Marco 16 - E Nevi Viasta o Psalmo 2004 (Maximoff - Kalderaš)

Sar živindila vo

¹ Kana o sabato nakhlo, e Maria anda e Magdala, e Maria, dei katar o Jakob, ai e Salome, kjindine duxia, eta te xalaven le Jesus.

² O mai angluno dies le kurkesko, von gele ka o groapoševo, de diminiats sar o kham uštel.

³ Von phenen maškar pende; Kon spidela amenge o bař dur angla o groapoševo?

⁴ Ai, vazde le jakha, von dikhle ke o bař, kai sas baro, sas spidino.

⁵ Von dine andre ande o groapoševo, dikhle jekhe terne manušes bešel pe e čači, pe leste jekh řotia parni, ai len lias le e dar.

⁶ Vo phenel lenge: Te na lel tume e dar, tume roden le Jesus anda o Nazaret, kai sas amblado; vo živindisailo, vo nai kathe; eta o than kai thodinesas les.

⁷ Numa žian te phenen ka leske vortača ai ka o Petri ke vo gelo anglal ande e Galilea; kothe tume dikhena les, sar vo phendiasas tumenge.

⁸ Von ankliste avri anda o groapoševo ai našle. E dar ai o isdraimos line len sa; ai von či phende khanči khanikaske, ande pengi dar.

O Jesus sikadilo ka e Maria anda e Magdala

⁹ O Jesus, živindisailo e diminiats katar o mai angluno dies le kurkosko, sikadilo angla savořende ka e Maria anda e Magdala, kastar vo gonisardiasas efta demonon.

¹⁰ Voi geli te ningerel e viasta ka kudala kai sas lesa, ai kai nekežinas ai rovenas.

¹¹ Kana von ašunde ke vo trail, ai ke voi dikhlias les, von či patianas.

O Jesus sikadilo ka e dui vortača

¹² Pala kudia, vo sikadilo, jekh kaver fialo, maškar dui anda lende kai sas pe e vurma te žian pe o kimpo.

¹³ Von avile te phenen les le kavrenge, kai či patiaie či len.

O Jesus sikadilo ka le deš-u-jekh vortača

¹⁴ Porme, sikadilo le deš-u-jekhenge, žikin von sas pala e skafidi; ai vo phenel lenge ke či patian ai ke lengo ilo si zuralo, ke či patiaie kudalen kai dikhle les živindo.

¹⁵ Porme vo phenel lenge: Žian pe sa e lumia, ai phenen e laši viasta savořenge.

¹⁶ Kudo kai patiala pe ai avela boldo avela skipime, numa kudo kai či patiala avela strafome.

¹⁷ Eta le čudeni kai avena kudalensa kai patian: Ande muřo anav, von gonina le demonon, von dena duma neve šiba;

¹⁸ von lena le sapen le vastensa; te pena varesavo pimos merimasko, či avela len či jekh nasulimos; von thona le vast pe le nasvale, ai le nasvale sastiona.

O Jesus gelo palpale paša o Del

¹⁹ O Baro, pala ke dias lensa duma, sas lino ande o čeri, ai vo bešel pe e čači le Devleski.

²⁰ Ai von gele te phenen kai-godi: O Baro ažutilas len ande lengi butji, ai sikavelas katar le čudeni kai kerenas ke so von denas duma sas o čačimos.