Matta 5 - Jju

Wa'azi tazwa ntsok

¹ Yesu na̱ bu ryi ba̱nyet ba̱gingang ba tung, na̱ wrak a̱ swrang an tsok. Na̱ bu swrang, na̱won pfong nu na a̱ nyyai a̱ bu tung a̱ ku krang.

² Na̱ nwa ba̱ zzek a̱ hywa,

Ba̱gwai ka̱ryong

³ “Ba̱nyet ba a̱ bvwo di ba byyi dizot a ndya mba ni a̱ shyi bu ba̱gwai, rot Dityok Tazwa ti yet ti mbaa!

⁴ Ba̱nyet ba a̱ shyi i ka̱nak i a̱ byyi ba̱gwai, rot Ka̱za a̱ ni ba̱ wram!

⁵ Ba̱nyet ba a̱ wi yet a̱ccu mba ni a̱ byyi ba̱gwai, rot ba ni san kyang a Ka̱za ka rop a̱ sak a̱ ni ba̱ ryi ni!

⁶ Ba̱nyet ba a̱ tyyi ndya mba i yya kyang a Ka̱za ka cat da̱ mba ni, ba shyi bu ba̱gwai, rot Ka̱za a̱ ma̱ ni ba̱ yya kyang a ba cat i sa̱rei!

⁷ Ba̱nyet ba a̱ pfong dizot ba̱nyet i a̱ byyi ba̱gwai, rot Ka̱za a̱ ma̱ ni hok dizot mba!

⁸ Ba̱nyet ba a̱ byyi dizizrak a ndya ni a̱ byyi ba̱gwai, rot ba ni ryi Ka̱za!

⁹ Ba̱nyet ba a̱ tyyi ndya mba i jyi swat ba̱nyet i a̱ byyi ba̱gwai, rot Ka̱za a̱ ni ba̱ yei na̱won nka!

¹⁰ Ba̱nyet ba ba yya da̱ mba rot ba yya kyang a Ka̱za ka cat da̱ mba ni a̱ byyi ba̱gwai, rot Dityok Tazwa ti yet ti mbaa!

¹¹ “Ka̱ram ka ba̱nyet ban ya pfwei a̱ yya da̱ nyin a̱ ya bvei kozan diraa rot yi n tssup ni, yi gwai.

¹² Yi gwai i shyi bu shok, rot yi shyi ba̱ a̱gba̱dang nzang Tazwa. A̱mi ba yin yya bu ba̱nyet tyyei ba̱ryat Ka̱za ba a̱ yin ya tason ni.”

Ntwak bu fitila

¹³ “Yi ryi di ntwak ni ka̱yat ba̱nyet ka̱sa ba. Ma ki ntwak a tyak ryen nna na na bo yet ntwak ba, seko ba na̱ weyang, ba̱nyet a̱ shai a̱ swrap.

¹⁴ “Yi ryi di fitila ni i ka̱sa ka. Ka̱nkrang ka ba nok a̱za̱ a̱gut i a̱ shyi i nyat ba.

¹⁵ A̱yin a̱n tyyi rong an fitila a̱ sook ryei a̱n kup ba, seko na̱ za̱ yrek a̱ sak tebur zi gi sai ba̱nyet ka̱ryi ba sa̱rei.

¹⁶ A̱mi meyang yi ma̱ nin tyyi ka̱bvwa sai i ba̱nyet ba ba ga ryi a̱tsatsak nkyang u yi yya ni a̱ dyep A̱tyyi nyin nu a̱ shyi Tazwa ka ni.”

Zzek tazwa Truwang Musa

¹⁷ Yesu a̱ ya ka̱son a̱ bo hywa da̱ mba, “Yi ryok hwa di n ba n bu byyan Truwang Musa ji bu zzek ba̱nyet tyyei ba̱ryat Ka̱za na ba. Kaai, n ba a̱mi n ga bu tyyi zzek mba na i ba ba̱cicrak.

¹⁸ Ka̱ryong n ya tyyei: ko dinyyi tiyring i zzek Truwang na byyi tyak ba, se ka̱ram ka sa̱rei nkyang a shyi ka̱yat Truwang ji ni na ba cicrak, Tazwa ji bu ka̱byen i si wa bvwa i tyak.

