DABE 18 - Biblía Axweesantá Hhohho' ar Mungú 2004

Hariímár kaahamuusér Mungú

¹ «Kaahamuusér Mungú ar tlahhoó Laáwi dinkwa nee tlahhoó Laáwi sleémeero, yaamu mingiwa slayé', laqaá aali baraá yaamaá Israeliwo. Inooín ilahhooadá' ta hanmiisi dír AAKOÓ MUNGÚ ngin /ayiyá'.

² Ala inooín aali mingiwa slayé' dír hhaeeine, asma AAKOÓ MUNGÚ an aalir'ín, adoodá' ngira qaroó al'axweés.

³ «Gaarí an hariimár kaahamuusér Mungú: Muruudá' ta ilahhooár wa tsu/i, adór hikwa, nee bee/aangw, kaahamuusér Mungú ya'aá geera ngi sleer, nee taqeesama' nee xooslár gura'.

⁴ Bu'ungwhúng oo geera un hanisá' dír kaahamuusér Mungú, nee difaái, nee di/i nee se'éngw bee/angwhúng oo taa geerií tlaqé'.

⁵ Baraá tlahhi'iihunge AAKOÓ MUNGÚ, tlahhoó Laáwi guna tsawaár as nguwa sagadiyuusiya' ay alhhe'eesay wasle.

⁶ «Heé tlahhoó Laáwi birngi slaa' iwa loohi, baraaá gixsadá' i hooti baraá Israeliwo, aqo in loh amoodá' i slai AAKOÓ MUNGÚ aa tsawaár.

⁷ Diirihe AAKOÓ MUNGÚ, Munguúwós guri sagadiyuus, adoodá' múk Laáwi oo hatlá' ir gadiyuusi dír geeraá AAKOÓ MUNGÚ wa ale.

⁸ Muruú /aymár i slay aqo in alqón nee oo kaahamuusér hatlá', tam handá' muruú /aymar'ín oo hatlá' ngu slaslaya'a dír hhaeeín awa hatlá' wa ale.

Gurbua daanduú slooír dahaayo'o

⁹ «Qoomár bar aga daté' baraá yaamuudá', AAKOÓ MUNGÚ Munguúhúng ni dirhúngí haniisi, slooír xoordaá yaamuudá' tidá' ta waki ma eeharara'.

¹⁰ Baraá tla/angwhunge hee tumu wák miwa deeruút, heé na/aywós oo garma, laqaá oo dasi gu baraá ásltár ohís as nguwa ilahhooár wa haniisi, laqaá heé tlaa/aá xuaaiím, laqaá heé tu/u/uúm, laqaá oo isaá araa'ár,

¹¹ laqaá da/alusmo, laqaá oo da/ariiwo mutiím, laqaá oo axweesá' nee múk aa qaatl, laqaá oo axweesá' nee neetlaame, laqaá oo axweesá' nee gi'i.

¹² Asma heé adór kwí i AAKOÓ MUNGÚ buhhtamis, nee as daanduú tlehhmi'iiká' buhhtamisa'a, AAKOÓ MUNGÚ, Munguúhúng xoordaá adoorí /imaamisá' gin geerahúng wa guus.

¹³ Kuungá' masók gár nuwa /aaruw dír geeraá AAKOÓ MUNGÚ, Mungúhung i kaahh.

Al'axweesantá aarusmo kuwa slay

¹⁴ «Xoorduudá' kuungá' ta yaamu aalír eera', inooín kángw múk tlaa/aá xuú' ngun eeharahariyá', nee oo tu/u/uúm, ala AAKOÓ MUNGÚ, Munguúhúng kuungae i ya/anká adoorí kawa tlehha'.

¹⁵ AAKOÓ MUNGÚ, Munguúhúng aarusmo adór aníng ngu baraá tla/angwhúngú kilá' wa tsawaar, nee kuungá' inós ku iialooesá'.

¹⁶ «Gaarí an gadaádá' kuungá' taa baraá Horebúr wa firiindé' dír AAKOÓ MUNGÚ, Munguúhúng, baalaadá' tawa burumburité' tari oé', ‹Afór AAKOÓ MUNGÚ Munguúrén, mawa male axaasaán, laqaá tam asltá ur ar adór tiqá' mawa male araán as kahhó' mawa qatlaán.›

¹⁷ Aluuwo AAKOÓ MUNGÚ aníng iri báy, ‹Mukwí looeemaaín ngaa ooiyé'.›

¹⁸ Aníng aarusmoó adór kuúng u baraá tla/angwhúng wa tsawaár, nee aníng axweesante'eé' a baraá afkós i qaás, inós tidá' sleémeero aníng ngwaa báw ngi dirhúng í oo'.

¹⁹ Heé axweesantá aarusmoowí aa axwees ar umuueé' gaa waaqaa', anuú kilá' un sakwasleemuút.

²⁰ Ala aarusmoó axweés ar umuú munguaá hatlá', laqaá oo umuueénár axweés slám aníng ugwa ádbawiika, arusmoowí in gwaa' sleeme.

²¹ «Ala i ya/aán kuungá' tawa oa', ‹Adór axweesantá AAKOÓ MUNGÚ naa ooiiká kar tsaahhaan?›

²² Barnaxes aarusmo gaa gaa oó' ar umuú AAKOÓ MUNGÚ, nee gadaádá' aa tleehharutká, laqaá aa loeeská, daqaní gaarí AAKOÓ MUNGÚ gaa ooiiká. Aarusmo gana sagós ar oó'. Kuungá' mutunduwa dae tsaát nee gár adór tí.»