Marco 14 - O Lašo Nevimos katar o Marko 1971 (Kalderaš)

DEŠ‐U‐ŠTAR

¹ Akana sas trin dyes angla e Patradži tay angla o Prasniko la Matsako. Tay roden le bare raša tay vi le Zakonarya te astaren les čordanes tay te mudaren les,

² Ke mothodine, “Či po prasniko vay marela ame o narodo.”

³ Tay xalas ando kher le Simonosko le Geralesko ande Betaniya. Tay avili ekh žuvli tay andya pesa ekhe alabastroski piri pherdi kuče vuloyesa kay bušol ‘nardo’. Phařadya e piri tay šordya o vuloy pe lesko šero.

⁴ Numa vuni phende penge, xolyasa, “Pa soste kadya zidisardya o vuloy?

⁵ Šay te bityinasas les pe opral pa trin šela denariyi tay šay te dasas le love le čoŕenge.” Tay xanaspe lasa.

⁶ Numa mothodya o Isus, “Meken la. Pa soste keren bayo lake? Ekh šukar butyi kerdya mange voy.

⁷ Le čoŕe ašen tumentsa tay šay keren lašimos lenge kanagodi avel mišto tumenge. Numa me nay sim inke but tumentsa.

⁸ Voy kerdya sar daštisardya. Veče makhlya muŕo stato te lašarel les angla o praxosarimos.

⁹ Tay vorta mothav tumenge ke kaygodi avela vestime o Lašo Nevimos ande sa e lumya, dena duma pa soste kerdya voy te sa den pe godži ka kadya žuvli.”

¹⁰ Atunči, o Yudas o Iskariyato kay sas yekh anda le deš‐u‐donde, gelo ka le bare raša te puřil les lenge.

¹¹ Tay kana ašunde les, raduisayle tay dine pengi vorba ke denas les love. Tay rodelas sar te šay puřil les.

¹² Tay po angluno dyes la Matsako kana mudarde la Patradžake bakroŕes, leske vortača phende leske, “Kay te žas te getis tuke o xabe le Patradžako?”

¹³ Atunči, bišaldya don anda lende tay mothodya lenge, “Žan ando foro tay arakhel tume ekh manuš kay ingerela ekh piri pay. Žan pala leste.

^14-15 Ande kodo kher kay žal andre ande leste, mothon la gazdake, ‘Phenel o Ray, “Kay si e soba kay si t'avav gosto ande late, tay kay si te xav o xabe la Patradžako muŕe manušentsa?”’ Tay sikavel tume ekh bari soba opral. Andre avela gata sogodi trobul‐pe. Kutka getin o xabe amenge.”

¹⁶ Tay telyardine leske duy vortača ando foro tay sa arakhen sar kay phendyasas len, tay getisarde o xabe la Patradžako.

¹⁷ Atunči, ryate, avilo o Isus le deš‐u‐dontsa.

¹⁸ Kana xanas ka e mesali mothodya o Isus, “Vorta mothav tumenge ke yekh anda tumende si te puřil ma. Yekh kay xal mantsa.”

¹⁹ Atunči dine te nekežisavon tay te mothon yekh pala avreste, “Me sim?”.

²⁰ Mothodya lenge, “Si yekh anda le deš‐u‐donde, yekh kay bolel o manřo ande kado čaro mantsa.

²¹ Ke si te merel o Šav le Manušesko sar kay ramome pa leste. Numa te marel les o Del, kodoles kay puřil ma. May vorta leske te šoha na arakhadilyasas.”

²² Tay kay xanas, lya manřo tay nayisardya le Devleske tay phaglya o manřo tay dya les lenge. Phendya “Len les. Kado si muŕo stato.”

²³ Atunči, lya o taxtay tay nayisardya le Devleske tay dya les lenge tay pile savoŕe lestar.

²⁴ Tay phendya lenge, “Kado si muřo rat le ampetyimosko kay šordyol butenge.

²⁵ Vorta mothav tumenge ke či may pyav e mol ži kay o dyes kana pyava la, neves, ande Amperatsiya le Devleski.”

²⁶ Tay may palal te dyilabade ekhe Devleski dyili, dine avri ka e Playin le Maslinengi.

²⁷ Tay mothodya lenge o Isus, “Tume savoŕe mekena ma, ke ramome si, ‘Marav le bakrares tay le bakre si te našen pe svako rig.’

²⁸ Numa kana uštyav, žav angla tumende ži ande Galileya.”

²⁹ Mothodya leske o Petro, “Vi te meken tu savoŕe, me či mekav tu.”

³⁰ Tay mothodya leske o Isus, “Vorta mothav tuke, kadya ryat, ži ka bašol duvar o kokošo, trivar xoxaves pe mande.”

³¹ Numa, zurales phendya o Petro, “Vi te trubula te merav tusa, či xoxavav pe tute.” Tay vi savoŕe phende sa kadya.

³² Tay geline ka ekh phuv kay bušol Getsemane, tay mothodya peske vortačenge, “Bešen kate ži kay rudži‐ma.”

³³ Tay ingerdya pesa le Petros, le Yakovos tay le Yovanos tay pelya pe leste e briga tay o nekazo,

^34-35 tay mothodya lenge, “Merel muŕo ilo brigatar ži kay o merimos”. Ašen kate tay pelya pe phuv tay rudžilas‐pe, “Te daštil‐pe, šay nakhel mandar kado časo.”

