Jozuwe 9 - Mazu Otchena a Mulungu

Atu a ilambo ya Jibeyawu kohanyenga aIzarayeli

¹ Evale amwene atene kakala mavirelo wa nzuwa wa muhindje Jordawu, ku wonga amwene kakala mmwangoni vamohi na amohiwa kakala ilambo ya mikuma ding'onong'ono wandamelana bara Mediteraniyo na amohiwa kakala Libano anno anafwanyeya kagali aEti, aAmore, akuda Kana, aFerizi, aEvi na aJebuzi, amwene atene anna kagavwile jatene jaireyile,

² kohovwanana ira kadowe kawane na Jozuwe na aIzarayeli.

³ Mbwenye, atu anno kakala ilambo ya Jibeyawu, kagavwile jatene jene Jozuwe jairile liye sidadi ya Jeriko na Ayi,

⁴ kohohelavo zelru dodowa anyenga aIzarayeli. Evale kohohela vamohi jengo ja muulrendoni, aliwa hela muwari mwa masakwi awale, aliwa gweliha vaaburuni viwa. Kohotukula matembe mwahela atu vinyu kagali awale eto otweya kagamanle tchapelriwa,

⁵ eto kohowaraga xineli dawale dotchapelriwa vamohi na jowara jawale jowaheya jene. Eto kohotukulaga pawu doumma, dokana unguwi.

⁶ Mwa enne kohovenyaga, aliwa dowa nfwanya mulombwana Jozuwe vamohi na aIzarayeli atene vamisasani viwa Jiligali, aliwa wongaga keraga: <<Hiyo nnakumela ilambo yolapela na nyo. Nazela ira musakanye yopangana yowandana na hiyo.>>

⁷ Evale alombwana a aIzarayeli ale kohawakulaga aJibeyawu anno kali a nlogo na aEvi, keraga: <<Kavinakala wandeya ira hiyo nnosakanya yopangana yowandana na nyo. Tchoira afwase nyo munakala mwilamboni muli hiyo mu.>>

⁸ Alombwanale kohomuwakulaga Jozuwe keraga: <<Hiyo nili okozeyene ira nikale anamalabinyu.>> Evale Jozuwe ohafuka eraga: <<Nyo muli ani eto munakumela waani?>>

⁹ AJibeyawu ale kohomurumelaga Jozuwe keraga: <<Hiyo anamalabinyu nikumile ilambo yolapela bure na uno, na mwasa ovwa zela Yehova Mulugu wenyu. Tchoira nihivwa zela vweya waye ozela jatene jene jiirile liye Ijipitu

¹⁰ vamohi na jejo jaairele liye amwene ambinli a akuda Amore anno kakala makumelo wa nzuwa wa muhindje Jordawu kagali Seyoni, mwene wa Ejiboni na Oge, mwene wa Bazani, wenno akala Astaroti.

¹¹ Na mwasa wenno, andimuwihu na atu atene a wanihu banirumile ira: <Musakanye poso na muulrendoni, muvenye mudowe mwagumane na aIzarayeli, mwawonge na aliwa muire: <<Hiyo nnafuna nikale anamalabinyu. Nnouvepani ira musakanye yopangana yowandana na hiyo.>> >

¹² Kaing'anani pawu dihu di, nikumagana mmavande mwehu ira dikale poso muulrendoni mwehu oza wa nyo, siku neno dali dokaha dene. Mbwenye dihimala umma eto dikana unguwi.

¹³ Kaing'anani matembe ninna hiyo ala, hiyo nizalihaga vinyu kali maxene. Mbwenye kohomala tweya. Eto zela jowara jehu na xineli niwarile hiyo, jatene jihimala waheya na mwasa wa ulrendo olapa bure uwendile hiyo.>>

¹⁴ Evale andimuwa a aIzarayeli kagatukunle jodja jile, kagaonne makalelo uwa, kohorumela yovepa yewa kahanfukile Yehova.

¹⁵ Mwa enne, mulombwana Jozuwe ohorumela wenda vamohi na aliwa mwa murendele eto liye ohosakanyaga yopangana yowandana na akuda Jibeyawu ale ira kahapiwe. Eto andimuwa a aIzarayeli na aliwene koholumbela imohive.

¹⁶ Vagamanle malambo mararu, kagapanganne yopanganiwa na akuda Jibeyawu ale, aIzarayeli kohovwa ira: <<Afwinyu anne mwaasakanyana nyo yopangana yowandana ale, anakala vakwikwive muwari mwa ilambo imohive yenna.>>

¹⁷ Evale Ana Izarayeli kohomaruwaga, aliwa dowaga sidadi dakala aJibeyawu ale. Kadowaga kamanlege malambo menli mundila kawendaga. Siku naneraru kohofiya sidadi dewa dedo daitaniwa Jibeyawu, Kefira, Beroti na Kiriyati-Jeyarimi.

¹⁸ Mwa enne kagafiyile wewule, Ana Izarayeli tchadowile wana na aliwa na mwasa olumbela walumbenle andimuwa a Ana Izarayeli mwa nzina na Yehova Mulugu wa aIzarayeli. Mwa enne mulogo watene wa aIzarayeli kohoroma wonga ubure zela andimuwiwa.

¹⁹ Noira eno, andimuwa atene ale kohawakulaga keraga: <<Nihalumbelela na nzina na Yehova Mulugu wa aIzarayeli, nona kavili jowandeya ira nnoairela yabure atwala.

²⁰ Na mwasa olumbela nialumbelenle hiyo inafwanela naahiyeni aliwa apamene tawiha ira uwali wa Yehova unanizele.

²¹ Inafwanela naahiye aliwa kakalewo. So mbwenye aliwa anakala aliba niirebela kuni hiyo atene eto anerege nirungela mahindje.>> Mwa enne aJibeyawu ale kohovahiwa mabasa anne nnga mwawongele andimuwale.

²² Evale mulombwana Jozuwe ohaitanihaga akuda Jibeyawu ale, liye afuka eraga: <<Katchiyeni, nyo mwasiwa gwa nni muza muninyengaga ira: <Nikumenle olapela wene na nyo>, agali munakala muwari mwa ilambo imohive yenna?

²³ Na mwasa wenno muirile nyo kuma peno muhutembelrelreya. Roma peno dowagave sogolro munlogoni mwenyu amohiwa anakalege azari ira karebege kuni eto karungege mahindje ira jilabiwegena Nyumba ya Mulugu waga.>>

²⁴ Evale aJibeyawu ale kagavwile mazu a mulombwana Jozuwe, kohomurumelaga keraga: <<Hiyo anamalabinyu niza niiraga eno mwasiwa nere vwa na ibaribari ira Yehova Mulugu wenyu ohowonga na namalaba waye Mozeji ira unouvahani ilambo yatene yenna. Eto ohouvahani nyo ira mwaatolotchege atu atene anaafwanyege nyo vilambo dedile. Hiyo nagavwile jatene jejo, nuhuovani nyo tawiha ira munanipe. Nona nira eno.

²⁵ Eni nili mmandani mwenyu. Mwa eno, muniirele hiyo yengo yenno inaone nyo kala pama vamentoni venyu.>>

²⁶ Evale Jozuwe ohakoya aJibeyawu ale pama, liye kaahiyile Ana Izarayeli ira kaape.

²⁷ Mbwenye kuma siku nenne Jozuwe ohasakanya aJibeyawu ale ira karungege mahindje eto karebege kuni para akuda Izarayeli eto para vaibuwani va Yehova nimburo nili natene nasakulra Yehova. AJibeyawu ale mabasiwa banno fiyeda siku na peno.