Marco 15 - O Lašo Nevimos katar o Marko 1971 (Kalderaš)

DEŠ‐U‐PANŽ

¹ De teherin anda e ryat, le bare raša, le purane, le Zakonarya tay e antrego kris dine duma and ekh than tay, atunči, phangle le Isusos tay ingerde les ka o baro ray, o Pilato.

² Tay pušlya les o Pilato, “San tu o Amperato le Židovongo?” Tay vo dya anglal, “Ey, vorta mothos.”

³ Tay le bare raša may thonas but beda pe leste

⁴ May pušlya les o Pilato, “Či des anglal? Dikh sar thon beda pe tute”.

⁵ Numa či may dya anglal o Isus tay čudisaylo o Pilato.

⁶ No, pe pačiv, o Pilato mekelas ekhe řobos kay kamenas von.

⁷ Tay maškar le řoburi ande temnitsa sas yekh kay mudardyasas vuni ketanen and ekh marimos. O Barabas bušolas.

⁸ Tay avilo o narodo tay pušelas le Pilatos te kerelas so sa kerelas pe pačiv.

⁹ Dya anglal o Pilato, “Kamen te mekav tumenge le Amperatos le Židovonge?”

¹⁰ Žanelas mišto ke le bare raša kerde les kris anda o xandžuvalimos.

¹¹ Numa le bare raša buzeyisardya le narodos te phenen ke si te mekel le Barabas.

¹² Tay may yekh data mothodya lenge o Pilato, “Atunči, so te kerav kodolesa kay bušol leske o Amperato le Židovongo?”

¹³ Tay may tsipisarde, “Tho les po trušul.”

¹⁴ Phendya lenge o Pilato, “Soste, kasavestar nasulimos kerdya?” Numa vi may but tsipisarde, “Tho les po trušul.”

¹⁵ Atunci, te kerel so kamenas, o Pilato meklya le Barabas. Atunči, meklya le ketani te maren le Isusos le bičontsa tay tradya les te avel amblado po trušul.

¹⁶ Tay le ketani ingerde les andre ande avlin, kay bušol o Praetorium, tay sa tyidinisayle le ketani.

^17-18 Thodine pe leste ekh lolo kepenyago tay khurde ekh kununa kanřendar tay thodine la pe lesko šero. Tay phende leske, “Dobroy tu, Amperatone le Židovonge.”

¹⁹ Tay vi marenas les po šero ekha trestiyasa tay čungardenas pe leste tay denas čanga angla leste te maren muy.

²⁰ Atunči, line pa leste o lolo kepenyago tay thodine pe leste leske gada. Tay ingerde les avri te amblaven les po trušul.

²¹ Tay paše sas ekh manuš kay bušolas o Simone anda e Sirene. Kado sas o dad le Alesandrosko tay le Rufusosko. Delas andre anda'l gava tay thodine les te lel o trušul.

²² Tay ingerde le Isusos ka ekh than kay bušol Golgota (kay si, Řomanes, o Than Plyašivo).

²³ Tay dine les mol hamime ekhe drabesa kay bušol ‘mira’, numa či pilya la.

²⁴ Tay amblade les po trušul tay hulade leske gada maškar lende. Khelde‐penge ryuxa lenge.

²⁵ Ka'l inya časuri amblade les po trušul.

²⁶ Tay sas ramome opre pa lesko šero, “O Amperato le Židovonge.”

²⁷ Amblade do čoren lesa, yekh pe čači rig tay kol aver pe stingo rig.

²⁸ Kadya pherdilo o ram kay phenel‐pe, “Dyinde les la nasulentsa.”

²⁹ Tay kodole kay nakhle marenas muy pe leste tay mištyinas‐pe le šere tay mothonas, “Yoy, tu kay si te peravel o templo tay te kerel les pe trin dyes,

³⁰ Skepisar‐tu tay vuli tele katar o trušul.”

³¹ Vi kadya marenas muy vi le bare raša tay le Zakonarya. Phende, “Skepisardya avren numa našti skepil‐pe.

³² Te vulel tele katar o trušul, kado Kristo, o Amperato la Izraelako, tay kadya, dikhas vi ame tay patyas vi ame.” Vi kodola kay amblade lesa akušenas les.

³³ Tay mizmere o antrego them tunyaričisaylo ži kay le trin cašuri.

³⁴ Tay ka'l trin časuri, tsipisardya zurales o Isus, “Eloi, Eloi, lama sabaxthani?” Kado si, Řomanes, “Devla, Devla, soste meklyan ma?”

³⁵ Vuni anda lende paše ašunde so phendya tay mothodine, “Ašun, akharel le Elidža.”

³⁶ Tay yekh anda lende našlya tay pherdyardya ekh šponřa sutesa tay thodya la p'ekh trestiya tay dya les te pel. “Ažuker,” phendya kodo, “Te dikhas te avela o Elidža te lel les tele.”

³⁷ Tay tsipisardya muy zurales o Isus tay mulo.

³⁸ Tay o vuluv le Templosko phařadilo de katar o agor ži ka o fundo.

³⁹ Kana o kapitano, kay sas paša leste, dikhlya ke mulo kadya, mothodya, “Vorta, kado manuš sas o Šav le Devlesko.”

⁴⁰ Vi vuni žuvlya sas kote tay dikhenas dural. Maškar lende sas e Mariya anda e Magdala, e Mariya kay sas e dey le may terne Yakovoski tay le Yososki, tay sas vi e Salomiya.

⁴¹ Kadale žuvlya phirenas lesa tay tyiravelas xabe leske kana sas ande Galileya. Sas vi but aver žuvlya kay avile lesa ka e Yersusalema.

⁴² Sas o dyes le lašarimasko, o dyes angla o Savato. Tay ryate,

⁴³ Gelo o Yosefo la Arimateyako ka o Pilato tay manglya lestar o stato le Isusosko. Kako Yosefo sas ekh krisitori pačivalo tay vi vo rodelas e Ampteratisya le Devleski.

⁴⁴ No, čudisaylo o Pilato kana ašundya ke veče mulo‐lo. Akhardya le kapitanos tay pušlya les te vorta mulo‐lo.

⁴⁵ “Čačes”, phendya o kapitano, tay o Pilato meklya le Yosefos te lel o stato.

⁴⁶ Atunči, tyindya o Yosefo ekh yinosko poxtan. Tay lya tele o stato tay vuluisardya les ando poxtan. Porme, thodya les and ekh groapa kay sas šindi anda e stanka tay tevelisardya ekh baro bař te vušaravel o vudar.

⁴⁷ Vi e Mariya e Magdalena tay vi e Mariya e dey le Yoseski dikhle kay thodya les.