¹⁹ Rot a̱mi a̱yin nu a̱ rak tssup ka̱bacincong a̱tsak Truwang ka ni a̱ si bo zzek ba̱nyet ba rak ka̱ tssup a, nu a̱mi a̱ ni yet ka̱baan ka sa̱rei i Dityok Tazwa ti. A̱mi meyang a̱yin nu a̱ tssup Truwang ji ni a̱ si bo zzek ba̱nyet ba za̱ tssup i, nu a̱mi a̱ ni yet a̱gba̱dang i Dityok Tazwa ti.

²⁰ Nkpa n ya tyyei: ki yi ni nwa Dityok Tazwa ti, dolet yi ra̱u ba̱malam Truwang ba bu ba̱nyet Farisa na di ntyyi rya bu yya kyang a Ka̱za ka cat da̱ nyin ni.”

Zzek tazwa diryen

²¹ “Yi hok ba yin tyyei ba̱nyet ndoson a̱ hywa, ‘Ryok hywat a̱yin ba, a̱yin nu a̱ hywat a̱yin ni ba ni ku tyyi an shirya.’

²² Ma naani n hywa: a̱yin nu a̱ yya diryen ba̱ a̱yaan ni, ba ni ku tyyi an shirya; a̱yin nu a̱ yei a̱wumba nu ‘a̱kpam a̱yin’ ni, ba ni ku sak a̱ta̱ssi ba̱nyet shirya; a̱yin nu a̱ ma̱n yei a̱wumba nu ‘a̱bvwon a̱yin’ ni a̱ ni nwa rong.

²³ Rot a̱mi ki a naat bu za̱nang nwan ka̱bvwa ba̱hyum, i si yring a byyi hywak ba̱ a̱wumba nwan,

²⁴ se a wwon za̱nang nwan ji ka̱ yemi brek bu shya a̱wumba nwan nu yi jyi, a si brek nat ka̱bvwa ba̱hyum ka.

²⁵ “Ka̱ a̱yin a̱ na̱ breng i hywak nkyang, a̱ na̱ kwak a̱ naat i i bat shirya, an tyyi ka̱ssi yi jyi nyyai yi ka̱n nwa ka̱bvwa shirya ka ba; ki a rak na̱ si na̱ tyyi mbvak ba̱nyet shirya, ba ma̱ na̱ brak a̱ tyyi mbvak ba̱dogari, ba na̱ ra a̱ tyyi a jaru.

²⁶ Ka̱ryong n na̱ tyyei: a byyi wruk ka̱ yemi ba, se a tan sa̱rei kyang a ba na̱ tssup ni.”

Zzek tazwa kan-a̱naan

²⁷ “Yi yin hok ba hywa, ‘Ryok kan-a̱naan ba.’

²⁸ Ma naani n ya tyyei: a̱yin nu a̱ cyang a̱ra̱mbyring a̱ ku cat ka̱tak mpfwa nu ni a̱ wa ka̱n tyak kan-a̱naan ba̱ nu ka̱yat mpfwa nu ka.

²⁹ Rot a̱mi ki dissi mbvak yak nwan ni na̱ tyyi a nwa a a̱ka̱tukyya, goma a ta̱ tun jing. Ku ran a wai ka̱bvwa i rwam nwan, di a nwa ka̱yat ndong bu rwam nwan ba̱cicrak.

³⁰ Ki bvak yak nwan ni tyyi a nwa a a̱ka̱tukyya, a kpo tyet jing. Ku ran a jing kap yring nwan, di a nwa ka̱yat ndong bu rwam nwan na cicrak.”

Zzek tazwa kam nyreng

³¹ “Ba bo yin hywa, ‘Ki a̱yin a̱ ni gang nyreng ba̱ a̱mbyring nu, dolet na̱ jem kpa gang nyreng a a̱ ku ryi.’

³² Ma naani n ya tyyei, ka̱ a̱yin a̱ kam ba̱ a̱mbyring nu na̱ kan-a̱naan ba, se na̱ bvwo a̱ tyyi a̱mbyring nu kan-a̱naan ki a̱mbyring u a̱ bo drok a̱ si yreng a̱yanyet; a̱yin nu a̱ bo ku bvwa ni a̱ swat i kan-a̱naan ba̱ nu.”

