Marco 2 - E Nevi Viasta o Psalmo 2004 (Maximoff - Kalderaš)

O Jesus sastiarel jekhe paralitikos

¹ Uni dies pala kudia o Jesus avilo palpale ande o Kapernaum. Ašunde ke vo avilo ande o kher,

² ai kjidinisaile kasave but manuš ke o than angla o vudar naštilas te mai ninkerel len. Vo mothol lenge e Vorba.

³ Žene avile leste, andine jekhe paralitikos ningerdo katar štar manuš.

⁴ Sar naštinas t'aven ži leste, katar o baro narodo, von puterde o čardako le kheresko kai vo sas, ai von vuliarde les katar kudo puterimos pe o pato pe savo o paralitiko sas.

⁵ O Jesus, dikhlias lengo patiamos, phenel le paralitikoske: Muro šiav, tjire bezexa si jertime.

⁶ Sas kothe uni zakonaria, bešenas tele ai phenenas ande pende:

⁷ Sar kado manuš del vo duma kadia? Vo prasal. Kon šai jertil le bezexa, te na avela vo o Del?

⁸ O Jesus, hatiardias strazo ande peste katar o duxo so von gindinas ande pende, phenel lenge: Sostar si tumen kasave ginduri ande tumare ile?

⁹ So si mai mišto, te phenes le paralitikoske: Tjire bezexa si jertime, vai te phenes: Ušti, le tjiro pato, ai phir?

¹⁰ Eta, eta tume te žianen ke o Šiav le manušesko si les pe e phuv e putiaria te jertil le bezexa.

¹¹ Me dav tu ordina, phenel vo le paralitikoske: Ušti, le tjiro pato, ai žia ande tjiro kher.

¹² Ai, strazo, vo uštilo, lias pesko pato, ai gelo-tar avri angla savořende, kadia sas lenge sa šodo ai vestinas le Devles, phenenas: Ame šoha či dikhliam diela kadia.

O Jesus akharel le Levi

¹³ O Jesus mai anklisto avri karing e maria. Sa o narodo avelas leste, ai vo sikiarelas len.

¹⁴ Kai nakhelas, vo dikhlias le Levi, šiav katar o Alfeo, bešelas pala e skafidi kai pokjinen e taksa. Vo phenel leske: Av pala mande! O Levi uštilo, ai gelo pala leste.

¹⁵ Sar o Jesus sas pala e skafidi ande o kher ka o Levi but manuš kai kjiden e taksa le amperatoske ai žene kai nai lengo traio lašio, vi von thode pe pala e skafidi lesa ai leske vortakonsa; ke von sas but, ai gele pala leste.

¹⁶ Uni zakonaria, kai sas Farizianuri, dikhle les ke xal le manušensa kai kjiden e taksa ai le ženensa kai nai lengo traio lašio, phenen leske vortakonge: Sostar xal vo le manušensa kai kjiden e taksa ai le ženensa kai nai lengo traio lašio?

¹⁷ Sar o Jesus ašundias, vo phenel lenge: Nai kudala kai si saste ke trubul len doxtoro, numa le nasvalen. Me či avilem te akharav kudalen kai si vorta, numa le bezexalen.

O Jesus ai o posto

¹⁸ Le vortača le Jonoske ai le Farizianuri postin. Von avile te phenen ka o Jesus: Sostar le vortača le Jonoske ai kudala katar le Farizianuri postin von, numa tjire vortača či postin?

¹⁹ O Jesus del len palpale: Le vortača le terneske kai ansuril pe šai postin von žikin si o terno lensa? Sogodi si lensa o terno, von naštin te postin.

²⁰ Le dies avena kai o terno avela lendar lino, ai atunči von postina kudo dies.

²¹ Khonik naštil te suvel jekh kotor nevo ka jekh tsalia purani; aver fialo, o kotor nevo šinel jekh partia anda e tsalia, ai o šinimos avela mai baro.

²² Ai khonik či thol mol nevi ande le bočonkuri purane; aver fialo, e mol phagel le bočonkuri, ai e mol ai le bočonkuri xasavon; numa trubul te thon e mol ande le bočonkuri neve.

O Jesus ai o sabato

²³ Areslias, jekh dies o sabato, ke o Jesus nakhel maškar o gjiv. Leske vortača, žianas pe vurma, thode pe t'ankalaven simintsi.

²⁴ Le Farizianuri phenen leske: Eta, sostar keren von so nai slobodo te keren o sabato?

²⁵ O Jesus del len palpale: Či gjindian tume šoha so kerdias o David, kana sas bokhalo ai manglias te xal, vo ai kudala kai sas lesa.

²⁶ Sar dias vo ande o kher le Devlesko, pe e vramia kana sas o baro rašai o Abiatar, ai vo xalias le manře dišade pe o altari, kai slobodo ferdi le rašange te xan, ai inke vo dias ka kudala kai sas lesa!

²⁷ Porme vo phenel lenge: O sabato si thodino le manušenge, ai nai ke o manuš si thodino le sabatoske;

²⁸ kadia o Šiav le manušesko si o birevo vi pe o sabato.