Mateo 3 - Ishiwi Lyakwa Lesa 2015

Yoani Kabatisha

¹ Mu nshiku shilya elyo Yoani Kabatisha aishile mu matololo ya Yudeya alebila ati,

² “Lapileni no kupilibuka, pantu Ubufumu bwa mu mulu buli mupepi!”

³ Ala ni uyu wine kasesema Esaya alandapo ati, “Ishiwi lya ulebilikisha mu matololo lileti, ‘Pekanyeni umwakwisapita Imfumu, lungamikeni inshila yaiko.’ ”

⁴ Yoani alefwala insalu ishapikulwa na masako ya ngamila. Alekaka umushipi wa mpapa mu musana. Kabili ifilyo alelya ni makanta no buci bwa mu mpanga.

⁵ Elyo abantu ukufuma mu Yerusalemu na mu Yudeya monse na mu calofye conse ica Yordani balaisa uko ali.

⁶ Baleisosela ifyabubifi fyabo, elyo nao alebabatisha mu mumana wa Yordani.

⁷ Elyo Yoani ati amone Abafalise na Basaduki abengi baleisa kukubatishiwa, alabeba ati, “Mwe bana ba nsoka mwe! Nga nani amusoka ukubutuka ubukali bwakwa Lesa ubwalaisa?

⁸ Shikanshi akuciteni ifintu ifyakulanga ukuti namulapila!

⁹ Mwitampa ukulatontonkanya amuti, tuli bana bakwa shifwe Abrahamu. Ine ndemweba nati Lesa kuti ayalula aya mabwe ukuba abana bakwa Abrahamu.

¹⁰ Lesa naimya isembe ilyakuputawilako imishila ya miti. Kanshi umuti onse uushitwala ifitwalo ifisuma, akautema, akauposa na mu mulilo.

¹¹ Ine ndemubatishisha ku menshi pakulanga ukuti namulapila no kupilibuka. Nomba uukankonka panuma, wena akamubatishisha kuli Mupashi Wamushilo na ku mulilo. Alicindama ukucila ine, nshilingile nangu ukusenda indyato shakwe.

¹² Ali no lupe lwakwelelako mu minwe yakwe. Akafumya imisungu pa lubansa. Akatutila iŋanu mu butala bwakwe. Imisungu yena akayoca mu mulilo uushishima!”

Yesu abatishiwa

¹³ Elyo Yesu afumine ku Galile aisa ku mumana wa Yordani, kuli Yoani kukubatishiwa.

¹⁴ Lelo Yoani atala amukaanya ati, “Nine mfwile ukubatishiwa kuli iwe, nomba niwe waisa kuli ine!”

¹⁵ Yesu amwasuka ati, “Leka pali nomba ucite ifi fine, pantu efyo cilingile pakufikilisha fyonse ifyo Lesa alefwaya.” Elyo Yoani asumina.

¹⁶ Cilyafye Yesu abatishiwa, afuma mu menshi. Awe apopene no mulu waisuka. Elyo amona Mupashi wakwa Lesa aleika kwati ni nkunda, aisa ikala na pali Yesu.

¹⁷ Awe ne shiwi lyafuma mu mulu aliti, “Uyu e mwana wandi, uo natemwa, uo nsekelamo.”