Mateo 4 - Ishiwi Lyakwa Lesa 2015

Yesu atunkwa na Ciwa

¹ Elyo Mupashi atwele Yesu ku matololo kukutunkwa na Ciwa.

² Panuma yakufunga ukulya inshiku amakumi yane akasuba no bushiku, awe insala yamwikata.

³ Elyo Ciwa aisa kuli Yesu alamutunka ati, “Nga uli Mwana wakwa Lesa, eba aya mabwe yasanguke imikate.”

⁴ Yesu amwasuka ati, “Calilembwa ukuti, ‘Umuntu takwatafye umweo mukulya icakulya, lelo na kwishiwi lyonse ilyo Lesa asosa.’ ”

⁵ Elyo Ciwa asenda Yesu amutwala ku Yerusalemu, umusumba wamushilo. Amwimika pa nembenembe ya mutenge we Tempele.

⁶ Amweba ati, “Nga uli Mwana wakwa Lesa tolokela panshi. Pantu calilembwa ukuti, “‘Lesa akakonkomesha bamalaika bakwe pa mulandu obe. Bakakusenda mu minwe yabo pakuti tauipunwine ulukasa ku libwe.’”

⁷ Yesu amwasuka ati, “Na pambi calilembwa ukuti, ‘Wilaesha Imfumu Lesa obe.’ ”

⁸ Kabili Ciwa amutwala pa lupili ulutali nganshi, amulanga no bufumu bonse ubwa pano calo no bucindami bwabuko.

⁹ Amweba ati, “Fyonse ifi ndekupeela nga wakunkula wampakata.”

¹⁰ Yesu epakumweba ati, “Fuma apa we Satana we! Pantu calilembwa ukuti, ‘Ulepepa Imfumu Lesa obe, kabili ekafye eo ulebombela.’ ”

¹¹ Elyo Ciwa asha Yesu, na bamalaika baisa balamutumika.

Yesu atampa ukufunda mu Galile

¹² Ilyo Yesu aumfwile ukuti Yoani nabamuposa mu cifungo, awe abwelele ku Galile.

¹³ Taile ikala ku Nasaleti, lelo aile ikala mu musumba wa Kapenamu uwabela mu lulamba lwa bemba, lwa mu mipaka ya Sebuloni na Naftali.

¹⁴ Kanshi epakufikilisha amashiwi yakwa kasesema Esaya ayakuti,

¹⁵ “We Sebuloni na we Naftali, mwe fyalo fyabela mu nshila ya kuli bemba, kwishilya lya mumana wa Yordani. We Galile wa Benafyalo!

¹⁶ Abantu abekala mu mfifi nabamona ulubuuto ulukalamba! Abekala mu calo ca cinshingwa ca mfwa, ulubuuto nalubasanikila!”

¹⁷ Awe ukufuma apopene Yesu atampa ukubila ati, “Lapileni no kupilibuka, pantu Ubufumu bwa mu mulu buli mupepi!”

Yesu aita abasambi bantanshi

¹⁸ Kabili ilyo Yesu aleenda alekonka ululamba lwa bemba wa Galile, amwene ababwananyina babili, Simoni uo batila Petelo, na munyina Andele. Baleteya amasumbu muli bemba, ico bali balondo.

¹⁹ Elyo Yesu abeba ati, “Nkonkeni, nkamucita abalondo ba bantu.”

²⁰ Apopenefye, basha amasumbu yabo, balamukonka no kumukonka.

²¹ Kabili Yesu ati endeleleko cinono, amona na bambi ababwananyina babili, Yakobo na Yoani bamwana Sebede mu bwato, balelunda amasumbu yabo. Awe nabo abeta.

²² Apopene nabo basha ubwato na shibo balamukonka.

Yesu afunda no kundapa abantu

²³ Elyo Yesu aile alapitana mu calo conse ica Galile. Alefunda mu masinagoga, alebila ne Mbila Nsuma iya Bufumu. Aleposha na bantu bonse abalecushiwa ku malwele na ku ntenda shonse.

²⁴ Awe ululumbi lwakwe lwakumana mu calo ca Siria. Abantu epakulamuletela abalwele abalecushiwa ku malwele ya misango misango, abali ne mipashi yakowela, abalwele shinsa, na babulebe, nao bonse alabaposha.

²⁵ Cinkupiti wa bantu ukufuma ku Galile, ku Dekapoli, ku Yerusalemu, ku Yudeya na kwishilya lya Yordani balamukonka.