Marco 12 - O Lašo Nevimos katar o Marko 1971 (Kalderaš)

DEŠ‐U‐DUY

¹ Tay lya te sityarel le paramičentsa. Phendya, “Sas ekh manuš. Sadil ekh struguroski rez tay kerel ekh zido truyal. Hunavel ekh groapa kay tyidenas le struguri. Tay may kerel vi ekh turno kay bešen le karavuli ande leste. Atunči del la vuni gaženge te arakhen la leske. Mišto, žaltar and aver them.

² Tay kana patyile le struguri kača gazda bišalel ekha slugas ka le gaže te lel nište struguri,

³ No, len les kodola tay maren les tay traden les palpale khančesa.

⁴ May yekh data bišalel avrya slugas. Numa kodoles řanin ando šero tay keren les lažav.

⁵ Vi avres may bišalel tay mudaren les. Bišalel avres tay avres tay vi avres. Buten bišalel. Numa sa kadya. Maren vuni anda lende tay mudaren avren.

⁶ Kana, inke yekh sas les, ekh drago šav. Tay ande vurma, vi kodoles bišalel lende. Phenke, ‘Sar te na pačan muŕe šaves.’

⁷ Numa, so keren kodola manuš? Mothon yekh avreske, ‘Kado kerdyol e gazda. Te mudarasa les, avel amenge kača rez.’

⁸ Tay astaren les tay mudaren les tay šuden les avri.

⁹ So kerel akana e gazda? Si te žal tay te mudarel kodole gažen tay dela e rez kavrenge.

^10-11 Či dyindyan ande le rama le svuntsi. ‘O bar kay gindin le zidarya ke bi‐khančesko‐lo kerdilo o may zuralo baŕ ando kher. Kadya kerdya o Del tay amenge če čuda si.’ ”

¹² Tay zumavenas te astaren les ke žanenas ke pa pende sas e paramiči. Numa darayle le gažendar tay, anda kodya, mekline les tay gelinetar.

¹³ Tay bišalde leste vuni Fariseyuri tay Herodiyaya te xoxaven les te falil‐pe kana delas duma.

¹⁴ Avile tay mothodine leske. “Raya, žanas mišto ke san čačo manuš tay ke sam savoŕe ekh fyalo tuke ke nay khanči tuke pe soste mezil ekh manuš numa vorta sityares o drom le Devlesko. Slobodo amenge te potyinas le portsiyi le Amperatoske, le Kayzeroske, vay niči?

¹⁵ Si ame te potyinas vay niči?” Numa žanglya mišto lengo xoxayimos tay mothodya lenge, “Soste zumaven ma? Anenta mange ekh rupuno lovo te dikhav pe leste.”

¹⁶ Ande les tay mothodya lenge o Isus, “Kasko muy tay kaski pečata si kakale?” Mothodine, “Le Kayzaroske.”

¹⁷ Tay phendya vo, “So si le Kayzarosko, den les le Kayzaroske. Tay so si le Devlesko, den les le Devleske.” Tay čudisayle.

¹⁸ Vi vuni Sadakayuri avile leste. Kodole phenen ke naštil te žuvindil‐pe o manuš anda le mule. Pušline lestar,

¹⁹ “Raya, ramosardya o Moze ke kana merel ekhe manušesko phral tay te mekel ekha řomnya, kodo manuš si te lel la řomnya tay vi te baryarel le šavoŕen. Si te kerel kadya peske phraleske.

²⁰ No, sas yefta phral. Lel peske o pervo ekha řomnya. Atunči, merel vo bi‐šavoŕengo.

²¹ O duyto lel la řomnya tay vi vo merel bi‐šavoŕengo. Sa kadya o trito,

²² tay vi savoŕe ži ka o yeftato. Khonik anda lende či mekel či savoŕen. Tay ande vurma merel vi e řomni.

²³ Kana žuvindina‐pe kaski řomni si, ke line la le yefta sar řomni?”

²⁴ Mothodya lenge o Isus, “Nay ande kadya ke falintume, te na žanen le rama tay na žanen e putyarya le Devleski?

²⁵ Ke kana žuvindina‐pe anda le mule, či ansurin‐pe tay či meretin‐pe numa avena sar le andželya.

²⁶ Tay phenav tumenge pa le mule ke žuvindin‐pe. Či dyindyan ande kniga le Mozeski kay phenel‐pe pa e tufa? Mothodya leske a Del, ‘Me sim o Del le Abramosko tay o Del le Izakosko tay o Del le Yakovosko.’

²⁷ Nay o Del le mulengo numa o Del le žuvindengo. Sa falin‐tume.”

²⁸ Tay avilo yekh anda le Zakonarya tay ašunelas so phenenas tay dikhlya ke mišto delas anglal o Isus. Tay pušlya les, “Savi porunka si e angluyi e may bari?”

²⁹ Dya anglal o Isus, “E may bari si, ‘Ašun, Izrayele, o Ray si amaro Del. Numa yekh Ray si,

³⁰ ay te volin le Raske tumare Devleske, sa le ilesa, sa le duxosa sa la godžasa tay la zorasa.’

³¹ E duyto si kadya, ‘Te volin avrenge sar kay volin tume korkoro’.”

³² Phendya leske o Zakonari, “Mothos vorta, Raya. Čačes mothodyan ke feri yekh Del si tay nay aver numa vo,

³³ Ay te volisaras leske sa amare ilesa, sa la godžasa tay sa la zorasa tay vi te volisaras avrenge sar volisaras ame korkoro. Kodya si prya may feder sar sa le dařuri pabule tay dařuri mudardine.”

³⁴ Kana dikhlya o Isus ke dya mišto anglal, mothodya leske, “Nay san dur katar e Amperatsiya le Devleski.” Tay pala kodo, khonik či tromaylo te zumavel les.

³⁵ Kay sityarelas ando templo, phendya, “Sar mothon le Zakonarya ke o Kristo si o šav le Davidosko?

³⁶ Vi o David, anda o Svunto Duxo, mothodya, ‘O Ray mothodya muŕe Raske, beš pe muŕi čači rig ži kay či thos tye dušmayen tela tye punře.’

³⁷ Vi o David akharel les o Ray tay, anda kodya, sar t'avel lesko šav?” But žene sas tay savoŕe voyasa ašunde les.

³⁸ Kay sityarelas, mothodya, “Arakhen‐tume p'el Zakonarya ke drago lenge te phiren hurade ande le kepanyaguri le lunžone tay te bandžon angla lende le žene and el foruri.

³⁹ Drago lenge vi le may laše skamina and el sinagogi tay ka'l pačiva.

⁴⁰ Čoren le kher katar le phivlya tay atunči te keren‐pe laše, may but rudžin‐pe. Avela lenge ekh may baro tyinuimos.”

⁴¹ Tay bešlya tele paša e lada le lovengi tay dikhlya pe le žene kay thonas love ande late. But barvale žene thonas bare love.

⁴² Atunči avili ekh čoŕi phivli tay thodya duy kotor xurde love.

⁴³ Sikadya peske vortačenge so kerdyasas e phivli tay mothodya, “Vorta mothav tumenge, kodya čoŕi phivli thodya ande lada le lovengi may but de sar thodine sa le aver and ekh than.

⁴⁴ Dine von kadale love kay či trobul lenge, numa kača, vi ke čoŕi‐la, sa dya, vi kodya kay trobul la te trayil.”