ธ้วด อี​ยิบ 10 - ฉบับอักษรลาว

ຕະເປ໊ດ ຫຍູ່ງ ເຕສະ ໜ່ານ, ຈົ໊ບ-ເຫຍີ່ຍ ຟ້ານ

¹ ຕສ໊ຽວ ແອ໋ງ ກ໊ອງ ບົ໋ວ ໂມ​ເຊ, “ເມີ່ຍ ແອ໋ງ ມີ່ງ ລໍ໌ ຟາ​ໂລ. ເຢຍ ປຸນ ນິ່ນ ເຖສົາ ນິ່ນ ເຍີຍ ຈຽນ ໂຮຍ້ວ ແຫງ່ງ, ເຫວີ່ຍ ປຸນ ເຢຍ ຢຽມ ນິ່ນ ບົວ ບຸດົ໋ງ ໂຕສ໋ວ ນ້າຍ ເຕີ໋ຍ ບົວະ ຮ່ອງ ເຍີຍ ຈັ໋ງ-ໂຫ່,

² ເຫວີ່ຍ ປຸນ ເມີ່ຍ ບົວ ກ໊ອງ ບົ໋ວ ເມີ່ຍ ບົວ ເຍີຍ ຕອນ-ເຈວີ໊ຍ ຟຸນ-ຟະ ໝວັງ ເຢຍ ຮນັ້ງ ຫາຍ ນໍ ໂຕສ໋ວ ປຸນ ອີ​ຢິ໊ບ ມ່ຽນ, ລ່ຽມ ເຢຍ ຢຽມ ອີ​ຢິ໊ບ ມ່ຽນ ບຸດົ໋ງ ໂຕສ໋ວ ບົວະ ຮ່ອງ ເຍີຍ ຈັ໋ງ-ໂຫ່. ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ”

³ ໂມ​ເຊ ເຖສົາ ອາ​ລົນ ຕສ່ຽວ ມີ່ງ ກ໊ອງ ບົ໋ວ ຟາ​ໂລ, “ ຕສ໊ຽວ, ຮິບ​ລູ ມ່ຽນ ເຍີຍ ທິນ-ຮູ່ງ, ຮນັ້ງ ນ້າຍ ນໍ ກ໊ອງ, ‘ເມີ່ຍ ອ໋ອຍ ແຫງ່ງ ຈ໊ຽນ, ໄມ້ ຄັ້ງ ຢຽມ ເຢຍ ເຍີຍ ດສະຮມຽນ ຫຍ່ຽມ ກັ້ນ ໂຕສ໋ວ ໄຝ ດົ່ງ ຫາຍ ເລົ່າ? ປູ໋ງ ເຢຍ ເຍີຍ ແປະ ຝີງ ເຫວີ່ຍ ປຸນ ນິ່ນ ບົວ ມີ່ງ ຕສັ່ງ ເຢຍ ມ່າະ!

⁴ ເມີ່ຍ ໄມ້ ຄັ້ງ ປູ໋ງ ເຢຍ ເຍີຍ ແປະ ຝີງ ມີ່ງ ນໍ, ອຈັງ ຮນອຍ ເຢຍ ປຸນ ຈົ໊ບ-ເຫຍີ່ຍ ເປັຍ ເມີ່ຍ ເຍີຍ ກົ໊ວະ.

⁵ ຈົ໊ບ-ເຫຍີ່ຍ ອ໋ອຍ ເອຈ່ຍ ຕ້າຍ ຢຽມ ປວັ໊ງ ເດົາ-ເປີ້ຍ, ຕສູ໊ງ ໝັ່ງ ໄມ້ ປວັດ ເດົາ. ຕົ້ງ ເປາະ ເບ໊າະ ເຕສ່ງ ວົ້ວ ເຕີ໋ຍ ກະນ້າຍ, ຈົ໊ບ-ເຫຍີ່ຍ ອ໋ອຍ ຫຍັ່ນ ເຖົາ ເດສ່ງ. ລ່ຽມ ເຕສ່ງ ເອຈ່ຍ ເຍີຍ ດຢັ໋ງ, ຈົ໊ບ-ເຫຍີ່ຍ ຢ່າ ອ໋ອຍ ຫຍັ່ນ ອຈັງ ເດສ່ງ.

