Jozuwe 10 - Mazu Otchena a Mulungu

AIzarayeli kohavunela aJibeyawu

¹ Mwene wa Jeruzalemu eriwa Adoni-Zedeki ohovwa ira mulombwana Jozuwe uhumala gondjiha sidadi ya Ayi eto uhatolotcha atene roma mweniwa vamohi na atu atene na makalelo nnga jaairilena liye akuda Jeriko vamohi na mweniwa. Eto mwenole ohovwa ira akuda Jibeyawu kohosakanya yopangana yowandana na aIzarayeli eto anakala vamohi.

² Agavwile enne, mwene wa Jeruzalemu ule ohokana ova ulukulu mwasiwa Jibeyawu yali sidadi indimuwa nnga sidadi datongiwa na amwene eto yali sidadi indimuwa kwaranya sidadi ya Ayi eto alombwana atene a sidadile kali atu owanda wana kondo.

³ Mwa enne Adoni-Zedeki mwene wa Jeruzalemu ule ohorumiha mpanganyo odowa wa Ohamu, mwene wa Eboroni, Piramu, mwene wa Jarimute, Jafiya, mwene wa Lakiji, na Debiri, mwene wa Egiloni.

⁴ Kwi: <<Muze mudikamihede ira nidowe naagondjihe akuda Jibeyawu mwasiwa aliwa kohosakanya yopangana yowandana na Jozuwe vamohi na Ana Izarayeli.>>

⁵ Amwene atanu anno a aAmore roma mwene wa Jeruzalemu, mwene wa Eboroni, mwene wa Jarimute, mwene wa Lakiji na mwene wa Egiloni, kagavwile mpanganyo ule, kohogumanela vamohi na anyakondo ewa atene, aliwa dowa irindja sidadi ya Jibeyawu, aliwa roma wana.

⁶ Evale akuda Jibeyawu ale koharuma atu ira kadowe misasani wali mulombwana Jozuwe ilambo ya Jiligali ira kamuwandele ira: <<Muze mobaranya munivulumutche eto munikamihede hiyo anamalabinyu. Kamunihiye hiyo okave, mwasiwa amwene atene a Amore anakala mmwangoni kohogumanela ira kaze kawane na hiyo.>>

⁷ Evale Jozuwe na alombwana atene a kopolo owanda wana kondo na alombwana atene owana kohokuma Jiligali, aliwa dowa wewo ira kaakamihede.

⁸ Yehova ohomuwandela mulombwana Jozuwe eraga: <<Kwaove amwidani ale mwasiwa miyo dihimala uvaheda aliwa mmandani mwawo. Kalivo mmohi wa aliwa unafuna ugondjihani.>>

⁹ Evale Jozuwe vamohi na atwaye kagakumile Jiligali, kohomalaga mahiyu anne kawendaga. Mwa enne, kohatwanyuwelaga aAmore ale mobaranya moarendjetcha, roma wana na aliwa.

¹⁰ Mwa ora yenne kawana atu, Yehova ohosakanya ira amwidaniwa ale kakale balala balala. Mwa enne aIzarayeli kohagondjiha amwidani ale ilambo ya Jibeyawu, aliwa roma atamangiha na ndila fiyeda nkuma wa Bete-Horoni, aliwa apaga fiyeda Azeka ante Makeda.

¹¹ Evale amwene ale kaatawaga Ana Izarayeli, katitelaga nipedi na Bete-Horoni, Yehova ohoruma mabwe malukulu a maralaza kumela zulu, amorihedaga amwidani a Ana Izarayeli, aliwa roma kwela vanipedini vale fiyeda Azeka. Muzongwe wa mabwe a maralaza ohapa atu adjindji kwaranya atu anne Ana Izarayeli kaapile atu na masupadiwa.

Imela wa nzuwa vamohi na mwedi

¹² Siku Yehova aavelenle liye aAmore ale mmandani mwa Ana Izarayeli, mulombwana Jozuwe ohowonga wa Yehova vamentoni va Ana Izarayeli atene ira: <<Nnafuna nzuwa nikale noimela nene vari va Jibeyawu eto mwedi akale oimelene ndabo na Ayijaloni.>>

¹³ Mwa enne nzuwa nohoimela eto mwedi ohoimela fiyeda mulogo wa aIzarayeli aweliheda amwidaniwa kunyakunya. Mazu anna kalrembiwe muLivuruni mwa Jazari. Nzuwa nohokala noimela nene vari na vari eto kuma evo vaimenle nzuwa nne ira nivire nohodibeliwa kalaga nnga siku nompumbula.

