دِوُّمین نامَه تیموتائوسیرا 3 - کتاب مقدس به زبان تالشی شمالیآخِرین روزِن 1 ولی اِمی بِزون که آخِرین روزون کا، چَتینَ روزگاری بَبی. 2 چوم مردم خودپرست، پولدوس، مغرور، متکبر، فَشَ دَه، اِشتَن دَده نَنه کا اِطاعت نِکَرِن، ناشُکور، ناپاک، 3 بی عاطفه، کینَه ای، بُختون ژَن، بی بندوبار، وحشی، چاکی دِشمِن، 4 خیانت کار، بی ملاحظه، و غرور اَوون بَگتی که عیاشی نَه خِدا کا وِرتَر خِش بَبین، 5 ظاهری دیندار، ولی چَیی قدرتی هاشا بَکَردین. اِنتَه رَه آدَمون کا دوری بِکَه. 6 چوم که چَوون دیلَه کا کسونی اِستینه که مردمی کَ دیلَه کا رَخنَه بَکَردین، سَرسبُکَ ژِنکون اَسیر بَکَردین، ژِنَکونی که اِشتَن گناه اون باری جیری کا شَت آبَیینه و جور بَه جوره هَوَسِن اَوون بَبَردین هَر طرفی را. 7 اِم ژِنَکِن هَمیشه تعلیم بَگتین، ولی هَرگز نیمَشان حقیقتی آزونِن. 8 هَتَه که یَنّیس و یَمْبْریس موسی نَه مخالفت کَردِشونه، اِم مِردَکِن نی حقیقتی نَه مخالفت بَکَردین، که چَوون فیکرِن بَدی نَه و چَوون ایمان رَدَّه. 9 امّا کار بِه جِایی نِبَرِن، چوم که چَوون نادونی گِردِ مردمی را آشکار بَبی، هَتَه که اَ دِ نفری نادونی نی عیان آبَه. گِردِ مقدّس نیویشته اِن خِدا الهامی نَه 10 ولی تِه چِمِن تعلیم، چِمِن رَفتار، چِمِن هدف، چِمِن ایمان، چِمِن صَبر، چِمِن مُحبت و چِمِن طاقتی نِزدیکی نَه شاهِد بیشَه، 11 و اَ رنج و اَذیت آزارونی که اَنطاکیه، قونیه و لِسترَه شَهرون کا چِمِن سَر اومَه و رنج و اَذیت آزارونی که تاو وَردَمه، امّا خِداوند چَوون گِردی کا مِن نجات دوشَه. 12 راس راسی، کَسونی که پیستِشونَه مسیحْ عیسی کا دینداری نَه زِندگی بِکَرِن، عذاب کَشِن؛ 13 امّا شرورَه آدَمِن و حُقَه بازِن بَدی کَردِه کا بدتَر بَبین؛ گول ژَنِن و گول بَردین. 14 امّا تِه اَ چیی کا که آموتَه رَه و بَیی ایمان وَردَره پابَرجا بِبَش، چیرا که بَزنیش اَوون کییون کا آموتَرَه، 15 و چِنتَه خِردَنتی کا مقدّس نیوشته اون بَزنیش، که بَشای بَه تِن حکمت باموجِه و اَ ایمانی واسطه نَه که مسیحْ عیسی کا یَه، نجاتی را آرِساوونه. 16 گِردِ مقدّس نیوشته اِن خِدا الهامی نَه و تعلیم و توبیخ و اِصلاح و تربیتی واسی صالِحی کا فایده هِستِشَه، 17 تا مِرد خِدا کامل بِبو، و هَر چاکَه کاری را آمادَه. |
@ 2024 Korpu Company