مَرقُس 7 - کتاب مقدس به زبان تالشی شمالیرسم و رسومِن و حُکمِن 1 فریسی فِرقه عُلما بعضی توراتی معلمون همراه که اورشلیمی شهری کا اومَه بینَه، عیسی دوری کا جمع آبینَه. 2 اَوِن ویندِشونَه که بعضی عیسی شاگِردِن نِجِسَه دَسون نَه، یعنی اَنَه شوره دَسی نَه، غذا بَردین. 3 چوم که فریسییِن و گِرده یهودییِن نی، شیخون رسم و رسومی مطابق، تا اِشتَن دَسون چاک مَشورِن، غذا نییَرِن. 4 وختی بازاری کا بومَین، تا بوشور آشور مَکَرِن چیی نییَرِن. و اِنتَه نی وِر دییَر رسم و روسومون نی اَنجام بَداین. قَدَره اون، پاتیله اون و مِرسی یَه قَبون و صندلی یون شوشتِه شیوار. 5 فریسی اِن و توراتی معلِمِن عیسی کا دَفَرسِشونَه: «چیرا اِشتِه شاگِردِن طبق شیخون رسم و رسوم رفتار نِکَرِن، و نِجِس دَسون نَه غذا بَردین؟» 6 عیسی جَواو دوشَه: «اِشعَیای پیغمبر شِمَه دِ دیمون درباره چِه چاک پیشگویی کَردِشه! هَتَه که نیویشته بییَه، «”اِم قوم اِشتَن زوونی نَه مِن حُرمت بَناین، امّا چَوون دیل بَه مِن کا دورَه. 7 اَوِن بیخودی مِن پرستش بَکَردین، اَوِن اِنسانی یَه حُکمون، خِدا اَحکامی عوض مردمی یاد بَداین.“ 8 شِمَه خِدا اَحکامی وِل آکَردَرونَه و دَچیکیستَه ایرونَه اِنسانی یَه رسم و رسومون.» 9 دومله عیسی واتِشه: «شِمَه زیرنگی نَه، خِدا حُکمی رَد آکَرَه تا شِمَه رسم و رسومی اَنجام بِدییَه! 10 چوم موسی پیغمبر واتِشه، ”اِشتِه دَده نَنه حُرمت بِکَه،“ و”هَر کسی اِشتَن دَده یا نَنه فَش بِده، بَسی کِشتَه بِبو.“ 11 امّا شِمَه بَواتیرون شخص بَشای اِشتَن دَده یا نَنه نَه بوآجِه: ”هَر کمکی که بَسی شِمَه را بِکَرِم، قِربون اِستَه - یعنی وقف خِدا -“ 12 و اِنتَه شِمَه نییَرزه که اَ، اِشتَن دَده یا نَنه را هیچ کاری بِکَرِه. 13 اِنتَه شِمَه، شِمَه رسم و رسومون نَه، که اَوون بقیه نَه نی بَواتیرون، خِدا کلامی باطل آکَرَه و اِنتَه رَه کارون وِر اَنجام بَدایرون.» 14 عیسی هَنی مردمی دَخوندِشه اِشتَن وَر و اَوون نَه واتِشه: «شِمَه گِرد، چِمِن گفی گوش بِدییَه و اِمی بِفهمه: 15 اِنسانی بِرونی کا هیچ چی نییَه که چَیی وجودی دیلَه دَشو و بِشا اَیی نِجِس آکَرِه، بَلکَم اَ چییونی که اِنسانی وجودی نَه بِرون بَران، اَیی نِجِس بَکَردین. 16 هَر کسی دَرَسَه گوش هِستِشَه، دَرَسِه!» 17 وختی عیسی مردمی وَری نَه شَه کَ، چَیی شاگِردِن اِم مَثَّلی معنی اَیی کا دَفَرسِشونَه. 18 عیسی واتِشه: «شِمَه نی حَلا درک نِکَرَه؟ مَگم نیمَزنَه که هر چیی که بِرونی نَه اِنسانی وجودی دیلَه دَشو، نیمَشا اَئی نِجِس آکَرِه؟ 