Marco 3 - O Lašo Nevimos katar o Marko 1971 (Kalderaš)

TRIN

¹ Pale gelo o Isus ande sinagoga tay sas ekh manuš kasko vas tsepenime‐lo.

² Le Fariseyuri čerišinas les te dikhen te sastyarelas les o Isus po Svunto Dyes te šay astarenas te thon beda pe leste.

³ Mothodya le manušeske vo, “Tho‐tu katka maškaral.”

⁴ Tay le Fariseyonge phendya, “So phenen le zakonuri? Te slobodo te ažutis le manušenge vay te keras lenge bayo, te skepis ekh trayo vay te mudaras les?” Numa, kodola ašile miro.

⁵ Tay dikhlya pe lende xolyasa tay xalya les ando ilo ke sas zurale‐dženge. Atunči, mothodya le nasvaleske, “Lundžar o vas.” O manuš lundžardya les tay sastilo o vas.

⁶ Telyarde le Fariseyuri tay, anda yekh, line tay dine duma le Herodaryentsa te roden sar te mudaren le Isusos.

⁷ Atunči telyardya o Isus tay gelo ka e marya la Galileyaki, vo tay leske vortača. Tay but žene žanas pala leste. Avenas katar e Galileya, e Yudeya,

⁸ e Yerusalema, e Idumeya tay vi katar o them intyal o Yordano tay katar o them paša o Tiro tay e Sidona. Von ašundesas sa so kerdyasas o Isus tay avenas leste.

⁹ But, but žene avile tay anda kodya, phendya o Isus peske vortačenge ke getin leske ekh ladžiya te na ličarelas les o narodo.

¹⁰ Sastyardyasas kadya but ženen te savoŕe kay sas len nasvalimata pašonas ka leste te azban les.

¹¹ Tay kanagodi dikhle les le nevuže, pele tele angla leste tay tsipisarde, “Tu san o Šav le Devlesko”.

¹² Tay porunčisardya pe lende te na puřin les kon sas.

¹³ Atunči gelo opre po playoŕo tay akhardya leste kodolen kay alosardyasas len tay geline leste.

¹⁴ Alosardya deš‐u‐don kay si te inkeren lesa tay kay avena bišalde avri te vestin o Lašo Nevimos.

¹⁵ Tay dya len vi e putyarya te gonin avri le nevužen.

¹⁶ Le deš‐u‐duy sas o Simone kaske dya o anav o Petro,

¹⁷ Yakovo tay o Yovano le šave le Zebadeyake. Lenge dya o anav Boanerges (kay si, Řomanes, le Šave le Ronžetoske.)

¹⁸ Sas vi o Andreyas tay o Filipo tay o Burtya tay o Mateyo tay o Toma tay o Yakovo, o šav le Alfayosko. Sas vi o Todoro tay o Simone kay bušolas o Harniko,

¹⁹ Tay o Yudas o Iskariyoto kay, may palal, sas te puřil les. Porme gelo‐tar khere o Isus.

²⁰ Tay tyidinisayle kadya but žene te naštin či te xan o Isus tay leske vortača.

²¹ Kana ašunde kodo leske nyamuri, astarde les ke mothonas ke bi‐hatyarno‐lo.

²² Porme, le Zakonarya kay avile katar e Yerusalema, mothodine “O Beelzebub si ande leste,” tay vi, “O Beng ažutil les te gonil avri le nevužen.”

²³ Tay akhardya le leste tay phendya lenge ekh gičimos, “Šay gonil o Satano le Satanos?

^24-25 Te xal‐pe yekh avresa le žene and ekh amperatsiya, si te řimol‐pe kodya amperatsiya. Tay te xal‐pe le žene and ekh kumpaniya si te řimol‐pe vi kodya kumpaniya.

²⁶ Sa kodya, te xal‐pe pesa o Satano si te řimol‐pe vi vo tay avela gata.

²⁷ Našti žas ando kher ekhe zurale manušesko te čores leski mandžin bi te phandesa le manušes. Pala kodya šay buntuis o kher.

²⁸ Vorta phenav tumenge ke šay aven yertime sa le bezexa tay sogodi akušimata,

²⁹ Numa či yertil o Del kas akušel le Svuntone Duxos. Kača bezex ašel de veči.”

³⁰ Kodya mothodya o Isus ke phende ke bendžaylo sas.

³¹ Atunči avile leski dey tay vi leske phral. Ašile avri tay tradine ekh vorba te avel avri lende.

³² Vi but žene bešenas kote tay phende, “Ašun, tyiri dey tay tyire phral si avri. Mangen tu te žas lende.”

³³ Tay dya anglal o Isus, “Kon si muŕi dey tay muŕe phral?”

³⁴ Tay dikhlya pe kodolende kay bešenas truyal leste tay phendya, “Katka bešen muŕi dey tay muŕe phral.

³⁵ Kongodi kerel e voya le Devleski, vo si muro phral tay muŕi phey tay vi muŕi dey.”