2 ฮู่ง โต้ว 20 - ฉบับอักษรลาว

ເຮ​ເຊ​ຄີ​ຢາ ປຸ໊ດ ແປ່ງ

¹ ຕ໋ອຍ ວົ້ວ ເຕີ໋ຍ ຕສຢັ້ງ ໂຫ່ ເຮ​ເຊ​ຄີ​ຢາ ປຸ໊ດ ແປ່ງ ໂຄ້ວ, ຄ້າ ເຕີ໋ຍ ໄຕ່ ໝີ່ ອ໊ະ. ອາ​ມອດ ເຍີຍ ຕອນ, ວົ້ວ ເຕົ້າ ໂຕ່ວ ຫວ່າ ມ່ຽນ, ອິ​ສະ​ຢາ, ມີ່ງ ໝັ່ງ ນິ່ນ ແອ໋ງ ກ໊ອງ ບົ໋ວ ນິ່ນ, “ ຕສ໊ຽວ ຮນັ້ງ ນ້າຍ ກ໊ອງ, ‘ເມີ່ຍ ອ໋ອຍ ຕສຸ ຫລິ່ວ ເລີ໌ຍ ຫຍູ່ງໆ ຊູງ ເຫວີ່ຍ ຕສຸ ເມີ່ຍ ຕສູ໊ງ ອ໋ອຍ ຕສຸ ໄຕ່. ເມີ່ຍ ໄມ້ ໄຮ່ ຫລົງ.’”

² ເຮ​ເຊ​ຄີ​ຢາ ຕສ່ຽວ ຮວິນ ຮມຽນ ມີ່ງ ອຈົ່ງ ວົ້ວ ປູງ ເຕົ໋າ ເກົ໋າ ກ໊ອງ ບົ໋ວ ຕສ໊ຽວ,

³ “ໂອ ຕສ໊ຽວ ອ່າ, ໂທ້ ເມີ່ຍ ຈັ໋ງ ຈ໊ຽນ ເຢຍ ຢຽມ ເມີ່ຍ ເຍີຍ ດສະຮມຽນ ຕສຽບ ຕສົ໊ວະ ເຍີຍ ກັນ ຫລົງ ເມີ່ຍ ຢ່າ ຕສິ໋ວ ເມີ່ຍ ໝັ່ງ ເຢຍ ໂຕສ໋ວ ຕຸ໊ ຫລົງ.” ເຮ​ເຊ​ຄີ​ຢາ ຕສ່ຽວ ຍ້ຽມ ຕຸ໊ ໂຮຍ້ວ ມຸນ ໄຫ່.

⁴ ອິ​ສະ​ຢາ ໄມ້ ແກ້ງ ຕຸ໊ ທສວດ ຮູ່ງ ຕິ່ນ ບຸດົ໋ງ ວົ້ວ ຄັງ ທີງ ວົ້ວ ຕສັ່ນ, ຕສ໊ຽວ ກ໊ອງ ບົ໋ວ ນິ່ນ,

⁵ “ອ໋ອຍ ຕສຸ ດສ໋ວນ ມີ່ງ ບົ໋ວ ເຢຍ ເຍີຍ ແປະ ຝີງ ເຍີຍ ເປຢີ໊ຍ ເຕສີ໊ຍ, ເຮ​ເຊ​ຄີ​ຢາ, ‘ ຕສ໊ຽວ, ເມີ່ຍ ເຍີຍ ອົງ-ຖາຍ, ດາ​ວິດ, ເຍີຍ ທິນ-ຮູ່ງ, ຮນັ້ງ ນ້າຍ ນໍ ກ໊ອງ, “ເຢຍ ໄຮ໌ ເມີ່ຍ ເຕົ໋າ ເກົ໋າ ເຍີຍ ຫວ່າ ຢ່າ ປວັດ ເມີ່ຍ ເຍີຍ ວວມ-ເໝວີ່ຍ. ເຢຍ ອ໋ອຍ ຕສໍ່ ຫລົງ ເມີ່ຍ. ແອ໋ງ ເຈ໋ຍ ມີ່ງ ເຖົາ ຕະຟາມ ຮນອຍ ເມີ່ຍ ຕຸ໊ ມີ່ງ ເປັຍ ຕສັ່ງ ຕສ໊ຽວ ເຍີຍ ເປຢົ໊າ.