⁶ ຈົ໊ບ-ເຫຍີ່ຍ ອ໋ອຍ ເປັຍ ປວັ໊ງ ເມີ່ຍ ເຍີຍ ຕິ່ນ ເຖສົາ ເມີ່ຍ ເຍີຍ ຈຽນ ເຖສົາ ເມີ່ຍ ເຍີຍ ແປະ ຝີງ ເຍີຍ ເປຢົ໊າ. ເມີ່ຍ ບົວ ເຍີຍ ອົງ-ຖາຍ, ເມີ່ຍ ບົວ ເຍີຍ ເຕຍ ຕ້າຍ ຢຽມ ຈ໊ຽນ ນ້າຍ ລູ່ງ ເດ໊ຍ ເຖົາ ອີ້ ຕສັ່ນ ໄມ້ ປວັດ ເຈ໋ຍ ດົ່ງ ນ້າຍ ໂຄ້ວ.’” ກ໊ອງ ລິ໌ວ, ໂມ​ເຊ ບົວ ມີ່ງ ໝີ່ ອ໊ະ.

⁷ ຟາ​ໂລ ຮູ່ງ ເຍີຍ ຈຽນ ກ໊ອງ ບົ໋ວ ຟາ​ໂລ, “ນ້າຍ ເຕົ້າ ມ່ຽນ ອ໋ອຍ ຫ່ອຍ ບົວ ເຖົາ ຫາຍ ຕສັ່ນ? ປຸນ ນ້າຍ ເຕີ໋ຍ ມ່ຽນ ມີ່ງ ຕສັ່ງ ຕສ໊ຽວ, ນິ່ນ ບົວ ເຍີຍ ທິນ-ຮູ່ງ ອ໊ະ ມ່າະ! ເມີ່ຍ ເຕສັ໊ຍ ໄມ້ ຕຸ໊ ໄຟ? ບົວ ເຍີຍ ເຕີ່ຍ-ປູງ ຕສູ໊ງ ຫວ່າຍ ເດສ່ງ ອ໊ະ.”

⁸ ມ່ຽນ ແອ໋ງ ມີ່ງ ລໍ໌ ໂມ​ເຊ ເຖສົາ ອາ​ລົນ ດສ໋ວນ ເຖົາ ຟາ​ໂລ ຮູ່ງ ວົ້ວ. ຟາ​ໂລ ກ໊ອງ, “ເມີ່ຍ ບົວ ມີ່ງ ຕສັ່ງ ຕສ໊ຽວ ເມີ່ຍ ບົວ ເຍີຍ ທິນ-ຮູ່ງ ຕຸ໊ ເຍີຍ. ມປ່າ ຫາຍ ເຕົ້າ ເຖສົາ ຫາຍ ເຕົ້າ ມີ່ງ?”

⁹ ໂມ​ເຊ ເຕົາ, “ເຢຍ ບົວ ໂກ໋ ຫລຸນ ໂຮລ ໄຝ, ເຢຍ ບົວ ເຍີຍ ຕອນ, ເຊັຍ, ງົ່ງ ກວັ້ນ, ຢູ້ງ ກວັ້ນ ເຖສົາ ປະກີ ຢູ້ງ ກວັ້ນ ຢຽດ ຕສູ໊ງ ອ໋ອຍ ຕສຸ ມີ່ງ ເດສ່ງ ເຫວີ່ຍ ຕສຸ ເຖົາ ວົ້ວ ເຢຍ ບົວ ອ໋ອຍ ຕສຸ ໂຕສ໋ວ ນອມ ຢິ້ນ ໂຫ່ວ ຕສ໊ຽວ. ”

¹⁰ ຟາ​ໂລ ກ໊ອງ, “ເຊ ກ໊ອງ ເຢຍ ປຸນ ເມີ່ຍ ບົວ ເຖສົາ ເມີ່ຍ ບົວ ເຍີຍ ມເຊັຍ ຕອນ ເຖສົາ ຝຸຈ໊ວຍ ມີ່ງ ເດສ່ງ, ໂທ້ ຕສ໊ຽວ ເຖສົາ ເມີ່ຍ ບົວ ຢຽມ. ມປ່າ ເຢຍ ຮິ້ວ ຕຸ໊ ເມີ່ຍ ບົວ ຕ໊າ ກູ໊ ໄກວ໋ ເຍີຍ ຕສະເອີ໋ຍ.

