Jozuwe 14 - Mazu Otchena a Mulungu

Ana Izarayeli kohogaweliwa ilambo ya Kana

¹ Ala ba makalelo Ana Izarayeli kagaweliwe atu vilambo da Kana. Agawile vilambo diwa ali namakuta Eliyazari na Jozuwe mwana Numi, vamohi na andimuwa andimuwa a muibalini mwa malogo a Ana Izarayeli.

² Nnga mwemo Yehova mwarumele liye muwari mwa Mozeji, kagawile ilambo para malogo matanu na mannayi na metadi a aIzarayeli muwari mwa jogu ya ngari.

³ Mwasiwa Mozeji ohomala agawela wanle malogo menli na meya ilambo yewa pandi ya makumelo wa nzuwa wa muhindje Jordawu. Mbwenye aIzarayeli kagaweliwaga vilambo diwa, aLevi tchavahiwe ilambo ira ikale yewa.

⁴ Atu a muibalini mwa Joze kohogaweya, aliwa kala malogo menli. Nlogo nimohi na Manasesi, nimohi niwa na Efarayimi. ALevi tchavahiwe nne mwana ilambo ing'ining'ini. Mbwenye kohovahiwa sidadi diwa ira kakalemo eto kohovahiwa mamburo ira kawande djihamo jifuwo jiwa ja ng'ombe, mabila na mbuzi.

⁵ Ana Izarayeli kohogana ilambo yenne nnga mwemo Yehova mwamurumele liye Mozeji.

Kalebi ohovahiwa ilambo yaye

⁶ Siku nimohi, atu a nlogo na Juda kohodowa Jiligali ira kawonge na Jozuwe. Muwari mwa aJuda, mmohi ali Kalebi mwana Jefoni wa muzizani mwa Kenize. Mulombwana Kalebi ohowonga na Jozuwe eraga: <<Weyo uhumala iziwa jengo jejo jawongile Yehova na Mozeji, mutu wa Mulugu nagali ilambo ya Kadeji-Barneya, zela weyo na miyo.

⁷ Mozeji muzari wa Yehova adirumaga ira dikume Kadeji-Barneya, didowe dawendelele ilambo ya Kana, ora yenno danna yaka 40. Dagadowile, dagazile, miyo dohomuwandela Mozeji ibaribari zela jatene jaonne miyo.

⁸ Mbwenye alombwana afwaga amohiwa anno kadowile na hiyo wendelela ilambo yenna, kagazile kohoromaga aoviha anamwindji. Miyo mbwenye dohokala oimelene dimuharaga Yehova Mulugu waga.

⁹ Siku nenne Mozeji oholumbela na miyo eraga: <Weyo Kalebi, na mwasa okala oimelene momuhara Yehova Mulugu waga, weyo vamohi na ahimawo munoza muvahiwe ilambo yenno inyinganle we, ikale yenyu kala no kala.> >>

¹⁰ Mulombwana Kalebi ohowongagave eraga: <<Kaing'anani eto, vihimala yaka 45 romela vawongile Yehova jengo jeji na Mozeji aIzarayeli kagali muisalesaleni. Eto Yehova uhudikoya miyo fiyeda peno nnga mwawongele liye. Kadiing'ane miyo peno eni dihikana yaka 85.

¹¹ Eto kopolo danna miyo malambo a mundulrimu tempu Mozeji adirumile liye wendelela ante na vanove kopolo dinna miyo ti dimohive. Na vanove dihikana kopolo dodowa wana kondoni eto dihikana kopolo dolaba mabasa ali atene.

¹² Nona miyo nnafuna ira udivahe ilambo yenna ya mwangoni nnga mwemo Yehova mwapanganne liye na miyo tempu yenne. Tchoira siku nenne weyo wohovwa zela aAnaki anno kali atu alukulu vamohi na sidadi dolimba nnafwanyeya wewule. Mbwenye Yehova afuna, akala na miyo, nnoatamangiha mwilamboni mwewa, nnga mwemo mwapanganne liye.>>

¹³ Mwa enne Jozuwe ohomureliha Kalebi mwana Jefoni. Nomala eno, ohonvaha Kalebi sidadi ya Eboroni ira ikale yaye.

¹⁴ Ante fiyeda siku na peno, sidadi ya Eboroni annya ba atu anabaliwa muwari mwa Kalebi mwana Jefoni wa ziza na Kenize, mwasiwa liye ohonvwelela mwapama Yehova Mulugu wa Izarayeli.

¹⁵ Wanle sidadi ya Eboroni yaitaniwa na nzina na Kiriyati-Araba, tchoira Araba ali mulombwana mundimuwa akwaranya akuda Anaki afwaye atene. Mwa enne kondo mwilamboni mule yohomalaga.