Mako 16 - Ishiwi Lyakwa Lesa 2015

Yesu ashukuka ku bafwa

¹ Ilyo ubushiku bwe Sabata bwapitile, Maria Mandalena, Maria nyina wakwa Yakobo, na Salome bashitile amafuta ya cena icisuma pakuti baye basube icitumbi cakwa Yesu.

² Kanshi lucelocelofye ubushiku bwakutampa umulungu baya ku nindi ninshi elyofye akasuba katula.

³ Balaipushanya abati, “Bushe nani aleya tukunkulushishako icilibwe ukufumya pa mwinshi wa nindi?”

⁴ Nomba bati baloleshe, bamona ukuti icilibwe icali icikalamba nganshi nabacikunkulushapo.

⁵ Cilya baingila mu nindi, bamona umulumendo ekele lubali lwa ku kulyo, afwele no mwingila uwabuuta. Awe batiina nganshi.

⁶ Nao abeba ati, “Mwitiina, mulefwaya Yesu umwina Nasaleti, uo batanike. Ala nabuuka, talimo muno. Moneni apo, epo bamulalike.

⁷ Nomba kabiyeni muye eba abasambi bakwe na Petelo ukuti, namutangilila ku Galile. Eko mukaya mumona nga filya fine amwebele.”

⁸ Awe abanakashi bafuma mu nindi, bafulumuka ulubilo, baletutumafye, nacibapesha amano. Kabili tabaebeleko muntu nelyo umo, ico bali no mwenso.

Yesu amonekela kuli Maria Mandalena

⁹ [Lucelocelo ubushiku bwakutampa umulungu ilyo Yesu abuukile ku bafwa, uo abalilepo ukumonekela ni Maria Mandalena, uo atamfishemo imipashi yakowela cine lubali.

¹⁰ Nao epakuya shimikilako abo Yesu aleenda nabo abaleloosha no kulila.

¹¹ Nomba bena nangu baumfwile kuli Maria Mandalena ukuti Yesu nakabili ali umumi elyo no kumumona namumona, nalyo line tabasumine.

Yesu amonekela ku basambi babili

¹² Kabili panuma Yesu aisa monekela mu musango umbi ku basambi babili abaleya mu mpanga.

¹³ Awe nabo babwelelamo ku banabo no kuya bashimikilako, lelo nabo bene tababasumine nakalya.

Yesu amonekela ku basole ikumi limo na umo

¹⁴ Elyo pakulekelesha aisa monekela ku basole ikumi limo na umo, cilya bali pakulya. Alabebaula pa mulandu wakubulwa icisumino no kumalala kwa mitima yabo, pantu bakeene ukusumina abo abamumwene ilyo abuukile ku bafwa.

¹⁵ Elyo abeba ati, “Kabiyeni mu fyalo fyonse, mulebila Imbila Nsuma ku bantu bonse.

¹⁶ Uwasumina no kubatishiwa abatishiwa, akapusuka. Lelo uwakaana ukusumina wena akaba no mulandu.

¹⁷ Elyo ne fishibilo fyacipeshamano ifyo abansumina bakalacita nifi, bakalatamfya imipashi yakowela pakubomfya ishina lyandi, bakalalanda na mu ndimi ishipya.

¹⁸ Kabili bakalaikata insoka, elyo nga banwa icakwipaya umuntu tacakalebacita nangu cimo. Bakalatambalikila na maboko yabo pa balwele, nabo bakalapola.”

Yesu asendwa ku mulu

¹⁹ Nomba ilyo Imfumu Yesu yapwa ukulanda nabo, yasendwa ku mulu eko yaya ikala lubali ku kulyo kwakwa Lesa.

²⁰ Elyo abasambi bena basalangana baya balebila mpanga yonse. Imfumu nayo yalebomba nabo, yalekosha na mashiwi yabo ku fishibilo fyacipeshamano balecita.]