Marco 5 - O Lašo Nevimos katar o Marko 1971 (Kalderaš)

PANŽ

¹ Atunči aresle ka e aver rig la maryaki ando them le Gergasenonge.

² Tay kana hulistesas avri anda e ladžiya, avilo pa'l mormuntsi tay maladilya le Isusosa ekh manuš kay sas sa bendžaylo.

³ Kodo trayilas maškar le mormuntsi tay khonik našti phandenas les či ekhe lantsosa, či khančesa.

⁴ Butivar phanglesas les le vastendar tay le punřendar numa le lantsuri p'el vas pharadya vo tay kodole p'el punře kerdya prušuka. Tay nas kanikaste e zor te ašavel les.

⁵ Dyesesa tay ratyasa sas maškar le mormuntsi tay p'el playa tay sa tsipilas tay šinelas‐pe bařentsa.

⁶ Tay kana, dural, dikhyla le Isusos, prastaiya tay dya čanga angla leste.

⁷ Tay tsipisardya, “Soste hamis tu mande. Tu san o Isus, o Šav le Čacě Bare Devlesko. Mangav tu, angla o Del, te na tyinuis ma.”

⁸ Ke, aba, motholas o Isus, “Nevuža, av avri anda o manuš.”

⁹ Tay pušlya les o Isus, “Sar bušos?” Tay dya anglal, “Bidyinde, ke but sam.”

¹⁰ Tay manglya les zurales te na tradel le anda kodo them.

¹¹ No, pe playin čaryonas but bale tay le nevuže mangle les, “Trade ame le balende te žas andre ande lende.”

^12-13 Tay meklya le te žan. Tay line tay avile avri le nevuže tay dine andre ande le bale. Porme le bale, duy miyi sas, šudine‐pe tele ande marya tay tasadile.

¹⁴ Našline le balyarya tay povinas pa leste vi ando foro vi and el gava, tay le žene avile te dikhen so pelya‐pe.

¹⁵ Tay avile ka o Isus tay dikhle le manušes kay may anglal bendžaylo sas. Akana manay bendžaylo numa bešlya tay huryado sas. Kado sas o manuš kay sas les le Bidyinde. Tay čudisayle le žene.

¹⁶ Tay kodole kay dikhlesas mothodine le avren pa o manuš tay vi pa le bale.

¹⁷ Apo malade te mangen le Isusos te duryol‐pe katar lengo them.

¹⁸ Tay kay anklelas pe ladžiya o Isus, kodo manuš kay sastilo manglya lestar, “Mek ma te avav tusa.”

¹⁹ Numa o Isus či meklya les tay mothodya leske, “Ža khere ka tye nyamuri. Phen lenge sode kerdya tuke o Ray ay sar te pelya leske mila tutar.”

²⁰ Tay gelo‐tar o manuš tay maladya te povil, ando them kay bušol Le Deš Foruri, so kerdyasas leske o Isus. Tay mirisayle savoŕe.

²¹ Atunči o Isus gelo palpale ka o aver rig la maryaki tay but žene tyidinisayle truyal leste paša e marya.

²² Tay avilo leste yekh anda le bare kapuri la sinagogake. Bušolas o Džayros. Kana dikhlya le Isusos, dya čanga angla leste.

²³ Tay rudžimasa manglya lestar tay phendya, “Merel muŕi šeyoŕi. Te avesa tay te thosa o vas pe late, šay sastyol tay te trayil.”

²⁴ Apo, gelo lesa o Isus tay vi but žene geline pala leste tay tyidinine‐pe pe leste tay spidenas les.

²⁵ Tay sas ekh nasvali kasko rat thavdyolas de deš‐u‐duy berš.

²⁶ But doktorya zumadesas te sastyaren la tay tyinuisardesas la but. Numa makar ke dyasas sa o love kay sas la, či sastili numa may nasvayli.

²⁷ Ašundya so phenenas pa o Isus tay pašili ka leste palal tay azbadya leski raxami.

²⁸ Phendya peske, “Te azbav feri leski raxami, sastyuvava.”

²⁹ Tay, yekhatar, či may thavdyolas o rat tay žanglya ando ilo ke sastili.

³⁰ Numa o Isus hačardya ande peste ke meklyasas les voareso anda leski putyarya. Ay, anda yekh, amboldya‐pe karing le žene tay mothodya, “Kon azbadya muŕi raxami?”

³¹ Tay mothodine leske vortača, “Dikhes le narodos sar spidel pe tute tay inke pušes, ‘Kon azbadya ma?’ ”

³² Tay sa dikhlya truyal te arakhel kas azbadyasas les.

³³ Numa e gaži dya‐pe anglal darayimasa tay izdrayimasa ke žanglya so gelo‐pe lake. Dya čanga angla leste tay mothodya leske soŕo čačimos.

³⁴ Tay mothodya lake o Isus, “Lyalyo, anda tyo patyayimos sastilyan. Ža le Devlesa. Te ašes sastili.”

³⁵ Kay delas duma avile vuni manuš anda o kher le kaposko tay phende, “Muli tyi šey. Sostar may keres bayo le Raske?”

³⁶ Numa o Isus či lya sama so phenenas tay mothodya le kaposke, “Na dara, numa patya‐tu.”

³⁷ Tay numa le Petros tay le Yakovos tay leske phrales le Yovanos meklya te žan lesa.

³⁸ Kana aresle ka o kher dikhlya o Isus ke tsipinas le žene tay ke rovenas tay vačinas‐pe zurales.

³⁹ Tay kana gelo andre, mothodya lenge, “Anda soste roven? Nay muli numa sovel.”

⁴⁰ Tay asaye lestar. Numa gonisardya le avri tay lya le dades tay la da tay vi kodolen kay sas lesa tay dya andre kay sas e raklyoŕi.

⁴¹ Lya la vastestar tay phendya lake, “Talitha kumi,” kay si Ŕomanes, “Raklyoŕiyo, phenav tuke ušti.”

⁴² Tay, anda yekh, uštili e rakli tay lya tay phiradya‐pe. Deš‐u‐duy beršengi‐la. Tay, yekhatar, sa mutsosayle.

⁴³ Apo, zurales porunčisardya pe lende te na mothon kanikaske pa kadaleste tay mothodya lenge te den la te xal.