Titut 3 - Jju

Ka̱cyet ba̱nyet tssup ka

¹ Yring ba̱nyet nwan ba mi ba tyong ba̱gwam ba a̱ ba̱ pfong, a̱ swat-swat yya kozan kyang a yet i.

² Ba̱ tyyei ba ryok ryat a̱yin a̱ka̱tuk ba̱ryat ba, ba swat lafiya a̱ bo yet ba̱rywai ba̱nyet, a̱ tyyei koyan a̱tsatsak hali.

³ Njit ma zi ma̱ ka̱n sam wai a, i yya wipfong a, i ma̱n brik. I yya dikwwa nkyang ka̱sa ba̱ a̱nzitaka̱i, i yya na̱kpot bu swam. Ba̱nyet a̱ rak za ryi, zi ma̱n dak ba̱ ryi.

⁴ Ma ka̱ram ka Ka̱za A̱ntyok zasan kan za tyyei ka hok dizot njit bu za cat nka ni

⁵ a̱ za san. Ba wei di zi yya a̱tsatsak nkyang ba, ma rot dizot njit ti ka hok ni, Tswa nka ji za tssu i za ryi a̱hwai nbyin ba̱ a̱hwai nsso.

⁶ Ka̱za a̱ wrak Tswa nka zi bu tyyi hywat ndya njit a rot Yesu Kristi A̱ntyok zasan.

⁷ A̱liheri nu a̱ yin tyyi zi gi myim Ka̱za i gi shya sucet ka̱u di tyak a zin breng ndya di na̱won nka ni.

⁸ Ba̱ryat bani a̱ yet ka̱ryong. N bo n cat a ba̱ tyyei nkyang ani di cet, rot ba̱nyet ba a̱ yet ba̱nyet tssup Ka̱za ni a̱ ga tyyi ndya mba na i yya a̱tsatsak nkyang. Nkyang ani yet, i bu byyi kpungtun ka̱bvwa ba̱nyet sa̱rei.

⁹ Ma a tyong a̱cecet sang diccu, bu tyong a̱yiyrek ba̱tyyi, i ryok hwwon zok ko zwang tazwa Truwang ji ba, rot nkyang ani byyi kpungtun ba.

¹⁰ A̱yin nu a̱ kyyai ba̱nyet ni a ku kam bvat ka̱hwa; ki a̱ hok ba a tun nbvak i ku wwon.

¹¹ A bvwo taka̱i a̱yin iya rya nu na bu yet a̱tsatsak ba, nnu ma a̱ ka̱n ya rot.

A̱ngbom ba̱ryat bu ka̱nu-a̱tan

¹² Ki n bu tom Artimat ko Tikikut da̱ nwan, a kwan i ba da̱ nzuk ka̱nkrang Nikafolit, rot n ka̱n dop ni swrang dikwei ti ka̱ yemi.

¹³ Yya koka̱ri i brang Zinat a̱ntyok bvwo shirya nu bu Apollot ka̱ram pyyem ryen mba ka, i bu ryi kozan kyang a ba cat i ku ba̱ maai.

¹⁴ Ryok ba̱nyet njit ba a̱n myyam tyyi ka̱ssi bu yya nkyang a yet i a̱ gan brang ba̱nyet dizot a nkyang a ba cat kozan ka̱tuk ni, ho ba bu yet ba̱nyet sang kpungtun.

¹⁵ Sa̱rei ba̱nyet ba a̱ shyi ba̱ nzuk ni a̱ na̱ byei. N cat a byei sa̱rei ba̱kpondang ba a̱ za cat i tssup a ni. Za̱nang Ka̱za ji swrang ba̱ nyin sa̱rei.