¹¹ ເຢຍ ໄມ້ ປຸນ ມີ່ງ! ເຢຍ ຂູງ ປຸນ ມຈັ່ງ ຕອນ ມີ່ງ ຕສັ່ງ ຕສ໊ຽວ ຮນັ້ງ, ເຫວີ່ຍ ຕສຸ ເມີ່ຍ ບົວ ໂທ້ ເຍີຍ ເຊ ປຸນ ມຈັ່ງ ຕອນ ມີ່ງ.” ກ໊ອງ ລິ໌ວ ນ້າຍ ເຕີ໋ຍ ຫວ່າ, ໂມ​ເຊ ເຖສົາ ອາ​ລົນ ຢຽມ ຟາ​ໂລ ເຍີຍ ດສະຮມຽນ ຕສຸ ຕສຸ່ນ ທສວດ ໝີ່ ອ໊ະ.

¹² ຕສ໊ຽວ ກ໊ອງ ບົ໋ວ ໂມ​ເຊ, “ຊູງ ເມີ່ຍ ເຍີຍ ປົ໌ວ ເຈ໋ຍ ອີ​ຢິ໊ບ ເຕີ່ຍ-ປູງ ກູ້ ຫງວ່າຍ ປຸນ ຈົ໊ບ-ເຫຍີ່ຍ ຟ້ານ ປວັ໊ງ ເຕີ່ຍ-ປູງ ຫຍັ່ນ ເດສ່ງ ເປາະ ເບ໊າະ ເຕສ່ງ ເອຈ່ຍ ວົ້ວ ເຕີ໋ຍ ກະນ້າຍ.”

¹³ ໂມ​ເຊ ຕສ່ຽວ ຊູງ ປຢ໊າ-ບຢ່າ ເຈ໋ຍ ອີ​ຢິ໊ບ ເຕີ່ຍ-ປູງ ກູ້ ຫງວ່າຍ. ຕສ໊ຽວ ປຸນ ຕົງ ປູງ ແໝງ ເຍີຍ ດສຢ໋າວ ປ່ວນ ຢຽດ ຮນອຍ ຢຽດ ມ໌ວນ. ຕະເຫຍີ່ຍ ດອມ ດສຢ໋າວ ຕສ່ຽວ ປ່ວນ ຈ໊ຽນ ຈົ໊ບ-ເຫຍີ່ຍ ອຈຸ້ນໆ ເຍີຍ ເປັຍ ເຕີ່ຍ-ປູງ ອ໊ະ.

¹⁴ ຈົ໊ບ-ເຫຍີ່ຍ ຟາດໆ ເຍີຍ ເອຈ່ຍ ອີ​ຢິ໊ບ ເຕີ່ຍ-ປູງ. ຫາຍ ນອມ ຕ໋ອງ ຢ່າ ຈົ໊ບ-ເຫຍີ່ຍ ປວັ໊ງ ເດສ່ງ. ຕສິ້ນ ດ່າງ ໄມ້ ແກ້ງ ມ່າຍ ເຈ໋ຍ ຈົ໊ບ-ເຫຍີ່ຍ ດົ່ງ ນ້າຍ ທສ້ຳ. ອກະຮ້າ ຮີ້ງ ຢຽດ ລິ໌ວ ຢ່າ ໄມ້ ມ່າຍ.

¹⁵ ຈົ໊ບ-ເຫຍີ່ຍ ດຸຍ ດິບ ເດົາ-ເປີ້ຍ ຫຮມວັງ ເດສ່ງ. ເປາະ ເບ໊າະ ລິ໌ວ ເຕສ່ງ ເອຈ່ຍ ເຍີຍ ຫຍູ່ງໆ ກະນ້າຍ ຈົ໊ບ-ເຫຍີ່ຍ ຫຍັ່ນ ເດສ່ງ. ຢຽມ ເດີ່ຍ ເຍີຍ ແກງ-ຕສວັ໋ງ ກະນ້າຍ ເຖສົາ ຢຽມ ດຢັ໋ງ ເຍີຍ ປ໊ຽວ ຫຍັ່ນ ເດສ່ງ. ອີ​ຢິ໊ບ ເຕີ່ຍ-ປູງ ໄມ ມ່າຍ ຢຽດ ຄວ້າຍ ດຢັ໋ງ-ນ່ອມ ແມງ ໄຟ ຢຽດ ຕິ້ວ ເມ້ຍ-ແມງ ອ໊ະ.