19 چوم چَیی دیلی دیلَه نِدَشو، بَلکَم چَیی اِشکَمی دیلَه دَشو و دومله دَفع بَبی.» عیسی اِشتَن اِم گَفی نَه، گِرد غذا اون پاک اِعلام کَردِشه. 20 و عیسی واتِشه: «اَ چیی که اِنسانی وجودی کا بِرون بومَی، اَ اِستَه که اِنسانی نِجِس بَکَردی. 21 چوم اَ چیی که اِنسانی وجودی کا و اِنسانی دیلی کا بِرون بومَی اِمِنی نَه: پلیده فیکرِن، بی عفتی، دِزدی، قَتل، زِنا، 22 طَمع، شِرارت، حیلَّه، هَرزه بییِه، حَسودی، بُختون، غرور و اَخمق بییِه. 23 گِرد اِم بَدَه چیی اِن اِنسانی وجودی کا بِرون بومَین و اِنسانی نِجِس بَکَردین.» غیر یهودی یَه ژِنی ایمان 24 عیسی اوآ نَه اومَه بِرون و شَه صور و صِیدونی منطقه اون را. عیسی دَشَه ایلَه کَ ایی دیلَه؛ و نِپیستِشه کسی خَوَر دار بِبو که اَ اوآکا یَه. امّا هَنی نِشاستِشه اِشتَن نِین آکَرِه. 25 ایلَه ژِنی که چَیی روکَ کِلَه پلیدَه روح داری، وختی عیسی درباره دَرَسِشَه، اَلبَحَل اومَه و عیسی پا دَلَکه. 26 اَ ژِن غیر یهودی بَه و سوریه فینیقیه منطقه مَردمون کا بَه. اَ، عیسی مِنَّت کَردِشه که دیوی چَیی کِلَه کا بِرون بَرکَرِه. 27 عیسی اَیینه واتِشه: «بِدا اوّل خِردَنِن سیر آبون، چوم درست نییَه خِردَنون نونی ویگِری و اِسبَه اون ناری کا ویکَری.» 28 امّا اَ ژِن جَواو دوشَه: «بله، آقا، امّا حتی اِسبَه اِن نی اَ خورده تیکه اون کا که خِردَنون سِفره سَری کا ویبو، بَردین.» 29 عیسی اَیی نَه واتِشه: «اِشتِه اِم گفی واسی آگَرد بِش، دیو اِشتِه کِلَه کا بَرشَه!» 30 اَ ژِن شَه کَ، ویندِشه که خِردَن اِشتَن جِگا کا دِراز کَشَشه و دیو اَیی کا بَرشَه. عیسی ایلَه کَرَ مِردی شفا بَدای 31 دومله عیسی صوری منطقه کا آگَردَه و صِیدونی راه نَه جلیلی دریاچه طرفی را شَه. اَ، دِکاپولیسی منطقه کا دَوییَری. 32 اوآ کا ایلَه مِردی وَردِشونَه چَیی وَر که هَم کَر بَه و هَم جوت بَه. اَوِن عیسی مِنَّت کَردِشونَه اِشتَن دَسی چَیی سَر پِنَه. 33 عیسی، اَ مِردی جماعتی دیلَه نَه بِرون وَردِشه، و بَردِشه کَناری را و اِشتَن اَنگِشتون چَیی گوشون دیلَه کا نوشَه. دومله چاف ویکَردِشَه و اَ مِردی زوونی دَس آسوشَه. 34 اَ موقع آسِمونی دَیشتَه، آهی کَشِشه و اَ مِردی نَه واتِشه: «اِفَّتَح!» یعنی «آبو!» 35 هَ لحظه اَ مِردی گوشِن آبینَه و چَیی زوون نی آبَه و راحت گَف ژَندِشَه. 36 عیسی اَوون قَدغَن کَردِشه که اِم موضوع کسی نَه مَواجِن. ولی هَر چی وِرتَر اَوون قَدغَن کَری، وِرتَر اِم ماجرا کا گَف ژَنین. 37 مردم که وِر مات و مبهوت بینَه، بَواتین: «اَ، هَر کاری که کَردَشه، چاکَه؛ حتی کَرون گوشون و لالون زوونی آکَرِه!» |
@ 2024 Korpu Company