نامَه، عِبرانیه نَتاجَه مسیحیونرا 10 - کتاب مقدس به زبان تالشی شمالیمسیح قربونی بییِه همیشه را 1 چوم شریعت فقط آیندَه چاکَه چیون سا یَه، و نِه چَوون واقعی یَه شکل. اِمی واسی، هَرگز نیمَشا اَ قربونیونی نَه که هَر سال دائِم تقدیم بَبی، کسونی که پرستشی را نِزدیک بومَین، کامل آکَرِه. 2 اَگم نِه مَگم چَوون قِربونی کَردِه قطع نِبی؟ چوم اِنتَه، کسونی که پرستش بَکَردین ایی کَرَه پاک بَبین و چَیی پَش دِ اِشتَن گناهکار نیمَزنین. 3 امّا اَ قربونییِن هَر سال گناه اون ویر بواَردین، 4 چیرا که ممکن نییَه وَرزا اون و بِزّون خون، گناه اون از بِین بِبَره. 5 اِمی واسی، وختی که مَسیح اومَه دنیا دیلَه، واتِشه: «تِه قِربونی و هدیه نِپیستِرَه، بَلکَم ایلَه بَدنی بَه مِرا فراهم کَردِرَه. 6 تِه اِمی کا کیف نِکَری که تمام سوجَه قِربونیون و گناه قِربونیون بَه تِرا بواَردین. 7 بَس واتِمَه: ”دَیِس! اَز بومَیم، تا اِشتِه اِرادَه، اِی خِدا اَنجام بِدم؛ هَتَه که طوماری کیتابی کا چِمِن درباره نیویشتَه بییَه.“» 8 اوّل اَ بَواتی: «تِه قِربونی و هدیه، تمام سوجَه قِربونیون و گناه قِربونیون نِپیستِرَه و اَوون کا کیف نِکَردِرَه»، هَر چَن که اَوِن طبق شریعت تقدیم بَبین. 9 دومله بَواتی: «دَیِس! اَز بومَیم تا اِشتِه پیستَه اَنجام بِدَم.» اَ، اوّلی باطل آکَرِه تا دوّمی بَرقَرار بِکَرِه. 10 اَمَه عیسایِ مسیح بَدنی قِربونی کَردِه واسطه نَه، ایی کَرَه همیشه را، چَیی را وقف بیمونَه. 11 هَر کاهِن، هَر روز خدمَت کَردِه را پِرِزِه و هَ قربونیونی که هَرگز نیمَشان گناه اون از بِین بِبَرِن، دائِم تقدیم بَکَردین. 12 امّا بعد از اِمکه مسیح ایلَه قِربونی همیشه را گناه اون واسی تَقدیم کَردِشه، خِدا راست دَسی طرفی کا نِشتَه. 13 اَ موقع نَه، چِم بِرایَه که چَیی دِشمنِن چَیی پا جیری کا دَلَکِن. 14 چوم ایلَه قِربونی نَه،کسونی که وقف بَبین تا اَبَد کامل کَردَشه. 15 روح القدس نی اَمَه را ایلَه شهادتی آدَه. اوّل بَواتی: 16 «خِداوند بَواتی، اِم اَ عهدی یَه که اَ روزونَ پَش اَوون نَه دَوَسِم. چِمِن شریعتی چَوون دیلون دیلَه کا بَنایم، و چَوون فیکرون دیلَه کا بَنیویشتیم.» 17 دومله بَواتی: «چَوون گناه اون و شَرورَه کارون دِ هرگز ویر نِوَرِم.» 18 اوآ که اِمِن بَخشِستَه بِبون، دِ گناه را قِربونی تقدیم کَردِه اِحتیاج نییَه. کاملَ ایمان 19 بَس اِی بِرااِن، اِمی واسی که خاطر جَمیمونَه که عیسی خونی واسطه نَه بَشایمون دَشییَم قدس الاقداسی دیلَه، 20 ایلَه تازه و زِنده راه واسطه نَه، که اَ، اَ پَردَه میانه نَه، یعنی چَیی بَدن، چَمَه دیمی کا آکَردِشَه، 21 و اِمی واسی که ایلَه یالَ کاهِنی خِدا کَ کا