Ukufuma 1 - Ishiwi Lyakwa Lesa 2015

¹ Aya e mashina ya bamwana Israeli abaume pamo ne ndupwa shabo shonse, abakonkele shibo Yakobo ku calo ca Egupto.

² Rubeni, Simeoni, Levi, Yuda,

³ Isaka, Sebuloni, Benjamini,

⁴ Dani, Naftali, Gadi na Asheri.

⁵ Bonse pamo aba mu lupwa lwakwa Yakobo bali amakumi cine lubali (70). Yosefu mwana Yakobo wena iyo nshita ninshi ali mu Egupto.

⁶ Nomba Yosefu na bamunyina bonse na ba muli ilya nkulo bonse balifwile.

⁷ Lelo abena Israeli bali no bufyashi, kabili no kufula bafulileko nganshi. Bafulishe icakuti bakumenefye konse mu Egupto, kabili bali abamaka nganshi.

⁸ Nomba imfumu imbi iyishaishibe Yosefu, yatampile ukuteeka mu Egupto.

⁹ Elyo iyi mfumu yaebele abantu baiko aiti, “Mwamona, aba bantu abena Israeli nabafulisha nganshi, kabili baliba abamaka nganshi ukutucila.

¹⁰ Kanshi natubacenjelele epali balafulilako. Kabili nge nkondo yabuka kuti baisa twalukila, baba pamo na balwani besu, batulwisha, bafuma na mu calo baya.”

¹¹ Kanshi elyo basontele abakwangalila abasha. Balebapeela incito ishakosa pakubacusha. Bakuulile imfumu Farao imisumba ya matala Pitomu na Ramesesi.

¹² Lelo nangu babikilepofye ukubacusha nganshi, abena Israeli bena balefulilakofye no kusalangana mu calo conse. Kanshi abena Egupto batampile kulatiina abena Israeli nganshi,

¹³ no kulababomfya buluku buluku.

¹⁴ Balengele ubumi bwabo ukubipa nganshi pa mulandu wa milimo ya lucu mukukandila iloba, mukutama amatafwali, ne milimo yonse iyalekana lekana iya mu mpanga. Mu milimo yabo yonse abena Egupto balebabomfya buluku buluku.

¹⁵ Elyo imfumu ya Egupto yaebele banacimbusa babili Abahibulu Shifura na Pua ukuti,

¹⁶ “Ilyo muleyafwilisha banamayo Abahibulu ukupaapa, pa cakupaapilapo cine nga mwamona mwaume mumwipaye, nga mwanakashi mwimwipaya.”

¹⁷ Lelo aba banacimbusa baletiina Lesa, tabaleipaya abana baume, tabalecita ifyo imfumu ya mu Egupto yabebele.

¹⁸ Elyo imfumu yaitile banacimbusa, yalabepusha aiti, “Cinshi mwalecitila ifi? Cinshi mushaleipaila abana baume?”

¹⁹ Nabo bayasuka Farao abati, “We mfumu, banamayo Abahibulu tababa nga banamayo abena Egupto. Bena baba abakosa, bapaapa ilyo banacimbusa tabalafikako.”

²⁰ Lesa nao epakulenga banacimbusa ukushuka. Abena Israeli bena elyo bacililako ukufula kabili baba abamaka nganshi.

²¹ Pa mulandu wakutiina Lesa, nao Lesa alipeele banacimbusa abana.

²² Elyo Farao akonkomeshe abantu bakwe bonse ukuti, “Muleposa umwana mwaume onse uwafyalwa mu mumana wa Nailo. Lelo abana banakashi bena mwilabepaya iyoo.”