Maraka 1 - Jɔ Biibili ki

Wutɔnŋ Yuhana wɔ racinwulu ki

¹ Ka i Kirinŋ wɔ Wulujii ki tɔnpa ki i : Danshuru wɔ̀ po-i Kirinŋ nu, Yesu Kirisa, ǹʼyɔ ninki wulu bi-a.

² Ǹʼsɛbɛ-i Kirinŋ wɔ cintɔnŋ Esayi wɔ sɛbɛ ki ru tu : « Ǹʼshɛɛli, míŋ i ńʼwɔ cintɔnŋ ki cin ta-a miŋ jɛŋ, ŋì i ta nʼwɔ saa ki ramɔni nʼjɛŋ.

³ Koŋ fali wulu bɛɛ i po-a jaŋ ki faninmwuŋ tu : ‹ Á Ŋuntiŋ ki wɔ saa ki ramɔni, á i ǹʼwɔ saa pyaanŋ kiri teli. ›  »

⁴ Niŋ ɲaan ki tɛ, Yuhana i na a yɛri ji konaŋ kiri wu jaŋ ki faninmwuŋ. Ntiŋ wuru ǹʼsunjo-a konaŋ kiri tɛ tu, kí ntɔri bi arɔɔ bijɛ mamaan kiri ra, tu kí i wu, nwɔma Kirinŋ i kɔ́ɔ́ bijɛ kiri tu kí tɛ.

⁵ Yude sɔɔta ki ru tɔnŋ kiri fa Yerusalɛmutɔnŋ kiri bataa wuru po tiri-ra ntiŋ tɛ. Kí wuru arì tu-a arɔɔ bijɛ kiri ra, niŋ kɔɔtɛ, Yuhana i kí wu-ri Yurudɛn baa ki ru.

⁶ Yuhana yɛɛrajɛrɛbi ki ramɔni wuru ɲɔɔnmi kaan wu, ntiŋ wɔ nukɔlɔfinŋ ki i ji pɔli i. Ntiŋ i a yɛri tɔnnafɛ-ri pyii ri fa jaŋ fan jii ri wu.

⁷ Ntiŋ wuru ǹʼbi-a konaŋ kiri tɛ tu : « Nwɔ̀tiŋ a na míŋ kɔɔtɛ, niŋ wɔ sotinbi ki gbɛ-i mɔ́ɔ́n ki wu, míŋ ŋuniŋ kuru-i niŋ wɔ kari yaa pilitɔnŋ i. »

⁸ Yuhana tu sɛbɛ : « Míŋ i ábɛɛ wu-a ju ra, nka nintiŋ kɔniŋ a na ábɛɛ wu Ɲiniwɔlinŋ ki ra. »

Yesu wu bi ki Yuhana gbɛ

⁹ Niŋ waari ki ru, Yesu i po Nansarɛti, Galile sɔɔta ki ru, ntiŋ i na Yuhana maŋ ki ru. Yuhana i ntiŋ wu Yurudɛn baa ki ru.

¹⁰ Yesu pora ki ju ki ru, ntiŋ i kirinpɔli ki rawwulumaan ja, Ɲiniwɔlinŋ ki i jɛri ntiŋ sun miŋ tu kilaaŋ.

¹¹ Wulu bɛɛ i po kirinpɔli ki ra, niŋ i ǹʼbi tu : « Miŋ i míŋ Danshuru ki i, miŋ bi ki gbɛ-i míŋ gbɛ haali! »

^12-13 Niŋ mamaan ki kɔɔtɛ, Ɲiniwɔlinŋ ki i Yesu curu bo ta jaŋ ki faninmwuŋ shuu. Ntiŋ i sunŋ yaafuuli ma niŋ jaŋ ki faninmwuŋ. Ŋì i Yesu tu niŋ mani nu, shitaanni i ntiŋ kɔrɔbɔ. A juunshɛn ni ji wuru-i kì, koŋ maŋ myɛ-ni niŋ mani nu kì, mɛlɛkɛn ni wuru ye-a ntiŋ tɛ.

Yɛrinpatɔnŋ kiri dɔri bi ki Yesu gbɛ

¹⁴ Yuhana pa bo-i nkasu ki ru waarinŋ wɔ̀ ru, Yesu i ta Galile sɔɔta ki ru, ntiŋ i ta Kirinŋ wɔ Wulujii ki sunjo.

