دوومین نامه قرنتیانیرا 13 - کتاب مقدس به زبان تالشی شمالی

آخِرین اِخطارِن

¹ اِم سوّمین کَرَه یَه که شِمَه ویندِه را بومَیم. «هَر گَفی که ژَندَه بَبی، دِ یا سِه گِلَه شاهدی نَه ثابت بَبی.»

² از دوّمین کَرَه که اوآ کا بیمَه، کسونی که پیشتری گناه کَردَشون بَه، و اَلباقی نی اِخطار دوعَم بَه و حِسَه نی که اوآکا نیمَه هَنی اِخطار بَدایم که اَگم هَنی بام شِمَه وَر، اَوون رَحم نِکَرِم.

³ چوم که شِمَه ایلَه دلیلی دومله گَردَه که ثابت بِکَرَه مسیح چِمِن واسطه نَه گف ژَنه. مسیح شِمَه پیشی کا ضَعیف نییَه، بَلکَم شِمَه دیلَه کا قوی یَه.

⁴ چوم هَر چَن که اَ، ضَعفی کا مصلوب بَه، امّا خِدا قدرَتی نَه کارا زِندگی بَکَردی. چوم که اَمَه نی اَیی کا ضَعیفیمونَه، امّا شِمَه پیشی کا اَیی نَه، خِدا قدرتی نَه زِندگی بَکَردیمون.

⁵ اِشتَن مَحَک بِژَنَه، تا بِوینه که ایمان هِستِرونه یا نِه. اِشتَن آزمایش بِکَرَه. یا مَگم اِمی نِفهمَه که عیسایِ مسیح شِمَه دیلَه کا یَه؟ مَگم اِم که اِم آزمایشی کا رُفوزَه آبییَه!

⁶ اُمید هِستِمَه اِمی بِفَهمَه که اَمَه اِم آزمایشی کا رُفوزَه آبَه نیمونه.

⁷ ولی اَمَه خِدا درگاه کا دعا بَکَردیمون که خَطا مَکَرَه؛ نِه اِمی واسی که معلوم بِبو اَمَه اِم آزمایشی کا سَربِلند بِرون اومَیمونه، بَلکَم شِمَه اَ چیی که دُرستَه اَنجام بِدییَه، حتی اَگم اِنتَه نیشون بِدَه که اَمَه رُفوزَه آبَییمونه.

⁸ چوم که اَمَه نیمَشایَم حقیقتی ضِد هیچ کاری اَنجام بِدییَم، بَلکَم هَر کاری بَکَردیمون حقیقتی رایَه.

⁹ چوم هَر وخت که اَمَه ضَعیف بِبییَم و شِمَه قوی، اِم چَمَه شادی باعیث بَبی، و چَمَه دعا اِمَه که شِمَه هَنی قوت بِگِرَه.

¹⁰ اِمی واسی، اَز اِم چییون وختی که شِمَه وَری کا نیمَه شِمَه را نیویسِم تا وختی که اومیمَه شِمَه وَر، مجبور مَبوم چِمِن اِقتداری نَه تِندی نَه رفتار بِکَرِم، اَ اِقتداری که خِداوند بنا کَرده را بَه مِن آدوعَشه نِه ویرونه کَردِه را.

خاتیمه

¹¹ آخِرسَر، اِی بِرااِن، شاد بِبییَه. شِمَه فیکر اِم بِبو که هَنی قوت بِگِرَه، یَندی تَسلی بِدییَه، یَندی نَه همرأی بِبییَه، صلح و سلامتی کا زِندگی بِکَرَه؛ و خِدای محبت و صُلح و سلامتی، شِمَه نَه بَمَندی.

¹² مقدّس ماچی نَه یَندی را سلام بِکَرَه.

¹³ گِردِ مقدّسِن، شِمَه را سلام ویسا آکَرِن.

¹⁴ خِداوندْ عیسایِ مسیح فیض، خِدا محبت و روح القدسی رفاقَت، شِمَه گِردی نَه بِبو.