⁶ ເຢຍ ແອ໋ງ ອ໋ອຍ ຈາ ປຸນ ເມີ່ຍ ຕສຢັ້ງ ຕສຽບ ຮມ໌ ຫຮຍັງ ຢ່າ ອ໋ອຍ ໂອຈ໋ວ ນ້າຍ ນອມ ຕສີ້ງ ເລີ່ຍ ດຸ໊ດ ອັດ​ຊີ​ເລຍ ຮູ່ງ ເຍີຍ ປົ໌ວ-ເດ໊ຍ. ເຫວີ່ຍ ເຢຍ ເຍີຍ ໂປວ, ດາ​ວິດ, ເຢຍ ອ໋ອຍ ເປວ ນ້າຍ ນອມ ຕສີ້ງ.”’”

⁷ ອິ​ສະ​ຢາ ກ໊ອງ, “ເຕສ໊າະ ເຕີ໋ຍ ງົ່ງ ຫຍໍ ປ໊ຽວ ຕ້າຍ.” ມ່ຽນ ຕສ່ຽວ ເຕສ໊າະ ຕ້າຍ ອົ໊ບ ເຮ​ເຊ​ຄີ​ຢາ ເຍີຍ ເຕສວີ້ຍ. ນິ່ນ ຕສ່ຽວ ຫລົງ ໝີ່ ອ໊ະ.

⁸ ເຮ​ເຊ​ຄີ​ຢາ ໜ່າຍ ອິ​ສະ​ຢາ, “ມ່າຍ ຫາຍ ຫຍູ່ງ ຈັ໋ງ-ໂຫ່ ປຸນ ທສີງ ຕສ໊ຽວ ອ໋ອຍ ຕສໍ່ ເຢຍ ຫລົງ, ເຖົາ ຕະຟາມ ຮນອຍ ເຢຍ ຕຸ໊ ມີ່ງ ຕສັ່ງ ຕສ໊ຽວ ເຍີຍ ເປຢົ໊າ?”

⁹ ອິ​ສະ​ຢາ ເຕົາ, “ນ້າຍ ເຊ ຕສ໊ຽວ ອ໋ອຍ ປຸນ ເມີ່ຍ ເຍີຍ ຈັ໋ງ-ໂຫ່ ເຫວີ່ຍ ປຸນ ທສີງ ຕສ໊ຽວ ອ໋ອຍ ເອີຍ ຈ໊ຽນ ນິ່ນ ແລ໌ງ ເຍີຍ ຫວ່າ ໂຕສ໋ວ. ເມີ່ຍ ອ໋ອຍ ຕົ້ງ ລິ່ນ ມີ່ງ ວົ້ວ ດ່າງ ຕສຽບ ຫວ່ວນ ເທີຍ ໄຟ ອ໋ອຍ ຕົ້ງ ລິ່ນ ດສ໋ວນ ອກະຮ້າ ອກາງ ຕສຽບ ຫວ່ວນ ເທີຍ?”

¹⁰ ເຮ​ເຊ​ຄີ​ຢາ ເຕົາ, “ຕົ້ງ ລິ່ນ ມີ່ງ ວົ້ວ ດ່າງ ຕສຽບ ຫວ່ວນ ເຊ ເກົ້າ ເຫ່. ເຢຍ ເກົ້າ ອ໋ອຍ ຕົ້ງ ລິ່ນ ດສ໋ວນ ອກະຮ້າ ຕສຽບ ຫວ່ວນ.”

¹¹ ໂຕ່ວ ຫວ່າ ມ່ຽນ, ອິ​ສະ​ຢາ, ຕສ່ຽວ ໂທ້ ຕສ໊ຽວ. ຕສ໊ຽວ ຕສ່ຽວ ປຸນ ຕົ້ງ ລິ່ນ ຢຽມ ອາ​ຫັດ ເຍີຍ ເທີຍ ຖຸຍ ດສ໋ວນ ນິ່ນ ເຈ໋ຍ ດ່າງ ເຍີຍ ຕສຽບ ຫວ່ວນ ເທີຍ.