¹⁶ ຟາ​ໂລ ຊຽບໆ ເຍີຍ ເຫ່ວ ໂມ​ເຊ ເຖສົາ ອາ​ລົນ ຕ້າຍ. ນິ່ນ ກ໊ອງ, “ເຢຍ ປ໌າມ ຕສຸ໌ຍ ຕ່ອງ ຕສ໊ຽວ ເມີ່ຍ ບົວ ເຍີຍ ທິນ-ຮູ່ງ, ຢ່າ ຕ່ອງ ເມີ່ຍ ບົວ.

¹⁷ ອີ້ ຕສັ່ນ ໂທ້ ແອ໋ງ ກວັ່ງ ດສຸ່ນ ເຢຍ ເຍີຍ ຕສຸ໌ຍ, ເຫວີ່ຍ ເຢຍ ເຕົ໋າ ເກົ໋າ ໂທ້ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຖງ ເຢຍ ຊິ້ມ ດຸ໊ດ ນ້າຍ ເຕີ໋ຍ ຫ່ອຍ ແໝ່ງ ເຍີຍ ຕົ້ມ ສີ່.”

¹⁸ ໂມ​ເຊ ຕສ່ຽວ ຢຽມ ຟາ​ໂລ ວົ້ວ ທສວດ. ນິ່ນ ມີ່ງ ເຕົ໋າ ເກົ໋າ ໂທ້ ຕສ໊ຽວ ເຖງ.

¹⁹ ຕສ໊ຽວ ຕສ່ຽວ ທິ້ວ ຕົງ ປູງ ດສຢ໋າວ ເປ໋ນ ໄຟ ປູງ ເຍີຍ ຕົ້ມ ດສຢ໋າວ ປ່ວນ ຕ້າຍ ຮລໍ້ ຈົ໊ບ-ເຫຍີ່ຍ ມີ່ງ ກວັ່ງ ວົ້ວ ຄ້ອຍ-ຊິ. ອີ​ຢິ໊ບ ເຕີ່ຍ-ປູງ ໄມ້ ເຕສ່ງ ຢຽດ ນອມ ຈົ໊ບ-ເຫຍີ່ຍ ອ໊ະ.

²⁰ ມປ່າ ຕສ໊ຽວ ປຸນ ຟາ​ໂລ ເຍີຍ ໂຮຍ້ວ ແຫງ່ງ, ໄມ້ ຄັ້ງ ປູ໋ງ ອິ​ສະ​ລາ​ເອນ ມ່ຽນ ມີ່ງ.

ຕະຈົ໊ວ ຫຍູ່ງ ເຕສະ ໜ່ານ, ເຕີ່ຍ-ປູງ ຫຮມວັງ

²¹ ຕສ໊ຽວ ແອ໋ງ ບົ໋ວ ໂມ​ເຊ, “ຊູງ ເຈ໌ຍ ເມີ່ຍ ເຍີຍ ປົ໌ວ ຕສຢັ໊ງ ລູ່ງ ເຫວີ່ຍ ປຸນ ຕສຢັ້ງ ນອມ ອີ​ຢິ໊ບ ເຕີ່ຍ-ປູງ ມັບ ແມ່ງ ມັບ ຫຮມວັງ ເຍີຍ, ຮນັ້ງ ຮລົວ ຕຸ໊ ໄຮ໌ ເຍີຍ ນໍ.”

²² ໂມ​ເຊ ຕສ່ຽວ ຊູງ ປົ໌ວ ຕສຢັ໊ງ ຈ໊ຽນ ລູ່ງ. ກ໋ອມ ອີ​ຢິ໊ບ ເຕີ່ຍ-ປູງ ຕສ່ຽວ ຫຮມວັງ ປົວ ຮນອຍ.

²³ ປົວ ຮນອຍ ກະຍົ໌ວ ນິ່ນ ບົວ ລ່ານ ໝັ່ງ ໄມ້ ປວັດ ລ່ານ ຢ່າ ໄມ້ ໄຮ່ ທສວດ ເປຢົ໊າ ມີ່ງ ຫາຍ ເດົາ. ມປ່າ ອິ​ສະ​ລາ​ເອນ ມ່ຽນ ຢຽມ ເຍີຍ ຕ໋ອງ ອຈັງ ເຍີຍ.

