نامَه، عِبرانیه نَتاجَه مسیحیونرا 12 - کتاب مقدس به زبان تالشی شمالیعسیی چَمَه ایمانی دومله کایَه و اَیی کامل آکَرِه 1 بَس چوم اِنتَه رَه شاهِدونی ایلَه یالَ خِری شیوار اَمَه دور آکَردَشونَه، بایَه اَمَه نی هَر بار و هَر گناهی که بَرک چَمَه دَس و پا کا دَپیچِستَه، اِشتَن کا دور آکَرَم و مقاومتی نَه اِم مسابقهای کا که چَمَه ناری کا نوعَه، بیرویجَم. 2 و چَمَه چِم فقط عیسی کا بِبو که چَمَه ایمانی پاکارَه و چَمَه ایمانی کامل آکَرِه، و اَ شادی واسی که چَیی ناری کا نوعَه بَه، صلیبی تاو وَردِشَه، چَیی خِفَت و خاری ندید گِتِشَه، و خِدا تختی راستَ دَسی طرفی کا نِشتَه. 3 چَیی فیکری بِکَرَه که چِنتَه گناه کارون دِشمنی ای که چَیی ضِد بَه تاو وَردِشَه، تا شِمَه خسته و دیلسرد مَبییَه. 4 شِمَه حَلا گناه ضِد جوری مقاومت نِکَرَه،که شِمَه خون ویبو. 5 مَگم اَ نصیحتی که اَمثال سلیمانی کیتابی دیلَه کا دَرییَه ویر بَرکَردَرونَه، که شِمَه نَه زوعَه اون شیوار گف ژَنِه؟ و بَواتی: «چِمِن زوعَه، خِداوَندی تربیتی خوار مَزون، و چَیی توبیخ کَردِه کا خسته مَبَش. 6 چوم خِداوند کسونی نَه که خِشَه تربیت بَکَردی، و هَر کسی که زوعَه ای را قبول بَکَردی، تنبیه بَکَردی.» 7 اِم، تربیت کَردِه واسی یَه که شِمَه بَسی تاو بواَره. خِدا شِمَه نَه زوعَه اون شیوار رَفتار بَکَردی.کَمیله زوعَه یَه که چَیی دَده اَیی تربیت کَردَش مَبو؟ 8 اَگم شِمَه تربیت مَبیرون، در حالی که گِرد اَیی کا سهم هِستِرونَه، بَس شِمَه حَرومزادَه ایرونَه، نِه حقیقی یَه زوعَه اِن. 9 چِمی غِیراز، اَمَه زَمینی یَه دَده اونی داریمون که اَمَه تربیت کَردِشونَه، و اَمَه اَوون اِحترام بَنایمون. یعنی نَبی وِرتَر چَمَه روحون دَده مُطیع بِبییَم تا زِندگی بِکَرَم؟ 10 چوم که اَوِن روکَتِه زمان بینا بَر اِشتَنشون مصلحَت، اَمَه تربیت کَردِشونَه. امّا خِدا چَمَه خِیریتی را اَمَه تَربیت بَکَردی تا چَیی قدّوسیتی دیلَه کا شَریک بِبَیم. 11 چوم اَ موقع که اَمَه تربیت بَبیمون، عوض اِمکه اَمَه خِش با اَمه داج بَگتی، امّا دومله کسونی را که چَیی واسطه نَه تربیت بَیینَه، صالِحی ثمری بواَردین که صُلح و سلامتی کا پُورَه. 12 بَس شِمَه دَسون که ضعیفی نَه راست آکَرَه و شِمَه بی قوّتَ زِنگون تقویت بِکَرَه! 13 شِمَه پااون را، راه اون هَموار بِکَرَه، تا شِلَه پا جیمَوَزِه، بَلکَم شفا بِگِرِه. 14 تَقَّلا بِکَرَه گِردِ مردمی نَه صُلح و سلامتی کا بِبییَه و مقدّس بِبییَه، چوم که بیدون