³⁶ Tay mothodya, “Aba, Dade, šay keres sogodi. Le mandar kado taxtay. Numa, te na avel so kamav me numa so kames tu.”

³⁷ Tay avilo tay dikhlya ke sovenas tay mothodya le Petros, “Simone, soves? Našti arakhesas p'ekh čašo?

³⁸ Arakhen tay rudžin‐tume te na peren ande doš. O duxo zuralo‐lo numa o stato kovlo‐lo.”

³⁹ Tay pale gelotar tay rudžilas‐pe sa kadya.

⁴⁰ Tay may ekh data avilo palpale tay dikhlya ke sovenas ke but lindrale‐le peske yakha tay či žanenas so te den anglal.

⁴¹ Tay avilo po trito tay phendya lenge, “Inke soven tay hodinisavon? Dosta, avilo o časo. Si te perel o Šav le Manušesko and el vas le bezexalenge.

⁴² Ušten, žas amenge. Dikhen, pašol kodo kay puřil ma.”

⁴³ Tay, anda yekh, ži kay delas duma, avilo o Yudas, yekh anda le deš‐u‐duy tay but žene sebiyentsa tay rovlyantsa. Tradesas len le bare raša tay le Zakonarya tay le puřane.

⁴⁴ No, kodo kay si te puřil les, dya lenge ekh semno. Phendya, “Kodo kay čumidav les, vo si. Astaren les tay ingeren les katar, numa len sama.”

⁴⁵ Tay kana avilo, gelo leste, anda yekh, tay phendya. “Raya,” tay čumidya les.

⁴⁶ Atunči, thodine le vas pe leste tay astarde les.

⁴⁷ Numa yekh anda kodolende kay sas paše, ankaladya peski sabiya tay mardya le bare rašaska slugas tay šindya lesko kan lestar.

⁴⁸ Mothodya o Isus, “Avilyan te astaren me sar kay te astaren ekhe čoŕes, le sebiyantsa tay le rovlyantsa?

⁴⁹ Svako dyes, simas tumentsa ando templo tay sityaravas tay či astardyan ma. Numa si te pherdyona le rama.”

⁵⁰ Tay savoŕe mekline les tay našlinetar.

⁵¹ Tay gelo pala leste ekh terno manuš tay leste sas numa ekh yinosko poxtan pe peste. Tay astarde les.

⁵² Numa šudya pa peste o yinosko poxtan tay našlo‐tar.

⁵³ Tay ande le Isusos ka o may baro rašay kay tyidinisayle sa le bare raša, le purane tay vi le ramotoarya.

⁵⁴ Tay dural gelo o Petro pala leste vi ande bar le bare rašaski. Tay bešelas‐pe kote tay delas duma le Zakonarya, tay tatyolas‐pe paša e yag.

⁵⁵ Atunči, le bare raša tay vi o antrego kris rodenas le marturon kay thonas beda po Isus te šay mudarenas les. Numa či arakhle kanikas,

⁵⁶ Ke but xoxavenas pe leste numa či dine duma sa yekh fyalo.

^57-58 Atunči, vuni anda lende uštile tay xoxade pe leste tay mothodine, “Ašundyam les kana phendya, ‘Peravav kado templo kay kerdilo le vastentsa tay, pe trin dyes, kerava kaver kay či kerdilo le vastentsa’.”

⁵⁹ Numa vi kodole či phende ekh fyalo.

⁶⁰ Tay o baro rašay uštilo maškaral tay pušlya le Isusostar, “Našti des anglal? So si kado kay phenen kadala manuš pa tute?”

⁶¹ Numa či dya anglal o Isus. Či phendya khanči. Tay may yekh data pušlya les o baro rašay, “San tu o Kristo, o Šav lo Svuntosko?”

⁶² Mothodya o Isus, “Ey, sim. Tay si te dikhen ke o Šav le Manušesko bešela pe čači rig la Putaryaki tay ke avel and el nuverya le čereske.”

⁶³ Tay šindya peske gada o baro rašay tay phendya, “Pa soste may trobul ame le marturya? Ašundyan sar akušlya le Devles. So phenen tume?” Tay savoŕe phende ke si te merel.

^64-65 Tay vuni anda lende dine‐pe te čungarden pe leste tay te vušaraven lesko muy tay te maren les. Tay phende leske, “Gičisar.” Tay line les le karavuli tay marenas les.

⁶⁶ Tay kana sas o Petro telal ande bar, avili leste yekh anda le služi le bare rašange.

⁶⁷ Dikhlya le Petros kay tatyolas‐pe tay phendya, “Vi tu sanas le Nazarenosa, le Isusosa.”

⁶⁸ Numa vo xoxadya tay mothodya, “Či žanav, či hatyarav so phenes.” Tay gelo avri paša o vudai. Tay bašol o kokošo.

⁶⁹ Tay e sluga dikhlya les tay pale may phendya le avrenge, “Kado manuš si yekh anda kodolende.”

⁷⁰ Numa may yekh data xoxadya. Tay ekh tsiŕa may palal, kodola paša leste, phende le Petroske, “Sar te na san yekh kodolendar, ke Galileyano san.”

⁷¹ Numa vo phendya, “Te marel ma o Del, či prinžarav kadale manušes kay den duma pa leste.”

⁷² Tay, anda yekh, may bašol o kokošo. Tay dya pe godži o Petro so mothodya leske o Isus, “May anglal pa bašol duvar o kokošo, tu xoxavesa pe mande trivar”. Tay maladya te rovel.