Markut 4 - Jju

Misali tazwa a̱ntyok nat nai yak

¹ Yesu a̱ bo nwa zzek a̱mbeyang kei Galili ti. Ba̱nyet a̱ tung ba̱gingang mbeyang ba̱shekwot ka, hat Yesu a̱ ryin kyang yya a̱ nwa a̱ swrang ka̱yat kpongo, tazwa ba̱shekwot ka.

² A̱ ba̱ zzek nkyang ba̱gingang ka̱yat misalai, a̱ hywa da̱ mba,

³ “Yi rot a̱pfo, i hok!

⁴ A̱ntyok keyak a̱ nat nai zwa yak. Ka̱ram ka na̱n shyi i nai a ni, tswa zaan i kwei a̱zi ryen; na̱non a̱ ba bu tang sa̱rei.

⁵ Tswa zaan i kwei i kukwak, ka̱bvwa ka sang mbyen gingang i. Zi ta ba ahwa rot mbyen i shyi gingang ba.

⁶ Ka̱ram ka nom kun tat i, zi hwwi, i kwot, rot ka̱bvwa nwa a̱nan a̱n shyi ba.

⁷ Tswa zaan i kwei ka̱yat a̱shyim. Ka̱ram ka a̱shyim a nan dai ni, a̱ za̱ hwwok, zi sum ba.

⁸ Tswa zaan i kwei a tsatsak ka̱byen; i ta, i rai, i sum. Tswa zaan i tyyi tswa swak ntat, tswa zaan i tyyi tswa swak a̱kitat, zaan tyyi cyi.”

⁹ Na̱ bu tyak, a̱ hywa da̱ mba, “A̱yin nu a̱ byyi a̱pfo pfong i na̱ hok!”

Kyang a̱ mbyyi na̱n dyat ba̱ mba an misalai ji ni

¹⁰ Yesu na̱ bu brek a̱ si swrang diyin, ba̱yanyet ka̱yat ba̱nyet ba a̱ hok zzek nu na ni, bu ba̱pfong nu ba ba̱ mba swak bu ba̱hwa, a̱ nyyai a̱ ba na̱ ba̱ tyyang kyang a na̱ ba̱ zzek a misali ji ni.

¹¹ Yesu a̱ hywa da̱ mba, “Nyin a̱mi ba ya wwon yi bvwo kyang a shyi i Dityok Ka̱za ti ni, ma kpikpit ba̱nyet a n ni ba̱ zzek a misalai.

¹² Rot, ‘Ba ga swat a̱ cyang-cyang di ba si wa ryi ba; ko ba ga zwong a̱pfo di ba ni hok a̱maai ba. Ki ba da ni ryi ansham a̱ hok a̱maai, da ba ni brak ndya mba na, Ka̱za a̱ ba̱ tssu a̱ka̱tukyya mba nu.’ ”

Yesu a̱ zzek misali a̱ntyok nai yak

¹³ Na̱ hywa da̱ mba, “Yi bvwo misali ji ni baa? Nyin ba ni yya ni n bvwo kpikpit misalai na?

¹⁴ A̱ntyok nai zwa nu a̱ ryi da̱ a̱ntyok ba̱ryat Ka̱za ni.

¹⁵ Ba̱nyet ba a̱ shyi a̱zi ryen ka ni a̱ hok ba̱ryat Ka̱za ba. Ma, ka̱baram ba̱ cincong Ka̱ta̱nyrang a̱ ba bu ba̱ nwa, a̱ tang ba̱ryat ba ba nai i.

¹⁶ A̱mi brak, kukwak a ryi di ba̱nyet ba a̱ hok ba̱ryat ba, a̱ san ba ahwa bu gwai i.

¹⁷ Ma ba̱ryat ba a̱ tyyi a̱nan ka̱yat mba ba. Ba bvwa nom ba̱ cincong. Wwon ka̱ram ka ba nwa sswa ka̱bvung i, ko ka̱ram ka ba nwa yya da̱ mba rot ba̱ryat ba ni, ba kai ba̱ryat ba wwon ba ahwa.

¹⁸ Zwa ji ba nai ka̱bvwa a̱shyim ka ni nji ryi di ba̱nyet ba a̱ hok ba̱ryat ba ni.

¹⁹ Ma a̱huhwa a̱ ba̱ ra̱u, cat byyi zwa, bu cat nkyang zaan i nwa ndya mba na, ba̱ryat ba a̱ sum ba.

²⁰ Zwa ji ba nai a tsatsak ka̱byen nu ni nji ryi di ba̱nyet ba a̱ hok ba̱ryat ba, a̱ ba̱ san ansham, a̱n yya pfong. Ba̱yanyet a̱ ba bu ba̱nyet swak ntat-ntat, ba̱yanyet swak a̱kitat-a̱kitat, ba̱yanyet cyi-cyi.”