قدّوسیت هیچکس خِداوَندی نِوینِه. 15 شِمَه هَواس جمع بِبو هیچکسی خِدا فیضی ویگِتِه کا شکست مَرِه، تا هیچ تِلَه بِنَه ایی مَپِرا و دردسری باعیث مَبو و وِر کسون نِجس آمَکَرَه. 16 تا هیچ کس عیسو شیوار بی عفت و نامقدس مَبو، اَ که ایی کاسه آشی را، اِشتَن اوّلین خِردَن بییِه حقی خِرَتِشه. 17 چوم که بَزنیرون، دومله که پیستِشَه اَ بَرَکتی بِه اِرث بِبَره، قبول نِبَه. هَر چَن اَ اِسرگ ویکَردِه نَه چَیی دومله بَه، ولی توبه را فرصتی پَیدا نِکَردِشه. 18 چوم که شِمَه ایلَه کوهی سَر اومَه نیرونَه که بِبو اَیی دَس ژَندِه، ایلَه کوهی که آتشی شعله اون دیلَه کا بِبو؛ نِه ظلمات و تاریکی و تِنده وا نَه؛ 19 و نِه شیپوری وانگی نَه و ایلَه خِلِع نَه که کسونی که دَرَسِشونَه مِنَّت کَردِشونَه که دِ اَوون نَه گف مَژَنِه. 20 چوم اَوِن نیمَشاین اَ حُکمی تاو بواَرین که بَواتی: «حتی اَگم ایلَه حیوونی اِم کوه دَس بِژَنِه، سِنگسار بِبو.» 21 راس راسی اِم صَحنه اِنتَه تَرسناک بَه که موسی واتِشه: «از تَرسی کا لَرزِم.» 22 ولی شِمَه صَهیونی کوه، و خِدای زِنده شهر، یعنی اومَیرونَه آسمونی یَه اورشلیمی دیلَه. شِمَه هَزارون هَزار گِله مَلائیکَه اون دیلَه کا که شادی بَکَردین اومَیرونَه، 23 و اوّلین زَندَه اون مجلسی دیلَه کا که چَوون نومِن آسِمونی کا نیویشتَه بییَه، و خِدایی که گِردی داوَرَه و صالِحون روحِن که کامل آبَیینه، 24 و عیسی که ایلَه تازه عهدی واسطه یَه، و اَ پِشَندَه خون، که هایبلی خونی کا چاکتَرَه، گَف ژَنِه. 25 شِمَه هَواس جمع بِبو، اَ کسی سَسی کا که کارا گَف ژَنِه، دیم آمَگاردِنَه. اَ کسونی که اَ کسی گفون دَرَسِه کا که زمینی کا گف ژَنی دیم آگاردِنیشونَه، نِشاستِشونَه مجازاتی کا دَوِزِن. بَس اَگم اَمَه اَ کسی که آسِمونی کا گف ژَنِه دیم آگاردِنَم، چِنتَه مجازاتی کا دَوَزَم؟ 26 اَ زمانی کا، چَیی سَس زَمینی لَرزَه دَرَفَندِشَه، امّا حِسَه اَ وعده دوعَشَه که «ایی کَرَه هَنی نِه فقط زَمینی، بَلکَم آسِمونی نی لَرزَه دَرَفَنِم.» 27 اَ کلمه ’ایی کَرَه هَنی‘ منظورِش اِمَه که، اَ چییونی که لَرزِن از بِین بَشین- یعنی اَ چیونی که خَلق بَیینه- تا اَ چیونی که نِبو اَوون لَرزوندِه، باقی بومونِن. 28 بَس بایَه اَ پاُتشایی بِه دَس وَردِه واسی که نِبو اَیی لَرزوندِه، شُکر بِکَرَم. و اِنتَه ایلَه پرستش قابل قبول تقدیم خِدا بِکَرَم که اِحترم و تَرسی نَه بِبو، 29 چوم که چَمَه خِدا «آتشی شیوارَه که سونِه.» |
@ 2024 Korpu Company