Afisa 3 - Jju

Pfong Bulut bu nwap nzaan

¹ Nkpa n byyi nzuk Bulut, a̱tuba nu ba hwam a̱zi hywak nyin na nwap a ni, rot n yya wa'azi Kristi --

² N bvwo yi ka̱n hok ka̱sak ka Ka̱za ka ni n dyi pfong ani n yya zihywak nyin ni.

³ Kyang a Ka̱za ka yya a̱ sak i ka̱nrang ni a̱mi ka yrang a̱ n tyyei. (N ka̱n jem n ya tyyei ba̱ryat ni ba̱cincong.

⁴ Ki yi twang kyang a n ya jem mi ni, yin bvwo ka̱sak ka n nin bvwo nkyang Yesu na shyi i ka̱nrang ni).

⁵ Nnyyai ka ba yin nyyak ba̱nyet nkyang ani, ma ba̱nyying Ka̱za ka̱yat Tswa nka ka a̱ yrang a̱ tyyei ba̱zizrak ba̱pfong Yesu ba bu ba̱nyet tyyei ba̱ryat Ka̱za ba.

⁶ Kyang a shyi ka̱nrang i nkpa yet: ka̱yat tyyei Ka̱sham Ba̱ryat ka̱sak ka kpikpit nwap a a̱ byyi ka̱sak mba a ka̱nu-a̱tan ka ba̱nyet Yahuda na ba shya di Ka̱za ni. Sa̱rei njit zi yet rwam yring, bun byyi bvak an kyang a Ka̱za ka yin dyat a̱wwon ka̱yat Yesu ni.

⁷ Ka̱za a̱ yin tyyi n yya dikwwa tyyei Ka̱sham Ba̱ryat kani, di za̱nang nka ji ka n dyi bu cet nka ni.

⁸ Sa̱rei i ba̱nyet Ka̱za ba nzuk a̱mi n yet ka̱baan ka; ma Ka̱za a̱n shim mi n yet a̱pfong nka i tyyei Ka̱sham Ba̱ryat nka ka di kpikpit nwap ka̱sa na, n ba̱ tyyei ka̱sak ka Kristi na̱n byyi zwa a̱ za wwat a̱ ra̱u koyan ni,

⁹ n bo n ba̱ tyyei ba̱zizrak pfong a ka̱za ka n dyi ni an kyang a ka nyat i nyyai ka̱ram ka ka nyya ka̱sa ka ni.

¹⁰ Ka yya a̱mi ba̱nyet tssup ba a̱ ga yet ryen na ba̱pfong Ka̱za bu kozan cet Tazwa ku nin bvwo ntaka̱i a̱za̱ncyi Ka̱za na i ka̱sak ka kan wrak ba̱nyet sucet i.

¹¹ Ka̱za a̱ yya a̱mi ba̱cicrak bu kyang a ka rop a̱ sak nyyai ba ka̱n yya ka̱sa kani ba; ka yya a̱mi ta ka̱rek A̱gwam njit Yesu Kristi.

¹² Zi maai i nwa a̱ta̱ssi Ka̱za ban bu ka̱wun, rot zi ku ryi ndya njit a bu mon diccu ba̱ nu.

¹³ Rot a̱mi n ya naai yi ryok wwon ka̱bvung ka n sswa a̱zi hywak nyin ni a̱ ya kwu nkap ba. Ku myim yi wu shya shii.

Cat Kristi na

¹⁴ Nkpa n byyi n nin ta̱gbok a̱kwut nzuk a̱ta̱ssi A̱tyyi ka.

¹⁵ Nu a̱mi kozan byin i ka̱sa ka bu Tazwa ba shya diyrek da̱ nu.

¹⁶ N naai Ka̱za ka̱yat a̱gba̱dang shya dityok nka ti ka ya ryi cet ka̱yat Tswa nka ka yi maai i sseng di cet ka̱yat ndya nyin ka.

¹⁷ N naai brak Kristi a̱ brak ndya nyin na a̱n yya ka̱ryi nu, rot yi ku ryi ndya nyin na. N yya a̱duwa yi tyyi ndya nyin na i cat ba̱yaan.

¹⁸ Rot a̱mi nyin bu sa̱rei kpikpit ba̱nyet tssup Ka̱za na i bvwo ka̱sak ka dipa̱rra̱rre bu swap, bu bvwo shii ka̱za bu ka̱yat cat ka Kristi na̱n za cat i,

¹⁹ nyin yi gi ma̱n shya bvwo cat nka na, ko da̱ a̱yin na̱ nin maai a̱ kpo bvwo sa̱rei ni ba, a̱mi zi tyyi hywat sisaai ryi Ka̱za ji.

²⁰ Zi dyep nu a̱tuba a̱ywu a̱ maai a̱ yya pfong ka̱yat njit a̱ ra̱u kyang a zi hwa ni bu kyang a ma zi maai naai ni ba.

²¹ Zi dyep Ka̱za njit ba̱nyet tssup ka̱yat Kristi, kozan ka̱ram har a̱ba̱da abadin, amin.