สีง ฑูง 27 - ฉบับอักษรลาว

ສີງ ດສູງ 27

ຕສ໊ຽວ ໂຕສ໋ວ ເຢຍ ເຍີຍ ອຈັງ ເຖສົາ ໂອຈ໋ວ ເຢຍ ວົ້ວ ເຕົ້າ

ດາ​ວິດ ໂຕສ່ ເຍີຍ ສີງ ດສູງ.

¹ ຕສ໊ຽວ ໂຕສ໋ວ ເຢຍ ເຍີຍ ອຈັງ ເຖສົາ ໂອຈ໋ວ ເຢຍ ວົ້ວ ເຕົ້າ, ເຢຍ ອ໋ອຍ ຕສຸ ກ້ຳ ເດສ໋ຍ ຫາຍ ເຕົ້າ? ຕສ໊ຽວ ເຊ ເຢຍ ເຍີຍ ແໝ່ງ ເຂົາ ວ້ວນ ເຍີຍ ຕ໋ອງ, ເຢຍ ອ໋ອຍ ຕສຸ ກ້ຳ ເດສ໋ຍ ຫາຍ ເຕົ້າ?

² ໂຕສ໋ວ ເອ໊າະ ເຍີຍ ມ່ຽນ ຕ້າຍ ຫ່ອຍ ເຢຍ, ອ໋ອຍ ຫຍັ່ນ ເຢຍ ເຍີຍ ອໍ໊ ເຍີຍ ຕສຢັ້ງ ໂຫ່, ເຊ ເຢຍ ເຍີຍ ວິນ-ຈາ ວິນ-ວັ້ງ ຕ້າຍ ວົ້ວ ຕສັ່ນ, ນິ່ນ ບົວ ອ໋ອຍ ດິ໊ ຕສຸ ດອບ.

³ ໄມ້ ກຸ໊ນ ມ່າຍ ຈຸນ-ແປງ ຕ້າຍ ເວີ່ຍ ກ໋ອມ ເຢຍ, ເຢຍ ເຍີຍ ໂຮຍ້ວ ໄມ້ ກ້ຳ ເດສ໋ຍ. ໄມ້ ກຸ໊ນ ຕສຸ ເບ໊າະ ຕົ້ມ ຈ໋າ, ເຢຍ ຖສໍ່ ເຂົາ ທິນ-ຮູ່ງ.

⁴ ເຢຍ ເຖງ ຕສ໊ຽວ ໂທ້ ດຸ ຫຍູ່ງ ຮນັ້ງ, ວົ້ວ ຫຍູ່ງ ເຢຍ ອ໋ອຍ ລໍ໌, ເຊ ເຢຍ ຢຽດ ລິ໌ວ ຢຽດ ເສີຍ ອ໋ອຍ ຢຽມ ຕສ໊ຽວ ເຍີຍ ເປຢົ໊າ, ຢຽມ ວົ້ວ ໝັ່ງ ຈ໊ຽນ ຕສ໊ຽວ ດົ່ງ ໜ່າຍ ຫລົງ ຢ່າ ຢຽມ ນິ່ນ ເຍີຍ ເປຢົ໊າ ໂຈ້ວ ນິ່ນ.

⁵ ເຢຍ ຕສຸ ໂຄ້ວ ເຍີຍ ຕສຢັ້ງ ໂຫ່ ນິ່ນ ອ໋ອຍ ເປວ ຈ໊ຽນ ເຢຍ ຢຽມ ນິ່ນ ກັ້ນ ເຍີຍ ຕ໋ອງ. ເຊ ເຕສ໊າະ ເຢຍ ປີ໋ງ ຈ໊ຽນ ຢຽມ ນິ່ນ ເຍີຍ ດົ໊ບ-ລິ່ວ ກະຍົ໌ວ, ນິ່ນ ອ໋ອຍ ເຕສ໊າະ ເຢຍ ອັນ ຈ໊ຽນ ຫລະເປຢີ໊ຍ-ຕສອງ ກູ້ ຫງວ່າຍ.

⁶ ອີ້ ຕສັ່ນ ເຢຍ ອ໋ອຍ ເທສົາ ເຈ໌ຍ ມອກ໊ອງ, ຢຽມ ເວີ່ຍ ກ໋ອມ ເຢຍ ວົ້ວ ເຕີ໋ຍ ວິນ-ວັ້ງ ກູ້ ຫງວ່າຍ. ເຢຍ ອ໋ອຍ ຢຽມ ທິນ-ຮູ່ງ ເຍີຍ ດົ໊ບ-ລິ່ວ ກະຍົ໌ວ, ອຈຽນ-ໂຢ້ວ ເຍີຍ ເຫ່ວ ຈ໊ຽນ ຝົ່ງ ຫໍ່ ເຕສ່ຍ. ເຢຍ ອ໋ອຍ ປ໋າວ ດສູງ, ອ໋ອຍ ປ໋າວ ດສູງ ເທສງ ຕສ໊ຽວ.

