نامَه، عِبرانیه نَتاجَه مسیحیونرا 8 - کتاب مقدس به زبان تالشی شمالی

ایلَه چاکترَه عهدی کاهِن اعظم

¹ حِسَه اَصل مطلبی که اَمَه کارا بَواتیمون اِمَه که: اَمَه اِنتَه رَه یالَ کاهِنی هِستِمونَه که خِدای متعالی تختی راستَه دَسی طرفی کا، آسمونی دیلَه کا نِشتَه،

² مقدّس جِگااون خِدمتکار، اَ حقیقی یَه خیمۀ که خِداوند بَر پا کَردَشه، نِه اِنسان.

³ چوم که هَر یالَ کاهِنی تعیین بَبی تا هدیه اون و قِربونی یون تقدیم بِکَرِه، اِمی واسی، بَس اِم کاهِن نی بَسی ایی چیی بِدارِه تقدیم بِکَرِه.

⁴ حِسَه اَگم اَ زمینی کا مَندَه بِبی، هَرگز کاهِن نِبی، چوم دییَر کاهِنونی اِستینَه که طبق شریعتی حُکم هدیه اون تَقدیم بَکَردین.

⁵ اَوِن آسِمونی یَه چیون نمونه و سا خِدمت بَکَردین. چوم وختی که موسی پیستِش بَه خیمَه بَر پا بِکَرِه، خِدا اَیی حُکم کَردِشه و واتِشه: «اِشتِه هَواس جمع بِبو که گِردِ چیون مطابق نمونه‌ای وَج آکَری که کوه دیلَه کا بَه تِه نیشون دوعَه بَه.»

⁶ امّا حِسَه خدمتی که مسیح بِه دَس وَردَشه، اَ قدیمی یَه خدمَتی کا وِر کفاتَرَه، چوم عهدی که اَ، اَییرا واسطه گری بَکَردی چاکتَرَه، اَ عهدی که چاکتَرَه وعده‌ اون سَر بینا بییَه.

⁷ چوم اَگم اَ اوّلین عهد بی عِیب بِبی، دِ نیازی نِبی دوّمین عهدی دومله بِبییَم.

⁸ امّا خِدا اَوون کا عِیبی تِلفتِشَه و اَوون نَه واتِشه: «خِداوند بَواتی، حِسَه روزونی بومَین، که از اِسرائیلی خاندان و یهودا خاندانی نَه ایلَه تازه عهدی دَوِندِم.

⁹ نِه اَ عهدی شیوار که چَوون دَده اون نَه دَوَستَمَه، اَ روزی که چَوون دَسی گِتِمَه تا اَوون مِصری سرزمینی کا بِرون بواَرِم؛ چوم خِداوند بَواتی، اَوِن اَ عهدی سَر که مِنَه دَوستِشونَه نِمَندینَه. بَس، از چِمِن دیمی اَوون کا آگاردِنیمَه.

¹⁰ چوم که خِداوند بَواتی: اِمَه اَ عهدی که اَ روزون پَش اِسرائیلی خاندانی نَه دَوِندِم. چِمِن شریعتی چَوون فیکرون دیلَه کا بَنایم، و چَوون دیلون سَری کا بَنیویشتیم. و اَز چَوون خِدا بَبیم، و اَوِن چِمِن قوم بَبین.

¹¹ و هیچکسی اِشتَن خَمسوعه تعلیم نِدَه و هیچکسی اِشتَن بِرانَه نِواجِه، ”خِداوَندی آزون!“ چوم گِرد، یالی نَه تا روک مِن آزونِن؛

¹² چوم که اَز چَوون خَطا اون را رَحم بَکَردیم و چَوون گناه اون هَرگز دِ ویر نِورِم.»

¹³ خِدا ایلَه ’تازَه‘ عهدی درباره گف ژَندِه نَه، اَ اوّلین عهدی بی اِعتبار بَزنی؛ و اَ چیی که اِعتباری کا بَلَکه، کَنَه بَبی و آمادَه یَه که از بین بِشو.