²⁴ ຟາ​ໂລ ປຸນ ມ່ຽນ ມີ່ງ ເຫ່ວ ໂມ​ເຊ ຕ້າຍ ຕສ່ຽວ ກ໊ອງ, “ເມີ່ຍ ບົວ ກຸ໊ນ ມີ່ງ ຕສັ່ງ ຕສ໊ຽວ ອ໊ະ. ລ່ຽມ ເມີ່ຍ ບົວ ເຍີຍ ມເຊັຍ ຕອນ ເຖສົາ ຝຸຈ໊ວຍ ມີ່ງ ຢ່າ ຕຸ໊. ມປ່າ ເມີ່ຍ ບົວ ເຍີຍ ງົ່ງ ກວັ້ນ, ຢູ້ງ ເຖສົາ ປະກີ ຢູ້ງ ກວັ້ນ ອ໋ອຍ ຕສຸ ຢຽມ ຈ໊ຽນ ນ້າຍ.”

²⁵ ໂມ​ເຊ ກ໊ອງ, “ເມີ່ຍ ຕສູ໊ງ ອ໋ອຍ ຕສຸ ປຸນ ເຢຍ ບົວ ມ່າຍ ປົ໊ວ ເຕສ່ຍ ເຍີຍ ເຖສົາ ຝົ່ງ ຫໍ່ ເຕສ່ຍ ເຍີຍ ແຊງ-ຄູ້ ປຸນ ເຢຍ ບົວ ເຕສ່ຍ ປຸນ ຕສ໊ຽວ, ເຢຍ ບົວ ເຍີຍ ທິນ-ຮູ່ງ.

²⁶ ເຢຍ ບົວ ເຍີຍ ແຊງ-ຄູ້ ຢຽດ ຕສູ໊ງ ຢ່າ ອ໋ອຍ ຕສຸ ຕໍ້ ມີ່ງ ເດສ່ງ. ລ່ຽມ ຢຽດ ນອມ ເຕີ້ຍ ຢ່າ ໄມ້ ລ່ຽວ. ເຢຍ ບົວ ອ໋ອຍ ຕສຸ ຢຽມ ແຊງ-ຄູ້ ກວັ້ນ ກິ໊ນ ທສວດ ເຕີ໋ຍ ຕສັ່ງ ຕສ໊ຽວ ເຢຍ ບົວ ເຍີຍ ທິນ-ຮູ່ງ, ມປ່າ ເຖົາ ວົ້ວ ຕສັ່ນ ຖສີງ ຕ້າຍ ຮິ້ວ ຕຸ໊ ຫລົ່ງ ຫາຍ ຫຍູ່ງ ເຕສ່ຍ ນິ່ນ.”

²⁷ ມປ່າ ຕສ໊ຽວ ປຸນ ຟາ​ໂລ ເຍີຍ ໂຮຍ້ວ ແຫງ່ງ, ໄມ້ ຄັ້ງ ປູ໋ງ ນິ່ນ ບົວ ທສວດ.

²⁸ ຟາ​ໂລ ກ໊ອງ ບົ໋ວ ໂມ​ເຊ, “ເປຢົ໋າ ອກອຍ ເຢຍ ມ່າະ! ໄຝ ຟິມ ອ໊ະ. ຢັ້ງ ນ້າຍ ເຈ໋ຍ ໄມ້ ຕູ໋ງ ປຸນ ເຢຍ ປວັດ ເມີ່ຍ. ຫາຍ ຮນອຍ ເມີ່ຍ ແອ໋ງ ປວັດ ເຢຍ ເຍີຍ ຮມຽນ, ເມີ່ຍ ຕສ່ຽວ ຕສຸ ໄຕ໋ ອ໊ະ.”

²⁹ ໂມ​ເຊ ກ໊ອງ, “ເມີ່ຍ ກ໊ອງ ຕຸ໊ ຫອບ ເຍີຍ. ເຢຍ ຕສູ໊ງ ໄມ້ ແອ໋ງ ຕ້າຍ ປວັດ ເມີ່ຍ ເຍີຍ ຮມຽນ ອ໊ະ.”