Tiyako 1 - Deoso-ka Yama Hani

¹ Tiyako ama·oni. Deoso, ai‑ka Ayo Yeso Kirisito ne mai‑ka yama anini‑ya ani·oteni. Isara·eo‑ka nodi dai toha, mai tabori dami‑ya dai wi‑wina dai‑ka yama hani‑bone okanahanaboneni. Dai‑ya owati foyani.

Yama towe dai‑ya kobona dai ene‑ya Deoso kakatomatene

² Oka dai toha, yama amosara dai‑ya kobona, dai yawara, dai ya‑yainibisahi.

³ Deoso tabaro hawine‑ya ai yakana, yama nafi ai watora, yama ai‑ya kobona, ai‑ya kasomabone ai watowaha, ai habo siitora, Deoso ati ai nofi ba‑basi naboneni.

⁴ Deoso ati dai nofi ba‑basi na, dai ene amosawama, dai habo siitora, dai hawa toha‑nima dai na, yama one wadamarani.

⁵ Yama dai watora, Deoso dai hiyariya, Deoso ati ene yama dai watowahaboneni. Deoso‑ya yama wa‑wato dai haaniya, Deoso yawaterebona, yama‑ya daanebonane.

⁶ Deoso dai haana, “Oka yama‑bone‑ya Deoso daanebonane.” Dai atibodi ati nahi. “Oka yama‑bone‑ya daaneba awane yama‑ya daareba awane.” Dai atibodi ati riyahi. Yama hakikini ihi faha rikana, rike‑nima dai atibodi ati riyahi,

⁷ Faha rike‑nima mai atibodi ati na, yama‑ya mai atibodi koboni watora, mai‑ka yama‑bone‑ya Deoso daarebonane.

⁸ Mahi owa‑ya yama hakikini ihi faha rike kowani‑kaya toka, mahi owa‑ya ahini‑kaya kake, fara‑nima mai atibodi ati toha, mai atibodi‑nima mai ihi naboneni.

⁹ Deoso‑ka dai toha, yinero dai kihara, Deoso dai‑ya nofi nafi ene dai ya‑yainahi.

¹⁰ Yinero dame dai kiha, mai‑nima dai na, awa mowe amosa aba kanibote na‑nima dai abaharebone, dai ya‑yainasa nahi.

¹¹ Mahi kaki, hewene kite ene awa bono ade wayatona, mowe aba, sona, amosamaterani. Yama dama‑ya mai kiha, kabihi bara mowe‑nima mai teni. Yama‑ya mai anina, mai‑ka yinero damebona mai ati na, mai aba, mai‑ka yinero mai‑ya kasomarebonane.

¹² Dai ene‑ya Deoso kakatome, yama towe awi dai‑ya kobona, dai atibodi yawara, Deoso ati dai tokadabanasa na, Deoso dai‑ya kasomebonane. Makobote dai tati‑ya mai‑ka Hidi webote tati borone‑nima ne‑ya dai‑ya daanebonane. Dai tamine‑ya Deoso hiyare, “Owa‑ya mai nofa, owa tabaro‑ya mai winabisaboneni.” Deoso ati nematane.

¹³ Yama amosara‑ya dai atibodi nokotonihe, “Deoso ene amane, yama amosara‑ya owatibodi nokotonihero.” Dai ati riyahi. Deoso ene amose hinama tohe, ene towe wadare, ati ene ai ene towe tohaterani.

¹⁴ Ai atibodi bote yama amosara‑ya nokotoniteni. Ai‑ya keyeheteni, ati ai nofabonehe.

¹⁵ Ai atibodi bote ati‑ya ai nokotonihe, ai ene amosanadira, ai ababoneni.

¹⁶ Soho, dai onofa, dai atibodi bote keyehe‑ya dai‑ya hirikana, ati dai tokadabariyahi.

¹⁷ Deoso ene yama amosa ai kayafa, mahi, abariko, amowa mai na, mai‑ya wamane, ai wehene‑bone‑ya Deoso daanematane. Hibati‑ke‑nima ne, hibayata‑ke tohasa ne, fare‑nima tohatebonane.

¹⁸ Deoso ati ai nofi awisariya, ai‑ya kadike, Ati Amosabote ai nofawahe, hika ewe ai tohawaha, hika yama wamani‑ka hidi ai tohawahaboneni.

Deoso ati‑nima ai nahi

¹⁹ Oka dai toha, dai onofa, owati dai mitahi. Dai narabo hawihi. Dai ati yana kanibote rihi, dai yawa kanibote rihi nahi.

²⁰ Ai yawa, ai ene amosarani. Ai ene amosabone Deoso ati nemata, ai yawa, Deoso ati‑nima ai ni awirani.

²¹ Dai ene amosaramaro‑nima dai ene namariyahi. Dai ati yanana, dai ati amosahi. Mai ati towe, mai ati‑nima dai ati rihi, mai ihi towe, mai ihi‑nima dai ene rihi nahi. Deoso hini ati‑ya dai atibodi‑ya kanahanomata, ati dai nofe, tabaro‑ya dai winamakeboneni.

²² Deoso ati dai mite, ati dai tokadabaho. Ati dai mite, ati dai tokadabare, dai atibodi bote dai‑ya keyeheboneni.

²³ Deoso ati dai mite, ati dai tokadabare, isibiyo‑ya ai noko‑ya ai awa‑nima dai nineni.

²⁴ Isibiyo‑ya dai noko besene dai awa, dai toka, dai noko besene‑ya dai atibodi watomarani.

²⁵ Deoso Ati Amosabote ati dai mite, ati dai kadike, ati dai fawani awire, ati dai tokadaba ne, Satanasi dai‑ya yaditonamare, Deoso dai‑ya kasomebonane.

²⁶ Deoso ati tinofamone tina, tiwati tinawadi amosara, keyehe‑ya hiritineni. Deoso ati tinofamone tina, tiwatibodi ati tohara, tiwati honita tohani.

²⁷ Dai ene‑ya ai‑ka Abi i‑di Deoso nofebona dai ati na, haa‑nima dai ene nahi. Mai‑ka abi wadare mai dai kasoma, mai‑ka yibote aba, mai dai kasoma dai nahi. Deoso ati‑ya mai nofara mai ihi‑nima dai ene riyahi.