دوومین نامه قرنتیانیرا 4 - کتاب مقدس به زبان تالشی شمالی

اِنجیلی نور

¹ بَس چوم اَ، رَحتمی واسی که اَمَه را بَه اِنتَه رَه خِدمتی بَکَردیمون، نا اُمید آنِبییَم.

² بَلکَم نِینَکی راه اون کا و شرم آوَرَه راه اون کا دوری کَردَمونه و کلاهبرداری نَه ناری را نِشییَم و خِدا کلامی دَستکاری نِکَرَم بَلکَم حَقیقَتی واضِح بَواتیمون، تقّلا بَکَردیمون خِدا حضوری کا گِردی وجدانی کا تصدیق بِبییَم.

³ حتی اَگم چَمَه اِنجیل نامفهومَه، کسونی را نامفهومَه که هَلاکتی راه کااینه.

⁴ اِم دورَه خِدا، بی ایمانون فیکری کور کَردَشه تا مسیح اِنجیلی جلالی نوری که خِدا دیمَه، مَوینِن.

⁵ چوم که اَمَه چَمَه را موعظه نِکَرَم، بَلکَم اِعلام بَکَردیمون که عیسایِ مسیح خِداوندَه، و اِشتَن کا فقط عیسی واسی، و اَ نی فقط شِمَه خِدمتکارون شیوار گَف ژَنَم.

⁶ چوم هَ خِدایی که واتِشَه: «نور تاریکی دیلَه کا دَتاوِه،» اِشتَن نوری چَمَه دیلون کا دَتاوِستِشه تا خِدا جلالی آزونِستِه نَه مسیح دیمی کا، اَمَه نورانی آکَرِه.

⁷ امّا اِم گنجینه، سُفالی یَه خُمرَه دیلَه کا هستِمونَه، تا معلوم بِبو که اِم بَرکَ قدرت خِدا کایَه نِه اَمَه کا.

⁸ اَمَه هَر طَرفی نَه سختی کا ایمونه، امّا خورد آبَه نیمونه؛ سَرگردونیمونه، امّا نا اُمید نیمونَه؛

⁹ اَذیت آزار بَبیمون، امّا اَمَه وِل آکَردَه نیشَه؛ زمینی سَر بَلَکَه ایمونَه، امّا کَم وَردَه نیمونه.

¹⁰ هَمَش عیسی مَرگی چَمَه بَدنی کا بَبَردیمون تا عیسی زِندگی نی چَمَه بَدنی کا آشکار آبو.

¹¹ چوم اَمَه که زِندَه ایمونه، هَمَش عیسی واسی دَسپَردَه بَبیمون مرگی، تا چَیی زِندگی چَمَه فانی یَه بَدنی کا آشکار آبو.

¹² بَس مرگ چَمَه دیلَه کا کار بَکَردی، امّا زِندگی شِمَه دیلَه کا.

¹³ مزموری کیتابی کا نیویشته بییَه که: «ایمان وَردِمَه، بَس گَف ژَندِمَه.» هِم ایمانی روح نَه، اَمَه نی ایمان هِستِمونه و گَف ژَنَم.

¹⁴ چوم بَزنیمون اَ کسی که عیسایِ خِداوندی مَردَه اون دیلَه کا زِنده آکَردِشه، اَمَه نی عیسی نَه زِنده آکَردَشَه، و شِمَه نَه بواَردی چَیی حضور.

¹⁵ اِمِن گِرد شِمَه واسی اِستینَه، تا هَر چَدَه که خِدا فیض مردمی سَری کا وِرتَر و وِرتَر آبو، شُکرکَردِه نی خِدا جلالی را وِرتَر آبو.

¹⁶ بَس نا اُمید نِبییَم. هَر چَن چَمَه ظاهر کارا از بِین بَشی، چَمَه باطن روز‌ بَه‌ روز تازَه تَر آبو.

¹⁷ چوم که چَمَه اِم روک و زو دَوییَرِن رَنجِن، اَمَه را اَبَدی یَه جلال بواَردی که اَ رَنجون نَه بَرابری نِکَرِه.

¹⁸ بَس اَ چی که بَبی ویندِه نِدییَسَم، بَلکَم اَ چیی که نییَب ویندِه ذول ژَنَم، چوم ویندَنییَه چیین زو دَوییَرِن، امّا چیی اِنی که نییَب ویندِه اَبَدی اینه.