Marco 4 - O Lašo Nevimos katar o Marko 1971 (Kalderaš)

ŠTAR

¹ Aver data, thodya‐pe te sityarel paša e marya tay tyidinsayle katyi žene ke lya‐pe tay bešlya and ekh ladžiya po pay. Tay sa o narodo bešelas tele paša e marya.

² But butya sityarelas len le paramičentsa.

³ Tay kay sityarelas len, mothodya, “Ašunen. Gelo ekh pavuro tay šudelas le semintsi te seyin‐pe.

⁴ Seyil tay seyil tay peren vuni semintsi pe vurma tay aven le čiriklya tay sa xan le.

⁵ Peren aver semintsi pe bařuyi phuv tay, anda yekh, baryon ke nay adinko e phuv.

⁶ Numa kana sikadya o kham peske dand, phabon tay šutyon ke skurtsi sas penge ředečini.

⁷ Peren aver semintsi maškar le kanřale luludža tay kana baryon le luludža, tasaven le semintsi tay či patyon‐pe.

⁸ Tay vi aver semintsi peren pe laši phuv adinko tay baryaren but dživ tay aven tryanda anda yekh semintsa, šovardeš anda kaver tay šel anda kaver.

⁹ Kaste si kan, te thol kan.”

¹⁰ May palal, kana mekline les le žene, feri leske deš‐u‐duy manuš tay aver vortača sas lesa. Tay von pušline les anda e paramiči.

¹¹ Phendya lenge vo, “So si tayna anda e Amperatsiya le Devleski sikadili tumenge. Numa ie avrenge sa si and el paramiča.

¹² Tay kadya šay dikhen tay dikhen numa či dikhen vorta tay šay ašunen tay ašunen numa či hačaren vorta te na ambolden ka o Del tay aven yertime.”

¹³ Tay mothodya lenge, “Či hačaren kača paramiči? Apo, sar te hačarena sa le paramiča?

¹⁴ Seyil o pavuro e Vorba le Devleski.

¹⁵ Vunivar perel e Vorba pe vurma. Kana ašunen la kadala žene, anda yekh, avel o Beng tay lel lendar e Vorba seyisayli ande lende.

¹⁶ Atunči, sa kadya, kodola kay seyisayle pe bařuyi phuv. Kodola, kana ašunen e Vorba, anda yekh, primin la, voyasa.

¹⁷ Numa, sar kay le semintsi, nay len čače ředečini, tay ašen zurale feri pe'kh tsiŕa vryamya. May palal, kana perel lenge bayo tay kana vuřitsin‐pe pala e Vorba potegnin‐pe tay peren.

¹⁸ Apo, kodola kay seyisayle maškar le kanřale luludža. Kodola ašunen e Vorba.

¹⁹ Numa, atunči, avel lenge pharo anda le butya kadala lumyake tay avel drago lenge te aven barvale tay te aven poftarya. Anda kodya tasadyol e Vorba tay či pherdyol‐pe.

²⁰ Numa le semintsi kay seyisayle pe laši phuv si sar kodola kay ašunen e Vorba tay primin la tay kodola pherdyona‐pe, tryandavar, šovardešvar tay šelvar.”

²¹ Tay mothodya lenge o Isus, “Khonik či anel ekh momeli tay thol la tela ekh kanta vay tela ekh pato. May vorta te thol la p'ekh fežniko.

²² Ke sogodi garadilo si kadya te avel suvetno tay sogodi si ekh tayna, si kadya te avel prinžardo tay hačardo.

²³ Kaste si kan, te thol kan.”

²⁴ Tay mothodya lenge, “Arakhen‐tume so ašunen. Sogodi te den, sa kadya te len tay vi may but.

²⁵ Ke kodoleske kay si les aba voareso, o Del may dela leske vi may but, numa kodolestar kay nay les khanči, o Del te lel lestar vi kodya kay si les.

²⁶ Kadya si e Amperatsiya le Devleski — si sar ekh pavuro kay seyil le semintsi pe phuv.

²⁷ Tay, ryate, žal te sovel tay, dyese, pomenil‐pe. Tay ande kodya vryamya, baryon le semintsi, numa či žanel o pavuro sar te baryon.

²⁸ Korkoro e phuv kerel le luludža, pervo o desto, may palal e plyavya tay atunči o dživ.

²⁹ Numa kana patyilo o dživ, anda yekh, šinel les o pavuro ke avili e vryamya le šinimaski.

³⁰ Pe soste mezil e Amperatsiya le Devleski? Savyatar paramiči te mothav pa late?

³¹ Si sar kay e semintsa le muštareska luludžaki. Kana seyil‐pe ande phuv, kodya semintsa si e may tsini semintsa pe lumya.

³² Numa, kana seyisayli, may palal, baryol ay avel e tufa e may bari. Katyi bare aven peske krenži ke šay keren le čiriklya penge kuyburi ande vušalin.”

³³ Phendya o Isus but kasavendar paramiča le ženenge ži kay daštisardine.

³⁴ Numa pe paramiča delas lentsa duma, numa peske vortačenge sa delas duma vorta.

³⁵ Sa kodo dyes, kana pelya e ryat, mothodya lenge, “Žas intyal o pay.”

³⁶ Tay mekline le narodos tay leske vortača ankliste pe ladžiya le Isusesa tay telyarde ži ka o aver brego. Vi aver ladžiyi geline lentsa.

³⁷ Frenedeyit avili ekh bari balval tay kadityi marenas le talazuri pe ladžiya ke pherdyolas payestar.

³⁸ Tay sovelas o Isus palal, peske šeresa pe šerand. Tay uštyarde les tay mothodine, “Raya, nay bayo tuke ke meras?”

³⁹ Tay uštilo tay xalya‐pe la balvalyasa tay phendya la maryake, “Pača, aš miro.” Tay ašili e balval tay sa domolisayli.

⁴⁰ Tay mothodya lenge o Isus, “Anda soste daran? Manay tume patyayimos?”

⁴¹ Tay sa čudisayle tay phende yekh avreske, “Savestar manuš si kado ke patyan lesko muy vi e balval tay vi e marya?”