¹⁴ Mwa ora yenno nali nahanakalewo siku nnga neno eto fiyeda peno kaniliwo siku nnga neno, siku Yehova avwelenle liye nizu na mutu. Jejo jaireyile mwasiwa Yehova gwawana na amwidani ale vamalroni va aIzarayeli.

¹⁵ Nomala eno, mulombwana Jozuwe vamohi na aIzarayeli atene kohowelela misasani uwa Jiligali.

Piwa wa amwene atanu a aMore

¹⁶ Eto fwanyeya ira amwene atanu ale kohotawa, aliwa dowa vitala nifukweni nafwanyeya sidadi ya Makeda.

¹⁷ Mwa enne Jozuwe ohowandeliwa ira: <<Amwene atanu ale kohofwanyiwa kagavitanle nifukwe na Makeda.>>

¹⁸ Evale Jozuwe ohawandela atu, liye ira: <<Mupingiritche mabwe malukulu, mudowe mwafungena nifukweni wewule unafwanyeya amwene ale, mwamala mwaahelevo atu ira kaaing'anelege.

¹⁹ Nyo mbwenye kamuhale evo, mudowe mwaapege amwidani anno kahalenle mundulri. Kamwaahiye ira kawelele musidadi mwewa mwasiwa Yehova Mulugu wenyu uhuvahedani aliwa mmandani mwenyu.>>

²⁰ Evale mulombwana Jozuwe vamohi na Ana Izarayeli kohapaga amwidaniwa pwi. So avulumuwile ali a vang'ono katawenle sidadi dolimba dowerewerihiwa na muru.

²¹ Nomala eno, Ana Izarayeli atene kohowelawo atene apamene kadowaga vamisasani viwa Makeda wewo wafwanyeya mulombwana Jozuwe. Mwa enne kalivo nne mutu mmohi alimba murima ira awonge ubure zela aIzarayeli.

²² Noira eno, Jozuwe ohowonga, liye ira: <<Mukumihewo mabwe mufungilena nyo nifukweni ule, mwaakumihe amwene atanu ale, mwaazena wa miyo.>>

²³ Mwa enne kohoirana nnga mwawongele liye, aliwa akumiha amwene atanu ale: Mwene wa Jeruzalemu, mwene wa Eboroni, mwene wa Jarimute, mwene wa Lakiji na mwene wa Egiloni.

²⁴ Kagaazilena amwene ale wa mulombwana Jozuwe, liye ohaitana alombwana atene aIzarayeli, liye wonga na asogolrelri atene a anyakondo anno kadowile na liye kondoni, eraga: <<Kazani uno, mutukule manyalo enyu munyingale mmakohini mwa amwene ala.>> Evale aliwa kohozaga, aliwa nyingala mmakohini mwa amwene ale.

²⁵ Evale Jozuwe ohawongana asogolrelri a anykondo, eraga: <<Nyo kamuove eto nne kamurendjeye. Inafwanela mukale olimba kopolo eto mukale olimba mirima mwasiwa amwidaninyu atene munaawanegena nyo, Yehova unerege asakanya na makalelo mamohive anna!>>

²⁶ Nomala eno, Jozuwe ohapaga na supada amwene atanu ale, liye dowa amangelela mmitengoni mitanu, kada mutu mutengo waye waye, liye ahiya evale omangeleliwene ante tchiguwoni.

²⁷ Nzuwa niviraga, Jozuwe oharuma atu, aliwa akumihavo, dowa atatilela nifukweni wewo wavitanle atu. Nomala enne, kohelaga mabwe malukulu vovolowela va nifukwe nne. Mabwale anafwanyeya vovolowela evo fiyeda siku na peno.

Jozuwe ohagondjiha atu kakala pandi ya suli ya Kana

²⁸ Siku nimohive neno, Jozuwe na atwaye kohogondjiha sidadi ya Makeda, aliwa apa atu atene na masupadiwa vamohi na mweniwene. Jozuwe kamuhiyile nne mutu mmohi ira akalewo, atene ohomala atolotcha. Eto Jozuwe ohomuirana mwene wa sidadi ya Makeda makalelo mamohive nnga amuirena liye mwene wa sidadi ya Jeriko.