ບາ​ບີ​ລົນ ມ່ຽນ ຕ້າຍ ໝັ່ງ ເຮ​ເຊ​ຄີ​ຢາ

¹² ຕ໋ອຍ ວົ້ວ ເຕີ໋ຍ ຕສຢັ້ງ ໂຫ່, ບາ​ລາ​ດັນ ເຍີຍ ຕອນ, ບາ​ບີ​ລົນ ກົ໊ວະ ເຍີຍ ຮູ່ງ, ເມ​ໂລ​ດັກ​ບາ​ລາ​ດັນ, ໄຮ໌ ກ໊ອງ ເຮ​ເຊ​ຄີ​ຢາ ປຸ໊ດ ແປ່ງ ຕສ່ຽວ ຝູງ ຝຽນ ເຖສົາ ຕສີ້ງ ເຫຍີ່ຍ ມີ່ງ ປຸນ ນິ່ນ.

¹³ ເຮ​ເຊ​ຄີ​ຢາ ຕສິ໊ບ ນ້າຍ ເຕີ໋ຍ ໂຕ່ວ ຝຽນ ມ່ຽນ ຢ່າ ປຸນ ນິ່ນ ບົວ ໝັ່ງ ນິ່ນ ຊຽວ ຈ໋າຍ ເຍີຍ ກະນ້າຍ ເຍີຍ ຕ໋ອງ ຢຽດ ຕສູ໊ງ ກະນ້າຍ. ເຊ ປຸນ ນິ່ນ ບົວ ໝັ່ງ ຈຽມ, ຍ່ານ, ຫລາບ ຫລິ່ວ, ຈ໋າຍ ໄຫ່ ເຍີຍ ໂຢ້ວ ເຖສົາ ນິ່ນ ເບ໊າະ ຈ໋າ ເຍີຍ ຫວົວະ ກິ່ນ, ຕົ້ງ ນິ່ນ ມ່າຍ ເຍີຍ ຫຍູ່ງໆ ຈ໋າຍ ເຍີຍ ກະນ້າຍ. ຢຽມ ນິ່ນ ເຍີຍ ຮູ່ງ ຕິ່ນ ເຖສົາ ຕສຢັ້ງ ນອມ ກົ໊ວະ ເຍີຍ ກະນ້າຍ. ໄມ້ ມ່າຍ ຢຽດ ຫຍູ່ງ ເຮ​ເຊ​ຄີ​ຢາ ໄມ້ ປຸນ ນິ່ນ ບົວ ປວັດ.

¹⁴ ໂຕ່ວ ຫວ່າ ມ່ຽນ, ອິ​ສະ​ຢາ, ໜ່າຍ ກ໋າ, “ນ້າຍ ເຕີ໋ຍ ມ່ຽນ ກ໊ອງ ຫາຍ ຫຍູ່ງ? ຢຽມ ຫາຍ ຕ້າຍ?” ເຮ​ເຊ​ຄີ​ຢາ ເຕົາ, “ນິ່ນ ບົວ ຢຽມ ໂກ ເຍີຍ ເຕີ່ຍ-ປູງ ຕ້າຍ, ເຊ ຢຽມ ບາ​ບີ​ລົນ ຕ້າຍ.”

¹⁵ ອິ​ສະ​ຢາ ໜ່າຍ, “ຢຽມ ເມີ່ຍ ເຍີຍ ຮູ່ງ ຕິ່ນ ນິ່ນ ບົວ ຕຸ໊ ປວັດ ຫາຍ ຫຍູ່ງ?” ເຮ​ເຊ​ຄີ​ຢາ ກ໊ອງ, “ຢຽມ ເຢຍ ເຍີຍ ຮູ່ງ ຕິ່ນ ນິ່ນ ບົວ ຕຸ໊ ປວັດ ຫຍູ່ງໆ. ເຢຍ ຈ໋າຍ ເຍີຍ ກະນ້າຍ ໄມ້ ມ່າຍ ຢຽດ ຫຍູ່ງ ເຢຍ ໄມ້ ປຸນ ນິ່ນ ບົວ ໝັ່ງ.”

¹⁶ ອິ​ສະ​ຢາ ກ໊ອງ ບົ໋ວ ເຮ​ເຊ​ຄີ​ຢາ, “ໝວັງ ຕສ໊ຽວ ເຍີຍ ຫວ່າ ມ່າະ!