Zzek tazwa si-ssing

³³ “Yi hok ba yin tyyei ba̱nyet nnyyai ba, a̱ hywa, ‘Kyang a a̱yin na̱ rop a̱ sak a̱ ni yya ni, na̱ bo ryok byyik ba. Ma kyang a a̱yin na̱ rop a̱ sak a̱ ni yya A̱gwam Ka̱za mi ni na̱ kwan a̱ kpo yya.’

³⁴ Ma nzuk n ya tyyei da̱ a̱yin a̱ ryok shyi-shyi ba ma ka̱ram ka na̱n dop a̱ sak a̱ ni yya kyang ni, ko di Tazwa rot ka̱ryi Ka̱za a̱mi,

³⁵ ko di ka̱byen rot ka̱bvwa saai a̱tak A̱gwam Ka̱za a̱mi, ko kyi Urushalima rot ka̱nkrang a̱gba̱dang A̱gwam ka a̱mi.

³⁶ Ryok shyi di diccu nwan ba ma, rot a maai i shei dicat tiyring diccu nwan ti sai ko ti tyyi dindying ba.

³⁷ Kyang a maai yi hywa ‘Ee’ ni yi hywa ‘Ee’, ki ku ma̱n yet ‘Kaai’ yi hywa ‘Kaai’. Kyang a seyak a̱mi ni yet nying Ka̱ta̱nyrang.”

Yi ryok ya yya na̱kpot ba

³⁸ “Yi hok ba yin hywa, ‘Ki a̱yin a̱ na̱ tun dissi, a ma̱n ku tun ni; ki a̱ na̱ tun dinyyi, a ma̱n ku tun ni’.

³⁹ Ma nzuk n ya tyyei: Ryok yya a̱yin nu a̱ na̱ yya na̱kpot ni na̱kpot ba. Ki a̱yin a̱ na̱ zzu i shok yring a bu ku brak yring a na̱ zzu.

⁴⁰ Ki a̱yin a̱ nat ba̱ nwan ka̱bvwa shirya a̱ ga san a̱godo nwan, a ku ryi a̱tro nwan nu nta̱mak.

⁴¹ Ki a̱tuba a̱yring ka̱yat nsoja a̱ na̱ tyyi cot kilometre a̱yring, an ku brang a̱mel a̱mba̱hwa.

⁴² Ki a̱yin a̱ na̱ naai kyang, a ku ryi; ki a̱ ma̱n cat kwap, a ryok n ku bvwo ba.”

Yi gwai ba̱nyet ba a̱ ya rak i

⁴³ “Yi hok ba yin hywa, ‘Gwai a̱wumba nwan nu i rak a̱ra̱ndwan nwan nu.’

⁴⁴ Ma nzuk n hywa da̱ nyin, yi gwai ba̱ra̱ndwan nyin, ba̱nyet ba a̱ yya da̱ nyin ni yi ba̱ yya a̱duwa.

⁴⁵ Nkpa ni tyyei ka̱sak ka yin yet na̱won A̱tyyi nyin na a̱ shyi Tazwa ka ni. Rot nu a̱ na tyyi nom a a̱ sai tazwa a̱tsatsak bu ba̱ka̱tuk ba̱nyet sa̱rei, a̱ bo wwon za zi bvwa ba̱nyet ba a̱ yya a̱tsatsak ni bu ba̱nyet ba a̱ yya a̱ka̱tuk i.

⁴⁶ Zang a̱nzan Ka̱za ka ni ya ryi ki yi gwai bu ba̱nyet ba a̱ ya gwai ni? Ba̱nyet ssang diga̱ndu ma a̱ yya a̱mi!

⁴⁷ Ki bu ba̱wumbeyang nyin yi byei ba̱ mba, a̱nzan kyang yi yya ku bvwon bu kpikpit ba̱nyet a? Ba̱nyet cyi Ka̱za ma a̱ yya a̱mi!

⁴⁸ Dolet yi yet ba̱jyem ba̱nyet da̱ A̱tyyi nyin nu a̱ shyi Tazwa ka na̱n yet a̱jyem ni.”