Marco 12 - E Nevi Viasta o Psalmo 2004 (Maximoff - Kalderaš)

E paramiči le nasulengi kai kjiden o struguro

¹ O Jesus lias pe atunči te del lenge duma paramičensa. Jekh manuš thodias jekh rez. Thodias krugom jekh bar, hunadias jekh groapa kai kjidel le struguri, ai vazdias jekh turo; porme muklias e rez užile ka kudala kai bariaren, ai vo muklias o them.

² Ande e vramia kai trubul te kjiden, vo tradias jekha sluga karing kudala kai kjiden, te lel lendar jekh partia katar so dias o rez.

³ Line les, von marde les, ai trade les nango.

⁴ Vo mai tradias karing lende jekha kaver sluga; von malade les pe o šero, ai dine les pe o lažiav.

⁵ Vo tradias jekha trito, kai von mudarde les; porme but kaver, kai von marenas uni vai mudarenas le kaver.

⁶ Mai sas les jekh šiav kai sas leske drago; tradias les karing lende o mai paluno, phenelas: Avela lenge lažiav katar muřo šiav.

⁷ Numa kudala kai kjiden phenen maškar pende: Eta lesko šiav; aven, mudaras les, ai avela sa amenge.

⁸ Ai von line les, mudarde les, ai šiude les avri anda e rez.

⁹ Akana, so kerela o birevo anda kudala kai kjiden? Vo avela, xasarela kudalen kai kjiden, ai vo dela e rez ka le kaver.

¹⁰ Či gjindian tume kadia vorba kai si ramome: O bař kai šiude kudala kai vazden khera areslo o mai lašio ande o koltso:

¹¹ Si katar o Baro ke kudia avilo, ai si jekh čudenia ka amare jakha?

¹² Von rodine te len les, numa daranas katar o narodo. Von hatiarde ke lenge phendias o Jesus kudia paramiči. Ai von mukle les, ai geletar.

So trubul te pokjines ka o Amperato

¹³ Von trade paša o Jesus uni Farizianon ai vortakon le Herodoske eta te len les pe leske vorbi.

¹⁴ Ai von avile te phenen leske: Birevo, ame žianas ke tu san čačo, ai ke tu či daras khanikastar; ke tu či les sama sar si le manuš, ai tu sikiares e vurma le Devleski sar si o čačimos. Si slobodo, vai niči, te pokjinas ka o Amperato? Trubul ame te pokjinas, vai te na pokjinas?

¹⁵ O Jesus, žianelas lenge athaimata, del len palpale: Sostar zumaven ma tume? Anen mange jekh dinaro, eta te dikhav les.

¹⁶ Von andine jekh; ai o Jesus pušel le: Kasko si kako vobrazo ai kako ramomos? Katar o Amperato, den von palpale.

¹⁷ Atunči vo phenel lenge: Den palpale ka o Amperato so si ka o Amperato, ai ka o Del so si le Devlesko. Ai von si karing leste ande e čudenia.

O pušimos sar si te živindin le mule

¹⁸ Le Sadusenuri, kai phenenas ke nai te živindin le mule, avile paša o Jesus, ai pušle les kadia:

¹⁹ Birevo, eta so o Moše phendias amenge: Te o phral varekasko merel, ai muklias jekha řomnia, bi t'avel les glati, lesko phral lela leska phivlia, ai dela glati peske phraleske.

²⁰ Eta, sas efta phral. O mai angluno ansurisailo, ai mulo bi te mukel glati.

²¹ O duito lias la phivlia t'avel leski řomni, ai mulo vi vo bi te mukel glati. Sa jekh fialo kerdias o trito,

²² ai či jekh anda le efta či muklias glati. Pala lende, e žiuvli vi voi muli.

²³ Kana živindina le mule, saveski anda le efta avela voi e řomni? Ke sa le efta line la sar řomni.

²⁴ O Jesus del len palpale: Či šibin-tume tume, ke tume či hatiaren či le ramomata, či e zor le Devleski?

²⁵ Ke, kana živindina le mule, le manuš či lena řomnian, či le žiuvlia řomen, numa avena sar le andželi ande o čeri.

²⁶ So avela o živindimos le mulenge, či gjindian tume, ande e kliška katar o Moše, pa e buř: Me sim o Del katar o Abraham, o Del katar o Isak, ai o Del katar o Jakob?

²⁷ O Del nai o Del le mulengo, numa le živindengo. Tume but šibin tume.

So si e mai bari poronka

²⁸ Jekh zakonari, kai ašunelas ke den duma, prinžiardias ke o Jesus dias mišto palpale ka le Sadusenuri, pašilo, ai pušel les: Savo si e mai angluni anda le poronki?

²⁹ O Jesus del palpale: Eta e mai angluno: Ašun, Israel, o Baro, amaro Del, si ferdi jekh Baro.

³⁰ Ai, te avela tuke drago o Baro, tjiro Del, anda sa tjiro ilo, anda sa tjiro duxo, anda sa tjiro gindo, ai anda sa tjiri zor.

³¹ Eta e duito: Te avel tuke drago tjiro vortako sar san drago tuke. Manai aver poronka mai bari sar kadala.

³² O zakonari phenel leske: Mišto, birevo; tu phendian čačimasa ke o Del si jekh, ai ke nai aver ferdi vo.

³³ Ai ke te kames les anda sa tjiro ilo, anda sa tjiro gindo, ai anda sa tjiri zor, ai t'avel tuke drago tjiro vortako sar san drago tuke, si mai but sar sa le phabarimata ai sa so des.

³⁴ O Jesus, dikhlias ke dias palpale godiasa, phenel leske: Tu či san dur katar e amperetsia le Devleski. Ai khonik či mai kamelas te pušel les.

O Kristo ai o David

³⁵ O Jesus, mai sikiarel ande o templo, phenel: Sar le zakonaria phenen von ke o Kristo si o šiav katar o David?

³⁶ O David vi vo, miškisardo katar o Svinto Duxo, phendias: O Baro phendias ka muřo Baro: Beš pe muři čači žikin či kerava anda tjire dušmaia te phires pe lende.

³⁷ O David vi vo akhardias les Baro; sar šai avel vo lesko šiav? Ai jekh baro narodo ašunelas leste dragosa.

O Jesus phenel le narodoske te len pe sama katar le zakonaria

³⁸ Vo phendias lenge ande pesko sikiarimos: Len tume sama katar le zakonaria, kai drago lenge te phiraven pe ande le lungi řobi ai den len pozdraimos ande le thana kai si o narodo.

³⁹ Kai rodel le mai anglune skamina ande le khangeria židovitsko;

⁴⁰ kai xan le mištimata le phivliange, ai kai naročno řudjin. Von avena dine pe e kris mai zurales.

So dias jekh čoři phivli

⁴¹ O Jesus bešlo angla e kutia le lovengi, dikhelas sar o narodo tholas love. Uni barvale thonas but.

⁴² Mai avili jekh čoři phivli, ai thodias andre dui tsinoře xarkune kotora, si jekh šuv.

⁴³ Atunči o Jesus, akhardias peske vortakon, phenel lenge: Me phenav tumenge čačimasa, kadia čoři phivli voi thodias mai but de sar le kaver kai thodine ande e kutia.

⁴⁴ Ke sa thodine kai či mai trubulas len, numa voi thodias so trubulas la, sogodi sas la, sogodi sas la te trail.