⁷ ໂອ ຕສ໊ຽວ ອ້າ! ເຢຍ ເຫ່ວ ເຍີຍ ຕສຢັ້ງ ໂຫ່ ໂທ້ ໝວັງ ເຢຍ, ໂທ້ ຄໍ້-ລ່ຽນ ເຢຍ, ຢ່າ ເຕົາ ເຢຍ.

⁸ ເມີ່ຍ ກ໊ອງ ບົ໋ວ ເຢຍ, “ຕ້າຍ ລໍ໌ ເຢຍ ມ່າະ!” ເຢຍ ເຍີຍ ໂຮຍ້ວ ກ໊ອງ ບົ໋ວ ເມີ່ຍ, “ ຕສ໊ຽວ ອ່າ, ເຢຍ ຕສະເກ້ງ ອ໋ອຍ ລໍ໌ ເມີ່ຍ.”

⁹ ໂທ້ ໄມ້ ຕູ໋ງ ປີ໋ງ ເມີ່ຍ ເຍີຍ ຮມຽນ ໄມ້ ໝັ່ງ ເຢຍ. ໄມ້ ຕູ໋ງ ເຖຈຍ ເຈ໌ຍ ຈ໊ຽນ ຕສຸ່ນ ເມີ່ຍ ເຍີຍ ໂປວ ເປຢົ໋າ ອກອຍ, ເຫວີ່ຍ ຕສຸ ເມີ່ຍ ມຕ້າຍ ໂຕສ໋ວ ເຖງ ເຢຍ ວົ້ວ ເຕົ້າ. ໂອ ເຢຍ ເຍີຍ ໂອຈ໋ວ ຕສ໊ຽວ, ທິນ-ຮູ່ງ ອ້າ! ໄມ້ ຕູ໋ງ ເລີ່ຍ ເຢຍ, ໄມ້ ຕູ໋ງ ກວັ່ງ ເຢຍ.

¹⁰ ເຢຍ ເຍີຍ ເຕ໋ຍ ໝ່າ ກວັ່ງ ເຢຍ, ມປ່າ ຕສ໊ຽວ ອ໋ອຍ ຕສິ໊ບ ເຢຍ.

¹¹ ໂອ ຕສ໊ຽວ ອ່າ, ໂທ້ ເມີ່ຍ ອຈ໋າວ ເຢຍ ຢັ້ງ ເມີ່ຍ ເຍີຍ ເຈົ໊າ, ຢ່າ ຕໍ້ ເຢຍ ກັນ ເຈົ໊າ-ແປ້ງ ມີ່ງ, ເຫວີ່ຍ ຕສຸ ເຢຍ ມ່າຍ ວິນ-ວັ້ງ ທສ້ຳ.

¹² ໂທ້ ເມີ່ຍ ໄມ້ ຕູ໋ງ ເຕສ໊າະ ເຢຍ ຈິວ ປຸນ ວິນ-ວັ້ງ. ໄມ້ ຕູ໋ງ ເຊວີ່ຍ ວິນ-ວັ້ງ ເຍີຍ ເອີ໋ຍ ໂຕສ໋ວ ປຸນ ເຢຍ. ເຫວີ່ຍ ຕສຸ ໂຕສ໋ວ ຈ໊າ ຕສອງ-ເຕສ໋ງ ເຍີຍ ມ່ຽນ ທສວດ ຕ້າຍ, ນິ່ນ ບົວ ກ໊ອງ ທສວດ ເຍີຍ ຫວ່າ ຫ່ອຍ ເຢຍ ໂຄ້ວ.

¹³ ເຢຍ ສຽນ ຕີ່ງ ເຢຍ ຖສໍ່ ຢຽມ ຢ້າງ ເກນ ເຍີຍ ຕສຢັ້ງ ໂຫ່, ເຢຍ ອ໋ອຍ ຕຸ໊ ປວັດ ຕສ໊ຽວ ໂຕສ໋ວ ຫລົງ.

¹⁴ ອ໋ອຍ ຕສຸ ຕສົ໊ວ ຕສ໊ຽວ, ອ໋ອຍ ຕສຸ ເຮ້ນ ຢ່າ ຕສູ໋ງ ຈ໊ຽນ ຕ໊າມ, ຕສູ໊ງ ອ໋ອຍ ຕສຸ ຕສົ໊ວ ຕສ໊ຽວ.