Filemoni 1 - Ya/abtór hho' 1977

¹ Ánuú Paulo oo taa tseék as Kristo Yesu barwaárí ngina gooiím dinkwa nee Timoteo hhiyaarén, amoorók Filemoni, sla'aarusmoorén, oo gadiyér tleéhh dinkwa nee atén,

² nee amór Afia, hho'oorén, nee amór Arkipo, askaarmoó Kristo adór aníng wa ale, nee amór múk Kríshaanáy kudá' baraá do'ók wa burumburiimamiít.

³ Mungú Baabuúrén nee Aako Yesu Kristo kuungá' nu tsuuqi nee nu waydí haniisi.

Sla'aari nee haratlintaao

⁴ Deelo sleémeero án Mungú un sluufimiís as kuúng, nee un inslasláw baraá firor'eene,

⁵ asma iidíguú sla'aarirók u axamiís nee haratlintaaór ta koon dír Aako Yesuwo nee dír múk hhohhó' sleémeerowo.

⁶ Án kuúng gár uwa aleefiriiriim a tí gídaabá kuúng masók haratlintaaoorók an lamabu'uún dír múk hatlá' i alé. Gawaá adoorihe atén sleémeero tsuuqadá' sleémeero masók ki tsaahha hhe'eesaán, kudá' ta koomaan baraá Kristowo.

⁷ Asma qwal/uú yaariír ugwa sláw nee gurkwa/asa, as sla'aarirók, asma munér múk taa hhehhe'eés kaa qwal/atís nee kuúng, hhiyaaeé'.

Firór Paulo as Onesimo

⁸ Gawaá adoorihe, baraá Kristowo aníng geeraawo a aleesláw ar kuúng uwa hara'ayiim tidá' kuúng tawa hariin tleehhamooro. Ala a sla'aaká kuúng uwa hara'ayiim.

⁹ Ala án kuúng u firiím adoorí kawa tlehh as sla'aari. Ánuú Paulo a aako, nee slám a baraá tsegma as Kristo.

¹⁰ Aníng kuúng u firiím as na/ay'eé' Onesimo. Inós aníng una laqwaál ar baraá Yesu baraá tsegmoó wa ale.

¹¹ Inós bál geera kuúng uga gaa wa buuiiká, ala hamí u ló' wa gaa wa buu', kuúng nee aninge.

¹² Hamí ngun ki/ís amoorók i alé inós u kilá', nee inós a adór muunuúeé' oo kilá'.

¹³ Aníng ana slaá' iwa amor'eé' wa hooti, as aníng iwa sagadiyuusi daanduuwók wa ale, baraá tsegmuuwí ni diriia as Ya/abtór hho'.

¹⁴ Ala aga slaiiká gaa ngiwa kilooeé' tleehh, aqo adór kuúng ta kat, asma sla'aarirók mawa harakeés masók a adór kuúng ta sla'.

¹⁵ Gaarí dooqa an gár kusa paraátl diroge qoomár niinawe, as kuwa malé sleer, tay al hotá' ay alhhe'eesay wasle.

¹⁶ Iimír hamí inós a adór lawaalmoowooká, ala a lawaalmo ba/a. Inós a hhiya' oo sla'aarusmo. Ar ló' aníng u slaá', ala kuúng u ak slá' asma a heewók, nee hamí a hhiyaawók baraá Kristowo.

¹⁷ Ala kuúng aníng bira tsáhh adór tar dinku'usmoowók baraá haratlintaaooro, inós ilaooheek adór ánuú kilá' wa ale.

¹⁸ Nee kuúng bura /aytín, laqaá kuúng bur iinús gaaro, gaasíng daanduueé' gooiimeek.

¹⁹ Aníng Paulo al/axweesantí ngina gooiím ar dakw'eé' oo kilá', gídaabá aníng ngi buú'. A mak sla'aaká uwa inslawtis ar gídaabá kuúng a iinar'eé' koón. Iinadá' a slafiingók oo kilá'.

²⁰ Ala hhiyaaeé', gár ni slaa' bu'utuuwo a tí, Alee/iisáng gawaá kaangwihe ar loohír hariím baraá Aakoowo. Muunaáeé' qwal/aseek ar baraá Kristo.

²¹ Tí ngina kuúng i gooiím asma ngiwa xuu' ar gídaabá kuúng adoodá' án naa firiím a tléhh, nee kari harwaaráhh.

²² Aníng kuúng u firiím, dír hotaeé' amohhe'eeseek, asma aníng aga haraxuú' gídaabá, Mungú án i alee/iis ar niwa amorhúng i hardah adoodá' kara firiindé' dír Munguhe.

Intsihhiisantá alhhe'eesaay

²³ Epafra kuúng u intsihhiimiis, kudá' taa tseék dinkwa nee aníng asma Kristo Yesu.

²⁴ Tam Marko nee Aristarko nee Dema nee Luka, kudá' nee aníng algadiyuusá', kuúng u intsiihhiimisiyá' sleeme.

²⁵ Aakoorén Yesu Kristo munerhúng ngi tsuuqi.