Fitila a̱ta̱hwa tebur

²¹ Yesu a̱ bo hywa, “A̱nyan a̱n shyi a̱ ni tyyi fitila a̱ sak ka̱yat ron ko a̱ta̱hwa a̱ngbrak? A̱n ye a̱ ni sak tazwa kyang, ka̱bvwa ka a̱ ga sai o?

²² Ba kyang a shyi ka̱nrang ni wi wruk i. Kyang a ba ma̱n kup a̱wwon ni ba ni kpo kruk.

²³ A̱yin nu a̱ byyi a̱pfo pfong i, na̱ hok!”

²⁴ A̱ bo hywa da̱ mba, “Yi tung kap bu kyang a yi pfong i. Kyang a a̱yin na̱ mak i, nkpa ba ma̱ nin ku mak i, hat a̱n ku brang i.

²⁵ Rot a̱yin nu a̱ byyi ni nu Ka̱za ka bo ni ku ryi a̱nta̱mak. A̱yin nu a̱ sang ni, ba si wa san ka̱ba kyang ka na̱ byyi ni.”

Tswa ji rai ba̱ nji ni

²⁶ A̱ si bo hywa da̱ mba, “Dityok Ka̱za ti ryi da̱ a̱ntyok keyak u a̱ si tup yak ni. A̱wwon a̱ brek a̱ ba ka̱ryi a̱ tssak nda nu a̱ta̱tuk, a̱wwon a̱ nat ka̱bvwa ka na̱ cat i a̱ta̱nom.

²⁷ Kozan ka̱tuk yak a ku rai nyyai i ta nkpa na. Nnu a̱ si wa bvwo kyang a kpo rai ni ba.

²⁸ Bu ka̱byen ka nka a̱ tyyi yak a kun dai, nyyai i ta kpa na, i bu sak na̱hwa, i tun, i tyyi tswa.

²⁹ Ma ka̱ram ka yak a kun kop i, na̱ nat bu ka̱krong a̱ sin hwak na̱dung a.”

Zzek tazwa ntswa ka̱kum

³⁰ Yesu a̱ bo hywa da̱ mba, “A̱nzan zi nin tyen bu Dityok Ka̱za ti brak? Zin ni hywa di ku tai a̱nzan ni?

^31-32 Ee, n yring! Ti ryi di ka̱kum ni, nu a̱ byyi ka̱bacincong tswa. Ma ki kpa ka̱byen, ka̱baram ba̱ cincong a ryi zi rai i tyyi a̱gba̱dang ka̱kon, hat na̱non a̱ ba a̱ bun yya na̱sa mba ka̱yat a̱n tyong nom a.”

³³ Yesu a̱ ba̱ zzek ba̱ryat nu ba a misalai ba̱gingang. A̱ si bo ba̱ zzek a̱ maai-maai ka̱sak ka ba nin hok a̱ maai ni.

³⁴ Ka̱ram ka na̱n shyi ka̱yat ba̱nyet ka ni na̱ ryat ba̱ mba sa̱rei a misalai, ma ka̱ bu brek a̱ bu swrang bu na̱won pfong nu na, na̱ si ba̱ tyai misalai ji.

Yesu a̱ kam a̱ka̱tuk nwun

³⁵ Nom a ku bu kpa, Yesu a̱ hywa di na̱won pfong nu na, “Yi ba zi byyek nat a̱ma̱nyyi kei ka.”

³⁶ Ba drok a̱ wwon ba̱nyet ba ba̱gingang. Na̱won pfong a a̱ nwa kpongo nu, Yesu na̱n swat i; ba brak a̱ rot bu ba̱kpongo ba̱yaan.

³⁷ Yesu bu na̱won pfong nu na ba shyi naat a, a̱ka̱tuk nwun a̱ nwa hywap. Ba̱shekwot a̱ nwa tang a̱ nwai a kpongo nu; a̱kpongo nu a̱ cat bu tyyi nhywat.

³⁸ Ka̱ram a̱ya Yesu na̱ shyi nda a̱maryim a̱kpongo ka. Na̱won pfong a a̱ ku shyek, a̱ hywa da̱ nu, “Malam, a ryi zi kwi a za wwon-wwon o?”

³⁹ Yesu a̱ ta̱za a̱ kam wun na a̱ hywa di kei ti, “Tyyi nyong!” Ti tyyi nyong, da̱ sseng di wun na. Ka̱bvwa ka a̱ brek a̱ bu tyyi nyong.

⁴⁰ A̱ si brak a̱ hywa da̱ mba, “A̱nzan a̱ ya tyyi taka̱i ka̱wun ani? Hat ba̱nyying yi ka̱n wrak ka̱ryong baa?”

⁴¹ Ma ba hok ka̱wun ba̱t, a̱ nwa ya zzim a̱ yya, “A̱nyan a̱nu nini a̱ byyi dityok hat a̱ tssap wun na bu ba̱shekwot ba ma̱n ku pfong?”