²⁹ Nomala eno, Jozuwe na aIzarayeli atene anna liye kohokuma Makeda, aliwa dowa wana na atu a sidadi ya Libina.

³⁰ Yehova ohavaheda atu a sidadile vamohi na mweniwene mmandani mwa aIzarayeli. Evale aliwa kohapa atu atene a sidadile na masupadiwa. Jozuwe kamuhiyile nne mutu mmohi ira akalewo. Eto kohomuirela mwene wa sidadi ya Libina ule makalelo mamohive nnga jamuirele atu mwene wa sidadi ya Jeriko.

³¹ Noira enne, Jozuwe vamohi na aIzarayeli atene kohokuma Libina ule, aliwa dowa irindja sidadi ya Lakiji, aliwa roma wana.

³² Yehova ohovaheda sidadi ya Lakiji mmandani mwa aIzarayeli. Mwa enne siku nanembinli kohogondjihaga sidadile, aliwa apa atu atene a sidadile na masupadiwa na makalelo mamohive nnga jaairilena atu akuda Libina.

³³ Evale mwene wa ilambo ya Jezeri wenno aitaniwa Horawo, agavwile jatene jaireyile, ohovenya ira aakamihede atu a sidadi ya Lakiji. Mbwenye mulombwana Jozuwe na atwaye kohomugondjiha mwene wa Jezeri ule vamohi na anyakondwaye atene, aliwa mala apa. Jozuwe kamuhiyile nne mutu mmohi ira akalewo.

³⁴ Evale Jozuwe na aIzarayeli atene anna liye kohokumaga Lakiji, aliwa dowa irindja sidadi ya Egiloni, aliwa roma wana.

³⁵ Siku nimohive nenne kohogondjiha sidadile, aliwa apa atu atene a sidadile na masupadiwa. Kohatolotcha atene siku nenne, na makalelo mamohive nnga jaairilena atu akuda Lakiji.

³⁶ Noira eno, mulombwana Jozuwe na anyakondo a aIzarayeli anna liye kohokumaga Egiloni, aliwa gwela dowa sidadi ya Eboroni, aliwa roma wana.

³⁷ Evale kohogondjihaga sidadile vamohi na mweniwa vamohi na tatamo da vakwikwi, aliwa apa atu atene na masupadiwa. Jozuwe kamuhiyile nne mutu mmohi ira akalewo na makalelo mamohive nnga jaairilena atu akuda Egiloni. Kohotolotcha sidadi ya Eboroni ile vamohi na atu atene kafwanyeyamo.

³⁸ Jagamanle ireya eno, Jozuwe na aIzarayeli atene anna liye kohowelaga, aliwa dowa sidadi ya Debiri, aliwa dowa roma wana.

³⁹ Noira enne, kohogondjihaga sidadile na mweniwa vamohi na tatamo datene da vakwikwi, aliwa apa atene na masupadiwa. Kohatolotcha atene eto Jozuwe kamuhiyile nne mutu mmohi ira akalewo. Aliwa kohoirana sidadi ya Debiri ile vamohi na mwene wewa na makalelo mamohive nnga jairilena atu sidadi ya Eboroni na mweniwa vamohi na sidadi ya Libina na mweniwa.

⁴⁰ Mwa eno, Jozuwe ohomala apamo atu a ilambo yatene yenne, romela ilambo ya mwango didjindji ya Negebe, ilambo ya mikuma ding'onong'ono na pandi dafwanyeya mmambalo mwa mwango, vamohi na amwene atene katonga mwemule. Jozuwe kamuhiyile nne mutu mmohi ira akalewo. Liye ohatolotchaga atu atene okalawo nnga mwemo mwamurumele Yehova Mulugu wa Izarayeli.

⁴¹ Mwa enne mulombwana Jozuwe ohomala apamo atu atene romela ilambo ya Kadeji-Barneya fiyeda Gaza na ilambo yatene ya Gozeni fiyeda Jibeyawu.

⁴² Yehova Mulugu wa Izarayeli gwaakamiheda aIzarayeli muwari mwa kondo kawana atu. Na mwasa wenno, mulombwana Jozuwe ohowanda agondjiha amwene atene anno na vilambo diwa dene ulrendo umohive.

⁴³ Nomala eno, Jozuwe na aIzarayeli atene anna liye kohowelela vamisasani viwa Jiligali.