¹⁵ Ntiŋ wuru ǹʼbi-a tu : « Kirinŋ wɔ waaci kubilimaan ki rafaa-a. Kirinŋ wɔ Masabi ki waari ki myɛ-i. Á ntɔri bi áwɔ bijɛ kiri ra, á i bili Wulujii ki ra. »

¹⁶ Ŋì i Yesu tu tiri-ra Galile baa ki tonfan, ntiŋ i Simɔŋ fa a pwaŋ Andire ja. Kí wuru jɔ ri bo-a baa ki ru, sabu yɛrinpatiiri wuru-i.

¹⁷ Yesu tu kí tɛ tu : « Á ǹʼpa míŋ cɛfan, míŋ a ábɛɛ ji koŋ ceelitiiri i. »

¹⁸ Mìŋ manaanŋ tenŋ ki ru, kí i arɔɔ jɔ kiri tu nmaŋ, kí i ǹʼpa ntiŋ cɛfan.

¹⁹ Yesu ta-i jɛŋ pyaanniŋ, ntiŋ i Nsebede danshuru fuuli ki ja, Yakuba fa Yuhana. Nini wuru arɔɔ kwurinŋ kiri ru, kí i arɔɔ jɔ kiri myɛ-ni.

²⁰ Mìŋ manaanŋ tenŋ ki ru, Yesu i kí dɔri. Kí i arì tiŋ Nsebede fa baara matɔnŋ pyɛ kiri tu buŋ ki ru nmaŋ, kí i ǹʼpa Yesu cɛfan.

Yesu wɔ sotinbi ki ɲinijɛ kiri sun

²¹ Yesu fa awɔ kalindaŋ kiri i ta Galile sɔɔta ki ru kili tɔri ra, nwɔ̀ tɔ ki i tu Kafarinawumu. Nufaan jibi ki na-i so, ntiŋ i ta de Yawutu kiri wɔ kalinfu ki ru, ntiŋ i konaŋ kiri kali-li.

²² Ntiŋ wɔ koŋ kalika ɲaan ki botɔnsun i konaŋ kiri pa, sabu ntiŋ wuru konaŋ kiri kali-la miŋ tu sariya kalimɔɔ kiri kì, nka baraka wuru ntiŋ wɔ kalinŋ ki ru.

²³ Niŋ waari ru, shuru ɲinijɛtiŋ bɛɛ wuru kalinfu ki ru, niŋ i yaalinpo tu :

²⁴ « Heyi! Nansarɛtitɔnŋ kiri wɔ Yesu! Nfɛnŋ yibɛɛ fa miŋ faninmwuŋ? Miŋ na-i yibɛɛ tu kɔ wa? Miŋ i nwɔ̀, míŋ niŋ tɔ-i, miŋ i Kirinŋ wɔ Cintɔnŋ Wɔlinŋ ki i. »

²⁵ Yesu i fali ɲinijɛ ki sun tu : « Nʼtɔnŋ ki rala, ŋi i po san weŋ ki ru! »

²⁶ Ɲinijɛ ki i weŋ ki fɛɛn kí kanfɛ, ŋì i wu yuuyuu kusɛbɛ, ŋì i yaalinpo, ŋì i po san wú ru.

²⁷ Niŋ botɔnsun i konaŋ ki bataa pa, fɔ kí i ǹʼbi-ri arìmaŋ tɛ tu : « Haan! Ka a wulu kwuru danwɔ? Ntiŋ i wulubi-a ɲinijɛ kiri tɛ sotinbi wu, tu yìrì po san koŋ nu, yìrì fani i po-ri ncinŋ. »

²⁸ Mìŋ manaanŋ tenŋ ki ru, Yesu tɔ ki i so Galile sɔɔta ki mani ki bataa ru.

Yesu wɔ kiratɔnŋ mwɔɔnna kene bi ki

²⁹ Yesu po san-i Yawutu kiri wɔ kalinfu ki ru, ntiŋ fa Yakuba fa Yuhana i ta Simɔŋ fa Andire wɔ mani nu.

