Marco 11 - O Lašo Nevimos katar o Marko 1971 (Kalderaš)

DEŠ‐U‐YEKH

¹ Kana pašile ka e Yerusalema, e Betpaža tay e Betaniya, paša e Playin le Maslinenge, bišaldya don anda peske vortača,

² tay mothodya lenge, “Žan ando gav mosa pe tumende tay kana dena andre, arakhena ekhe phangle katiroŕes. Khonik šoha či bešlya pe leste. Putren les tay anen les katka.

³ Te phenela tuke voarekon, ‘Soste putren les?’, phenen leske, ‘Kado trobul le Raske tay bišalela les palpale.’ ”

⁴ Tay geline‐tar tay arakhle le katiroŕes kay sas phanglo ka o vudar ande vulitsa. Tay puterde les.

⁵ Tay vuni anda kodolende kay bešenas kote mothodine lenge, “So keren? Soste putren le katiroŕes?”

⁶ Tay phende lenge so mothodyasas o Isus tay mekline le te žan.

⁷ Atunči, andine le katiroŕes ka o Isus tay šude penge raxamya po katiroŕo tay o Isus anklisto pe leste.

⁸ Tay but buhlyarenas penge raxamya po drom tay kaver šudenas po drom patryange krenži kay šindesas ando veš.

⁹ Tay vi kodole anglal tay vi kodole palal, savoŕe tsipinas, “Hozana, mišto avilyan. Alduime kodo kay avel ando anav le Devlesko.

¹⁰ Alduime e Amperatsiya amare Dadeski, le Davidoski so avela. Te tsipin ‘Hozana’ ando čeri.”

¹¹ Atunči gelo ande Yerusalema tay dya andre ando templo. Tay kana sa dikhlyasas, aba kazno sas, tay gelo avri ži kay e Betaniya le deš‐u‐dontsa.

¹² De teherin, kana avile palpale katar e Betaniya, bokhaylo.

¹³ Tay, dural, dikhlya ekhe šmotyinengi pruyin kay patryazisaili. Gelo te dikhel te daštila te arakhel šmotyini pe pruyin. Numa feri patrya sas, či aver khanči. Nas inke e vryamya le šmotyinenge.

¹⁴ Tay phendya lake o Isus, “Te manay xal šmotyini tutar khonik.” Vi leske vortača ašunde so mothodya.

¹⁵ No, avile ži ka e Yerusalema. Dya andre ando templo tay lya te gonil avri savoŕen kay tyinenas tay bityinenas ay dya muyal le mesalya kodolenge kay pařuvenas le loventsa ay vi le skamina kodolenge kay bityinenas le golumbya.

¹⁶ Či mekelas kanikas te na ingerel khanči pa o templo.

¹⁷ Tay lya te sityarel. “Nay ramome, ‘Bušola muŕo kher ekh kher le rudžimasko sa le natsiyenge’. Numa tume kerdyan anda leste ekh groapa le čorengi.”

¹⁸ Kana ašunde kodo le bare raša tay le Zakonarya, lya te roden sar te mudaren les. Darayle lestar ke mirisayle le žene pala lesko sityarimos.

¹⁹ Atunči, kana ratyolas, geline‐penge anda o foro.

²⁰ De teherin, kana avile palpale, dikhle ke le šmotyinengi pruyin šutyili ku vini ku sa.

²¹ Tay dya pe godži o Petro tay mothodya leske, “Raya, dikh. Šutyili e pruyin kay akušlya la.”

²² Dya anglal o Isus, “Si tume te patyan tume ando Del.

²³ Vorta, mothav tuke, kongodi mothol kadale playinake te lel‐pe tay te šudel‐pe ande marya, tay či benuil ande peste ke vorta kerel‐pe numa sa patyal ke avela‐pe, kerdyola leske.

²⁴ Anda kodya, phenav tumenge, soste‐godi mangen kana rudžin‐tume, te patyan ke aba tute avel les, vorta avela tumende.

^25-26 Tay kanagodi rudžintume, te kerdya tuke bayo voarekon, yertisaren leske. Tay pala kodya vi tumaro Dad ando čeri yertila tumenge tumare bezexa.”

²⁷ Tay may yekh data aresle ka e Yerusalema. Tay kana phirelas ando templo, avile leste le bare raša tay le Zakonarya tay vi le purane.

²⁸ Phende leske, “Kaske putyaryasa keres kadale butya. Kon dya tuke kača putyarya te keres le”.

²⁹ Mothodya lenge o Isus, “Vi me pušava tumendar voareso. Den ma anglal tay me mothav tumenge kon dya ma kača putyarya.

³⁰ O bolimos kay dya o Yovano. Anda o čeri sas vay anda le manuš? So mothon mange?”

³¹ Tay mothodine yekh avreske, “Te phenasa, ‘anda o čeri’, mothola vo, ‘Ay sostar či patyanas‐tume lestar?’

³² Numa sar te phenas, ‘anda'l manuš?’ ” Darayle le gažendar ke patyanas‐pe savoŕe ke čačo profeto sas o Yovano.

³³ Anda kodya, dine le Isusos anglal, “Sar te phenas?” Tay mothodya le o Isus, “Mišto, sar te phenav tumenge me kon dya ma kača putyarya te kerav kadale fyaluri?”