هِستِمونَه، 22 بایَه صِدق دیلی نَه و کاملَه ایمانی نَه بِه خِدا نِزدیک آبییَم، و چَمَه دیلون بَدَه وِجدانی کا پاک آکَرَم و چَمَه بَدنی پاکَ آوی نَه بوشورَم. 23 بایَه بیدون شک، اَ اُمیدی که بَیی اِعتراف بَکَردیمون مُحکم دَچیکَم، چوم اَ که وعده دوعَشَه وفادارَه. 24 بایَه اِم فیکری کا بِبییَم که چِنتَه یَندی تشویق بِکَرَم تا محبت بِکَرَم و چاکَه کارون اَنجام بِدییَم. 25 یَندی نَه جمع آبییِه کا دَس مَپِگِرَم، هَتَه که بَعضیون را عادت بییَه، بَلکَم یَندی وِرتَر تَشویق بِکَرَم- مخصوصاً حِسَه که بَویندیرون اَ روز یعنی خِداوند عیسی آگَردِستِه روز، هِی نِزدیکتَر بَبی. 26 چوم اَگم حقیقتی آزونستِه پَش، عمداً هِی گناه بِکَرَم، دِ هیچ قِربونی گناه اون را باقی نِمونِه؛ 27 ولی اَ چیی که باقی بَمَندی، تَرسی نَه منتظر بییِه، مجازات و ایلَه بَرکَ آتشی که خِدا دِشمَنون ویبَره. 28 هَر کسی که موسی شریعتی رَد آکَری، دِ یا سِه گِله شاهدی شهادتی نَه، بی رحمی نَه کِشتَه بَبی. 29 شِمَه خَیال بَکَردیرون اَ کسی حق که خِدا زوعَه پا جیر بِنَه، و اَ عهدی خون که اَیی را وقف بییَه بی حُرمت کَردَشَه، و فیضی روح بی عزّت کَردشَه، چِه چَتین تَرَه مجازاتی چَیی سَر بومَی؟ 30 چوم اَمَه اَ کسی که اِمی واتَشه آزونَم: «قِصاص چِمِن شِنَه؛ اَز سِزا بَدایم.» و هِنتَه نی واتَشه: «خِداوند اِشتَن قومی داوری بَکَردی.» 31 ها، خدای زِنده دَس دَلَکِه چَدَه تَرسناکه. 32 ولی اَ قدیمَ روزون ویر بواَرَه، اَ زمانی که تازَه نورانی بَه بیرونَه؛ شِمَه ایلَه چَتینَ مبارزَه کا عذابی نَه تاو وَردِرونَه. 33 بعضی موقع گِردی چِمی پیشی کا فَش هَریرون و عذاب کَشیرون و بعضی موقع کسونی نَه دوش بِه دوش مَندیرون که اَوون نَه اِنتَه رفتار بَبی. 34 چوم شِمَه کسونی نَه که زِندانی بینَه، هَمدردی بَکَردیرون و اَ موقع که شِمَه مال و مَنالی غارت کَردِشونَه، شادی نَه قبول بَکَردیرون. چوم بَزنیرون که شِمَه اِشتَن ایلَه چاکتَرَه مال و مَنالی صاحیبیرونَه که تا اَبَد بَمَندی. 35 بَس شِمَه اِطمینانی کا دَس مَپِگِرَه، که ایلَه یالَه پاداشی چَیی دومله کایَه. 36 چوم که شِمَه اِحتیاج دارَه تاو بواَرَه، تا اَ موقع که خِدا پیستَه اَنجام بِدییَه، اَ چیی که وعده دوعَه بَه، بِه دَس بواَرَه. 37 چوم، «تِلی پَش، اَ کسی که بَسی با، بومَی، و عَری آنِکَرِه. 38 امّا چِمِن صالِحَ آدَم، ایمانی نَه زِندگی بَکَردی. و اَگم بَه مِن کا دیم آگاردِنِه، چِمِن جان اَیی کا راضی نییَب.» 39 امّا اَمَه کَسونی کا نیمونَه که آگردِن و هَلاک بَبین، بَلکَم کسونی کا ایمونَه که ایمان هِستِشونَه و اِشتَن جانی حفظ بَکَردین. |
@ 2024 Korpu Company