สีง ฑูง 137 - ฉบับอักษรลาว

ສີງ ດສູງ 137

ອິ​ສະ​ລາ​ເອນ ມ່ຽນ ຕສຸ ທສ້າງ ມີ່ງ ເຍີຍ ໜ່ານ ຕສີ້ງ ດສູງ

¹ ເຢຍ ບົວ ເຕສວີ໌ຍ ຈ໊ຽນ ບາ​ບີ​ລົນ ເຍີຍ ໂດ໊ະ-ເຮລນ, ຢ໊ຽດ ຈັ໋ງ ຕສຸ ສິ​ໂອນ ຕສ່ຽວ ຍ້ຽມ.

² ເຢຍ ບົວ ເຕສ໊າະ ເຢຍ ບົວ ເຍີຍ ຕ້ານ ປ້າ ຂວັງ ຈ໊ຽນ ຢຽມ ນ້າຍ ເຍີຍ ຊຸ້ຍ-ລ່ຽມ ດຢັ໋ງ,

³ ເຫວີ່ຍ ຕສຸ ທສ້າງ ເຢຍ ບົວ ຕ້າຍ ວົ້ວ ເຕີ໋ຍ ອ໋ອຍ ເຢຍ ບົວ ປ໋າວ ດສູງ, ຫ່ອຍ ເຢຍ ບົວ ວົ້ວ ເຕີ໋ຍ ອ໋ອຍ ເຢຍ ບົວ ເຖງ ນິ່ນ ບົວ ໂຕສ໋ວ ເໜົ່າ ຫຍິດ ຕສ່ຽວ ກ໊ອງ, “ປ໋າວ ຕິ້ວ ສິ​ໂອນ ເຍີຍ ດສູງ ປຸນ ເຢຍ ບົວ ໝວັງ ມ່າະ!”

⁴ ເຢຍ ບົວ ຢຽມ ກັ້ນ ຝີງ ມ່ຽນ ເຍີຍ ເຕີ່ຍ-ປູງ, ຮນັ້ງ ຫາຍ ນໍ ໄຮ່ ປ໋າວ ຕສ໊ຽວ ເຍີຍ ດສູງ?

⁵ ໂອ ເຢ​ລູ​ຊາ​ເລມ ອ້າ! ເຊ ກ໊ອງ ເຢຍ ຫລະຄຸ ເມີ່ຍ, ໂທ້ ປຸນ ເຢຍ ເຍີຍ ບຢ່າວ ເຈັ໊ຍ ປົ໌ວ ຫຮງົງ ມີ່ງ.

⁶ ເຊ ກ໊ອງ ເຢຍ ໄມ້ ຈັ໋ງ ເຢ​ລູ​ຊາ​ເລມ, ຢ່າ ໄມ້ ຝຸນ ເຢ​ລູ​ຊາ​ເລມ ເວີ່ຍ ປຸນ ເຢຍ ເກົ້າ ຕຸ໊ ອຈຽນ-ໂຢ້ວ ເຈ໋ຍ, ໂທ້ ປຸນ ເຢຍ ເຍີຍ ບຽດ ແນດ ຈ໊ຽນ ເຢຍ ເຍີຍ ດສຸ້ຍ ຕູ໌ງ.

⁷ ໂອ ຕສ໊ຽວ ອ່າ, ໂທ້ ຈັ໋ງ ເອ​ດົມ ມ່ຽນ ຮນັ້ງ ຫາຍ ນໍ ໂຕສ໋ວ. ເຢ​ລູ​ຊາ​ເລມ ບາງ ວົ້ວ ຮນອຍ ນິ່ນ ບົວ ກ໊ອງ, “ອ໋ອຍ ຕສຸ ປ່າຍ, ອ໋ອຍ ຕສຸ ປ່າຍ ອ໊ະ, ອ໋ອຍ ຕສຸ ແທສະ ເອຈ່ຍ ເຖົາ ກອນ-ໂດ໊ະ.”

⁸ ໂອ ບາ​ບີ​ລົນ ອ້າ! ເຫວີ່ຍ ເມີ່ຍ ໂຕສ໋ວ ປຸນ ເຢຍ ບົວ ເຍີຍ ສີ່, ຈ໊າວ ວິນ ປຸນ ເມີ່ຍ ວົ້ວ ເຕົ້າ ອ໋ອຍ ຕສຸ ອອນ-ເຫລາະ.

⁹ ເຕສ໊າະ ເມີ່ຍ ເຍີຍ ກູ້ ງວ໌າ-ໄຝ ແກວ໊ະ ຫລະເປຢີ໊ຍ ວົ້ວ ເຕົ້າ ຢ່າ ມ່າຍ ອອນ-ເຫລາະ ອ໊ະ.