-46 Tay te potignila tu ande bezex tyo punřo, šin les tele tutar. May vorta tuke te langas ando trayo o bi‐agoresko tay te na šuden tu do punřentsa ande prada.

⁴⁷ Tay te potignila tu ande bezex tyi yakh, ankalav la avri. May vorta tuke te žas ande Amperatsiya le Devleski yekha yakhasa tay te na šuden tu do yakhentsa ande prada,

⁴⁸ Kay či may merel o čermo kay xal tu ay kay či mudardyol‐pe e yag.

⁴⁹ Ke savoŕe londyona‐pe la yagasa.

⁵⁰ Lašo si o lon. Numa te manay londo o lon so te keres te may londyarel les pale? Len lon ande tumende tay ampetyisavon yekh avresa pe pača.”