Lukas 3 - E Nevi Viasta o Psalmo 2004 (Maximoff - Kalderaš)

O Jono kai boldias phenel so avela

¹ O deš-u-panžto berš katar o Amperato Tiber — kana o Pontius Pilato sas vladoro ande e Judea, o Herodo vladoro ande e Galilea, lesko phral o Filipo tetrarxo ande o Iture ai pe e phuv katar o Traxonitis, o Lisanias tetrarxo katar o Abilen,

² ai ande e vramia katar le raša Anas ai Kaifas — e vorba le Devleski sas phendi ka o Jono, šiav katar o Zakaria, ande e pusta.

³ Ai vo žialas ande sa o them krugom o Jordan, phenelas pa o bolimos le keimasko, te lel palpale le bezexa,

⁴ sar si ramome ande e kliška le vorbi katar o Esai, o profeto: Si o hango kudalesko kai tsipil ande e pusta: Lašiaren le vurmi le Bareske, teliaren leske vurmitsi.

⁵ Sako dolina avela pherdi, sako plai ai sako plaiořo avela mai tele; so si bango avela lašiardo, ai le vurmi rimome avena platsko.

⁶ Ai sako mas dikhela o skipimos le Devlesko.

⁷ Vo kadia phenelas ka o baro narodo kai avenas te bolen pe lestar: Vitsa sapengi, kon sikiardias tumen te našen katar e xoli kai avel?

⁸ Den fruti te sikaven ke kein tume, ai na thon tume ande tumende te phenen: O Abraham si amaro dad! Ke me phenav tumenge ke anda kakala bař o Del šai kerel šiave katar o Abraham.

⁹ Inke o tover si thodino ka e vuna la kopačeski; sako kopači kai či del laši fruta avela šindi ai šiudini ande e jag.

¹⁰ O narodo pušel lestar, phenenas: So trubul ame te keras?

¹¹ Vo del len palpale: Kai si les dui bundi te hulavel kudalesa kai nai les, ai ke kudo kai si les te xal te kerel sa jekh fialo.

¹² Mai aven vi kudala kai kjiden e taksa le amperatoske te bolen pe, ai von phenen leste: Birevo, so trubul ame le keras?

¹³ Vo del len palpale: Na mangen khanči mai but opral pa so si tu ordina.

¹⁴ Ketani vi von pušen les: So trubul ame te keras? Vo del len palpale: Na len pe e zor khanči ai na athaven khanikas, ai t'avel tumenge mišto so pokjinen tume.

¹⁵ Sar o narodo ažiukerelas, ai ke sa pušenas pe ande pende te nai o Jono o Kristo,

¹⁶ vo phenel savořenge: Me, bolav tumen paiesa; numa avel kudo kai si mai zuralo mandar, ai me či sim harniko te putrav le doria katar leske papuča. Vo bolela tumen ande o Svinto Duxo ai ande e jag.

¹⁷ Si les leski sita ande o vast; vo hulavela so si, ai vo kjidela o gjiv ande peski stala, numa vo phabarela o sulum ande jekh jag kai či merela šoha.

¹⁸ Si ke kadia o Jono phenel e laši viasta le narodoske, mai phenel lenge but kaver dieli te sikiarel len.

¹⁹ Numa o Herodo o vladoro, o Jono dias pa leste duma pala e Herodias, řomni leske phraleski, ai pala sa le žiungale dieli kai vo kerdias.

²⁰ Thodias o Herodo mai but pe sa le kaver dieli te phandavel le Jono ande e temnitsa.

O bolimos le Jesusosko

²¹ Sa o narodo bolelas pe, o Jesus vi vo sas boldo; ai, žikin vo řudjil, o čeri puterdilo,

²² ai o Svinto Duxo vulisto pe leste sar jekh forma, sar jekh gulumbo. Ai jekh hango ašundilo anda o čeri: Tu san muřo Šiav kai si mange drago; ande tute, me thodem sa muři dragostia.

Katar avela o Jesus

²³ O Jesus sas pašte trianda beršengo kana lias pe te kerel peski butji. Sas, sar gindinas, šiav katar o Josef, šiav katar o Elia,

²⁴ šiav katar o Matat, šiav katar o Levi, šiav katar o Melxi, šiav katar o Janai, šiav katar o Josef,

²⁵ šiav katar o Matatias, šiav katar o Amos, šiav katar o Nahum, šiav katar o Esli, šiav katar o Nagai,

²⁶ šiav katar o Mat, šiav katar o Matatias, šiav katar o Semei, šiav katar o Joseh, šiav katar o Joda,

²⁷ šiav katar o Joanan, šiav katar o Resa, šiav katar o Zorobabel, šiav katar o Saltiel, šiav katar o Neri,

²⁸ šiav katar o Melxi, šiav katar o Adi, šiav katar o Kosam, šiav katar o Elmadan, šiav katar o Er,

²⁹ šiav katar o Jošua, šiav katar o Eliezer, šiav katar o Jorim, šiav katar o Matat, šiav katar o Levi,

³⁰ šiav katar o Simeon, šiav katar o Juda, šiav katar o Josef, šiav katar o Jonam, šiav katar o Eliakim,

³¹ šiav katar o Melea, šiav katar o Mena, šiav katar o Matat, šiav katar o Natan, šiav katar o David,

³² šiav katar o Jesai, šiav katar o Obed, šiav katar o Boaz, šiav katar o Sala, šiav katar o Nason,

³³ šiav katar o Aminadab, šiav katar o Admin, šiav katar o Arni, šiav katar o Esrom, šiav katar o Fares, šiav katar o Juda,

³⁴ šiav katar o Jakob, šiav katar o Isak, šiav katar o Abraham, šiav katar o Tara, šiav katar o Nahor,

³⁵ šiav katar o Seruh, šiav katar o Rago, šiav katar o Falek, šiav katar o Eber, šiav katar o Šelak,

³⁶ šiav katar o Kainan, šiav katar o Arfahad, šiav katar o Šem, šiav katar o Noa, šiav katar o Lameh,

³⁷ šiav katar o Matusela, šiav katar o Enok, šiav katar o Jared, šiav katar o Malelel, šiav katar o Kainan,

³⁸ šiav katar o Enos, šiav katar o Set, šiav katar o Adamo, šiav katar o Del.