¹⁷ ‘ຮນອຍ-ເຫຍັຍ ຕສູ໊ງ ອ໋ອຍ ເຖົາ. ຢຽມ ເມີ່ຍ ເຍີຍ ຮູ່ງ ຕິ່ນ ເຍີຍ ຢຽດ ຕສູ໊ງ ກະນ້າຍ ເຖສົາ ເມີ່ຍ ເຍີຍ ອົງ-ຖາຍ ຊຽວ ເຖົາ ອີ້ ຈ໋າ ຮນອຍ ເຍີຍ ກະນ້າຍ, ອ໋ອຍ ຕສຸ ທສ້າງ ມີ່ງ ເຖົາ ບາ​ບີ​ລົນ. ຢຽດ ຫຍູ່ງ ຢ່າ ໄມ້ ລ່ຽວ.’ ນ້າຍ ເຊ ຕສ໊ຽວ ກ໊ອງ ເຍີຍ ຫວ່າ.

¹⁸ ‘ມ່າຍ ເຕີ໋ຍ ຢຽມ ເມີ່ຍ ກັ້ນ ເຍີຍ ດສຢ໊າມ-ເຟີຍ ທສວດ ເຍີຍ ຕອນ-ເຈວີ໊ຍ ຟຸນ-ຟະ ຕສູ໊ງ ອ໋ອຍ ຕສຸ ກວ໊າດ ມີ່ງ ຢຽມ ບາ​ບີ​ລົນ ເຍີຍ ຮູ່ງ ຕິ່ນ ເປ໋ນ ຕສຸ ອິມ ໂຕ໊ ເຍີຍ ມ່ຽນ.’”

¹⁹ ເຮ​ເຊ​ຄີ​ຢາ ເຕົາ ອິ​ສະ​ຢາ, “ເມີ່ຍ ໂຕ່ວ ຕ້າຍ ນ້າຍ ໂຈ໋ວ ຕສ໊ຽວ ເຍີຍ ຫວ່າ ເຊ ຫລົງ ເຍີຍ.” ນິ່ນ ຮນັ້ງ ນ້າຍ ນໍ ກ໊ອງ ເຫວີ່ຍ ຕສຸ ນິ່ນ ຢຽມ ໂຮຍ້ວ ຮນ້ຳ, “ຕະຟ່ານ ເຢຍ ເຍີຍ ເສີຍ ເຕສີ໊ຍ ຖາຍ-ແປ້ງ ເຍີຍ, ໄມ້ ມ່າຍ ສີ່ ໄມ້ ເຕສີ໌ຍ?”

ເຮ​ເຊ​ຄີ​ຢາ ເຊດ ເມວີ໌ຍ ເຍີຍ ຮນອຍ-ເຫຍັຍ

²⁰ ເຮ​ເຊ​ຄີ​ຢາ ກຸ໊ນ ເຍີຍ ຕສຢັ້ງ ໂຫ່ ໂຕສ໋ວ ລິ໌ວ ເຕສ່ງ ເອຈ່ຍ ເຍີຍ ສີ່, ເຖສົາ ນິ່ນ ເຍີຍ ທຈະ ໂຕສ໋ວ ເຍີຍ ຢຽດ ຕສູ໊ງ, ເຖສົາ ນິ່ນ ເວດ ວວມ-ຕົ້ມ, ເວດ ວວມ-ເຈົ໊າ ກັນ ເດົາ-ເດ໊ຍ ມີ່ງ ປູ໋ງ ວວມ ເປັຍ ຕສີ້ງ ກະຍົ໌ວ ນ້າຍ ເຕີ໋ຍ ຢຽດ ຕສູ໊ງ ສີ່, ເຟ້ຍ ຈ໊ຽນ ຢູ​ດາ ຮູ່ງ ເຍີຍ ຮູ່ງ ໂຕ້ວ ຕານ.

²¹ ເຮ​ເຊ​ຄີ​ຢາ ເກວີຍ ເສີຍ ໝີ່ ອ໊ະ, ນິ່ນ ເຍີຍ ຕອນ, ມະ​ນັດ​ເສ, ດສິບ ຈ໊ຽນ ນິ່ນ ໂຕສ໋ວ ຮູ່ງ.