2 Bitut 1 - Jju

Byet

¹ Nyyai di Siman Bitut, a̱kwwa ba̱ a̱pfong Yesu Kristi. Naat di sa̱rei nyin nu byyi ka̱ryong ka̱yring da̱ njit ni. Ka̱ryong ka n dyat i nka yet taka̱i ka̱ryong a Yesu Kristi Ka̱za njit A̱ntyok za san na̱ za ryi ni. Ka̱ryong ka a̱ yet ka̱sham; a̱ za ryi ka̱ryong iya rot dizizrak nu ti bu yet a̱tsatsak nu na.

² N cat sa̱rei a̱liheri bu myyi rya yet nyiin rot bvwo na yi bvwo Ka̱za bu Yesu A̱gwam njit i.

Yei Ka̱za bu tssa nka na

³ Ka̱za ka̱yat cet nka a̱ za nang kozan kyang a zi cat gin ka̱ tssup ansham i cong a̱zizrak ka̱cyet ni. Ka yya a̱mi rot bvwo na zi bvwo a̱tuba nu a̱ za yei zi bu nwa shii nu na bu ditsatsak nu ti ni.

⁴ A̱mi na̱n za ryi taka̱i a̱gba̱dang a̱tsatsak za̱nang a na̱ za nang ni, nying ji na̱ ryat a̱wwon a̱ ni za ryi ni. Ka̱cyet nyin ka i za̱nang iya a̱mi ya brang yi gi ba swat swat a yet nying Ka̱za ni, gi shot a̱ka̱tuk a̱huhwa nu a̱ tyyi ka̱sa ka kan byyan ni.

⁵ Rot zanang iya se yin tyyi ka̱ssi n brang ditsatsak i ka̱ryong nyin ka; ditsatsak nyin yin brang bvwo,

⁶ bvwo nyin yin brang bvwo breng diccu; i bvwo breng diccu nyin, yin brang hakuri; i hakuri nyin, yi tyong Ka̱za;

⁷ i tyong Ka̱za nyin, yi hok dizot ba̱wumbeyang; i pfong dizot ba̱wumbeyang nyin, yi ba̱ cat.

⁸ Ntaka̱i hali nani a̱mi yi cat. Ki yi na̱ shya ba̱t, na ni ya tyyi yi yya a̱tsatsak mpfong i bvwo Yesu Kristi da̱ A̱gwam njit ni.

⁹ Ma a̱yin nu a̱ shya hali nani ni ba, to, cyang nu na maai ba, a̱ si bo bring di ba ka̱n tssu a̱ka̱tukyya nnyyai nu nu.

¹⁰ Di yi yya a̱mi ba̱wumbeyang, se yi n tyyi ka̱ssi i san tyyi ka̱yat ndwam nyin yei a Ka̱za ka ya yei a̱ bo ya tssa ni ku yet kyang a yi bvwo ni. Ki yi yya a̱mi, kyang n shyi ni ya grap ba.

¹¹ Nkpa ni tyyi ba ya ryi ryen nwa dityok ka̱u di tyyai ti yet ti nying A̱gwam njit Yesu Kristi A̱ntyok za san ni.

¹² Nkpa n byyi n nin swat ya yring nkyang ani, ko di yi ka̱n na̱ bvwo bu sseng ansham i ka̱ryong ka yi ka̱n san ni.

¹³ N dyi kun myim n gyyek ndya nyin na a nkyang ani nyyai n ri swat a̱cet.

¹⁴ N bvwo ba̱nyying ka n ni kwu da̱ni di Yesu Kristi A̱gwam njit na̱ ka̱n n tyyei ni.

¹⁵ Rot a̱mi n cat n shya ryen na yi nin yring nkyang ani ni kozan ka̱ram, ki n bu kwu.

Ba̱ryat nyyai di Ka̱za

¹⁶ Nkyang ani zi ya tyyei tazwa cet bu brek Yesu Kristi ka ni, ba tashikum a̱mi zi ya tyyei ba. Zi ka̱n dyi shii nu na da̱ a̱ssi njit.

¹⁷ Zi yin shyi ka̱ram ka A̱tyyi na̱n ku ryi dityok bu digba̱dang ni. Har ma ka̱ram ka diwan ti yin hyok nyyai di Ka̱za Tazwa i bu hywa da̱ nu, “A̱tuba a̱ni nu a̱ yet Ka̱won nzuk ka, rya nzuk a ku pfong a̱za̱ nu ni.”

¹⁸ Njit ma zi yin shyi ba̱ nu tazwa a̱zizrak dihwan ka i hok ka̱ram ka diwan ti ti yin hyok nyyai Tazwa ka ni.

¹⁹ Rot a̱mi zi san ba̱ryat ba ba̱nyet tyyei ba̱ryat Ka̱za ba ba yin dyat i di rya yring. Ku ni ya byyi sham ki yi san ba̱ryat bani. Ba̱ryat bani a̱ ni ya ryi di fitila ji sai an dyin ni bu tat a̱shong a̱ntson bu ka̱bvwa sai ka̱ta̱ngwat a̱ta̱ntson ka a̱ sai an dya nyin na ni.

²⁰ A̱kpok kyang u n ni ya tyyei ni: a̱yin di diccu nu a̱ ni maai a̱ tyyei kyang a ba̱nyet tyyei ba̱ryat Ka̱za ba yin jem ka̱yat ba̱ryat Ka̱za ni ba.

²¹ Rot a̱yin a̱ ri maai a̱ san ba̱ryat Ka̱za a̱ tyyei i sook rya nu ba; seko Tswa Ka̱za a̱mi ri nwa a̱yin nu i tyyi na̱n tyyei kyang a Ka̱za ka cat ba̱nyet ba a̱ hok ni.