Mako 3 - Ishiwi Lyakwa Lesa 2015

Yesu aposha umuntu uwa cisansa calemana

¹ Yesu nakabili aingile mu sinagoga, mwali no muntu uwa cisansa icalemana.

² Awe balabesha Yesu ukuti bamone nga alemuposha pa bushiku bwe Sabata pakuti bamupeelelepo umulandu.

³ Elyo Yesu aeba umuntu uwa cisansa calemana ati, “Ima, iminina apa pakati.”

⁴ Kabili abepusha ati, “Bushe calisuminishiwa ukucita icisuma pa bushiku bwe Sabata nangu ukucita icibi? Ukupususha ubumi nangu ukwipaya?” Lelo bena batalalafye tondolo.

⁵ Elyo alatandanya amenso bukali bukali, camukalipa pa mulandu wakumalala kwa mitima yabo. Epakweba umuntu ati, “Fungulula icisansa cobe.” Awe nao afungulula icisansa cakwe no kuba cabafye bwino.

⁶ Apopene Abafalise bafumamo, baya mukumfwana na bena Herodi pakuti bamone umwakumulofesha.

Ibumba ilikalamba lyakonka Yesu

⁷ Yesu na basambi bakwe bafumineko, baya na ku lulamba lwa bemba wa Galile. Ibumba ilikalamba ukufuma mu Galile lyalamukonka. Kabili pali aba bantu, bamo bafumine ku Yudeya,

⁸ ku Yerusalemu, ku calo ca Idumeya, na ku calo ca kwishilya lya mumana wa Yordani elyo na mu ncende shimbi isha mumbali ya misumba ya Turi na Sidoni. Aba bantu baishile kuli Yesu ico baumfwile ifintu alecita.

⁹ Yesu ashimona ibumba lya bantu aeba abasambi bakwe ati, “Mpekanishisheniko ubwato, epali ibumba lyaisa ntitikisha.”

¹⁰ Nomba ico Yesu aposeshe abantu abengi abali na malwele ayalekana lekana, balasunkana pakulwila ukuti bamukumye.

¹¹ Kabili lyonse ilyo imipashi yakowela yalemumona, yalewa panshi no kukuuta aiti, “Niwe Mwana wakwa Lesa!”

¹² Nomba Yesu aleikalipila nganshi no kuilesha ati, “Mwilansokolola ku bantu.”

Yesu asala abasole ikumi limo na babili

¹³ Kabili Yesu aninine ulupili, aitile abo umwine alefwaya, nabo baisa uko ali.

¹⁴ Asalapo ikumi limo na babili, abenika abasole, abeba ati, “Imwe twakulaba na imwe, nakulamutuma na kukushimikila,

¹⁵ kabili namupeela na maka ayakutamfya imipashi yakowela.”

¹⁶ Abantu ikumi limo na babili abo asalile ni aba, Simoni uo Yesu ainike ishina limbi ilya Petelo,

¹⁷ Yakobo na munyina Yoani bamwana Sebede, abo Yesu ainike ishina lya Boanerge, emukutila, “Abakalipa kwati ni nkuba,”

¹⁸ na Andele, na Filipo, na Batolomeo, na Mateo, na Toma na Yakobo mwana Alufeyo, na Tandeo, na Simoni uwa mwibumba lya Baselote,

¹⁹ na Yuda uwa ku Kelyoti ulya wine uwaposele Yesu ku balwani.

Yesu na Belesebu

²⁰ Yesu kabinge aile kumwakwe ne bumba ilikalamba lyaishile longana nakabili, calengele nokuti Yesu na basambi bafilwe ukulya icakulya.

²¹ Nomba ilyo ba lupwa lwakwe baumfwa, baya kukumufumyako, pantu baletila, “Napena.”

²² Bakafundisha bamafunde abafumine ku Yerusalemu batile abati, “Aba na Belesebu, kabili ni kuli uyu mukalamba wa mipashi yakowela eko atamfisha imipashi yakowela.”

²³ Yesu epakwita abantu alabeba mu milumbe ati, “Bushe Satana kuti atamfya shani Satana munankwe?

²⁴ Mu buteko bwa mfumu imo nga mwaba ukulwishanya, ninshi ubo buteko tekuti butwalilile.

²⁵ Aba mu ŋanda imo nga balalwishanya abene beka, ninshi iyo ŋanda tekuti itwalilile.

²⁶ Kanshi Satana nga alailwisha umwine, ninshi apatulukana, kuti afilwa ukutwalilila, lyena kuti yaba e mpela yakwe.

²⁷ “Kabili tekuti pabe nangu umo uwingengila mu ŋanda ya wamaka no kutapa ifyuma fyakwe, kano ninshi abala akaka uwamaka, elyo engatapa ifyuma fyakwe.

²⁸ “Ndemweba icine cine nati, abantu kuti babelelwa uluse ku fyabubifi fyabo bacita elyo na ku musaalula onse bengacita kuli Lesa.

²⁹ Lelo uwasaalula Mupashi Wamushilo takabelelwe uluse nakalya, umulandu wakwe wakubelelela pe.”

³⁰ Ico Yesu asosele aya mashiwi nico baletila abati, “Aba no mupashi wakowela.”

Nyina na bamunyina bakwa Yesu

³¹ Elyo nyina na bamunyina bakwa Yesu bafika, baiminina panse batuma no wakumwita.

³² Kwali ibumba ilikalamba nalimushinguluka, elyo bamweba abati, “Ala banoko na bamunonko na bankashi yobe bali panse balekufwaya.”

³³ Yesu abasuka ati, “Nga bamayo ni bani? Bamunyinane nabo ni bani?”

³⁴ Elyo alolesha pa bantu abekele nabamushinguluka ati, “Ala moneni, aba, e bamayo, kabili e bamunyinane!

³⁵ Onse uucita ifyo Lesa afwaya, e munyinane, e nkashi yandi, kabili e mayo.”