Mateo 1 - Ishiwi Lyakwa Lesa 2015

Ifikolwe fyakwa Yesu

¹ Umu emwakonkanine ifikolwe fyakwa Yesu Kristu, mwana Davidi, mwana Abrahamu.

² Abrahamu afyele Isaki, Isaki afyala Yakobo, Yakobo nao afyala Yuda na bamunyina.

³ Yuda afyala Peresi na Sera muli Tama. Peresi afyala Hesroni, Hesroni nao afyala Ramu.

⁴ Ramu afyala Aminadabu, Aminadabu afyala Nashoni, Nashoni nao afyala Salimoni.

⁵ Salimoni afyala Boasi muli Rahabu, Boasi afyala Obedi muli Ruti, Obedi afyala Yese.

⁶ Yese afyala imfumu Davidi. Davidi afyala Solomoni muli muka Uria.

⁷ Solomoni afyala Reoboamu, Reoboamu afyala Abiya, Abiya nao afyala Asa.

⁸ Asa afyala Yehoshafati, Yehoshafati afyala Yoramu, Yoramu nao afyala Usia.

⁹ Usia afyala Yotamu, Yotamu afyala Ahashi, Ahashi nao afyala Hesekia.

¹⁰ Hesekia afyala Manase, Manase afyala Amoni, Amoni nao afyala Yosia.

¹¹ Yosia afyala Yekonia na bamunyina, elyo babasenda bunkole ku Babiloni.

¹² Panuma yakusendwa bunkole ku Babiloni Yekonia afyala Shealitieli, Shealitieli nao afyala Serubabeli.

¹³ Serubabeli nao afyala Abudi, Abudi afyala Eliakimu, Eliakimu nao afyala Aso.

¹⁴ Aso afyala Sadoki, Sadoki afyala Akimu, Akimu nao afyala Eliudi.

¹⁵ Eliudi afyala Eleasa, Eleasa afyala Matani, Matani nao afyala Yakobo.

¹⁶ Yakobo afyala Yosefu muka Maria. Maria ewafyele Yesu uo batila Kristu.

¹⁷ Kanshi inkulo shonse shaba nifi, ukufuma kuli Abrahamu ukufika kuli Davidi ni nkulo ikumi limo na shine. Kabili ukufuma kuli Davidi ukufika na kukusendwa bunkole ku Babiloni napo ni nkulo ikumi limo na shine. Elyo ukufuma ku busha bwa ku Babiloni ukufika na Kristu nalyo ni nkulo ikumi limo na shine.

Yesu Kristu afyalwa

¹⁸ Kanshi ukufyalwa kwakwa Yesu Kristu kwali nifi. Maria nyina wakwa Yesu akobekelwe kuli Yosefu. Lelo ilyo tabalati bekale nankwe, Maria asangwa ukuti ali pabukulu ku maka yakwa Mupashi Wamushilo.

¹⁹ Nomba Yosefu umwina mwakwe ico ali umuntu umololoke talefwaya ukumusebanya, epakupanga ukumulekela mu bumfisolo.

²⁰ Ilyo acili aletontonkanya ifi, malaika wa Mfumu amumonekela mu ciloto. Alamweba ati, “Yosefu we mwana Davidi, witiina kusenda Maria kumobe ukuti abe umukashi obe. Ala pantu ico aimita, cafuma kuli Mupashi Wamushilo.

²¹ Akafyala umwana umwaume, na iwe ukamwinika ishina lya Yesu, pantu eukapususha abantu bakwe ku fyabubifi fyabo.”

²² Ifi fyonse fyacitike pakufikilisha amashiwi ya Mfumu ayo kasesema asosele ati,

²³ “Umukashana uushakuma ku mwaume akemita, akafyala no mwana umwaume. Kabili bakamwinika ne shina lya Imanueli.” Ishina lyalola mukuti, “Lesa twaba nankwe.”

²⁴ Kanshi ilyo Yosefu aisa buuka mu tulo, acita ngomo malaika wa Mfumu acimwebela. Asenda na Maria umukashi wakwe kumwakwe.

²⁵ Nomba tabakumenepo mpaka Maria apaapa umwana umwaume. Yosefu nao amwinika ne shina lya Yesu.