³⁰ Kí so-i niŋ mani nu, kí i ta fa Simɔŋ famari ki bili wu firikwulu la. Kí i nmari wulu bi Yesu tɛ.

³¹ Yesu i a kpari, ntiŋ i nmari pa a gbɛ sun, firikwulu ki i kɔ. Mari ki i jɔrɔkɔ, nmari i nufinŋ si kí tɛ.

³² Sunfyiri ki sun, konaŋ kiri i na arɔɔ kiratɔnŋ kiri bataa fa arɔɔ ɲinijɛtiŋ kiri wu Yesu tɛ.

³³ Kili ki ru tɔnŋ kiri bataa i na arì rakɔli fu ki tɔnŋ na.

³⁴ Kiratɔnŋ kwuru ki fɔn wuru kí ru. Yesu i kí bataa kene, ntiŋ i ɲinijɛ ri kwɔ po san koŋ mwɔɔnna nu. Ntiŋ i ncusun ɲinijɛ kiri i wulubi kì, sabu yìrì wuru ntiŋ tɔ-a.

Yesu wɔ Kirinŋ wɔ wulu bi ki Galile sɔɔta ki ru

³⁵ Sisarimantɔnŋ ki sun jona, Yesu i po tiri jaŋ fan, ntiŋ i ta Kirinŋ nafɛ.

³⁶ Simɔŋ fa a kaashi kiri i jɔrɔkɔ, kí i ta ntiŋ ceeli.

³⁷ Kí ta-i ntiŋ ja waarinŋ wɔ̀ ru, kí tu ntiŋ tɛ : « Konaŋ ki bataa i ábɛɛ ceeli-la. »

³⁸ Yesu tu kí tɛ : « Yi tiri tonfan kili kiri ra, míŋ kakan-i ŋí i ta Kirinŋ wɔ wulu ki sunjo niŋ mani kiri ru sɛbɛ, sabu míŋ cin ŋuŋ ki i niŋ i juniɲa ki ru. »

³⁹ Niŋ ɲaan ki tɛ, ntiŋ i tiri Kirinŋ wɔ wulu ki sunjo Galile sɔɔta ki mani ki bataa ru, Yawutu kiri wɔ kalinfu kiri ru, ntiŋ i ɲinijɛ kiri kwɔ po san konaŋ kiri ru.

Tuutiŋ bɛɛ kene bi ki Yesu gbɛ

⁴⁰ Tuutiŋ bɛɛ i na, ntiŋ i ta a kwushiri Yesu fɛ, ntiŋ i nafɛ tan tu : « Ŋuntiŋ, a ábɛɛ á tu, ábɛɛ ra so míŋ kene-i, á i nɔɔ ka san míŋ na. »

⁴¹ Tuutiŋ ki makwulu i Yesu pa, ntiŋ i a gbɛ bili wú sun, ntiŋ i ǹʼbi : « Míŋ ńʼtu-i, kene! »

⁴² Mìŋ manaanŋ tenŋ ki ru, tuu ki i san weŋ ki ra, wúwɔ nɔɔ ki i kɔ.

⁴³ Yesu i weŋ ki bo tiri, nka ntiŋ i ǹʼbi furu wú tɛ tu :

⁴⁴ « Ǹʼshɛɛli, fa nʼkene wulu ki bi koŋ tɛ kì, nka ta nʼyɛri ji Kirinŋ tɛ sarakawɔrɔtɔnŋ kiri ŋununtiŋ ki wu. Kirinŋ wɔ cintɔnŋ Musa saraka wɔ̀ wulu bi-i tuu kenemaan ki saraka ki i, ŋi i niŋ san, nwɔma ŋi i ǹʼji konaŋ ki bataa wu tu miŋ kene.  »

⁴⁵ Yesu a kaan-a, tu weŋ ki fa a kene wulu ki bi koŋ tɛ kì, niŋ fa a fɔn na, wú i ta niŋ bi kiri bataa sunjo de mani ki bataa ru, fɔ Yesu wuru so-a de-i kili tɔri tenŋ nu konaŋ kiri gbɛɛra kì. Ntiŋ wuru tu-a jaŋ ki fan nmaŋ. Konaŋ kiri i po-ri mani kiri bataa ru, kí ta-ri ntiŋ kila-ri nmaŋ.