Luka 6 - Ishiwi Lyakwa Lesa 2015

Ubushiku bwe Sabata

¹ Ubushiku bumo ubwe Sabata, Yesu alepita mu mabala ya ŋanu. Awe abasambi bakwe batendeke ukulatimpula imisonso ya ŋanu, balefikina mu minwe yabo, balelya.

² Abafalise bamo balabepusha abati, “Cinshi ico mulecitila icaleshiwa ukucita pa bushiku bwe Sabata?”

³ Yesu abasuka ati, “Bushe tamwabelenga ifyo Davidi acitile, ilyo umwine wine pamo nabo ali nabo baiketwe ne nsala?

⁴ Aingile mu ŋanda yakwa Lesa, abuula ne mikate iyatuulilwe kuli Lesa, alya, apeelako nabo ali nabo. Iyi mikate abantu bambi tabasuminishiwe kulyako, kanofye bashimapepo beka.”

⁵ Elyo Yesu abeba ati, “Ala Umwana wa muntu e mwine wa bushiku bwe Sabata.”

Yesu aposha umuntu uwa cisansa calemana

⁶ Kabili pa bushiku bwe Sabata bumbi, Yesu aile ingila mu sinagoga, alefunda. Mwalimo no muntu uwali ne cisansa cakwe ica ku kulyo icalemana.

⁷ Bakafundisha bamafunde na Bafalise balabesha Yesu ukuti bamone nga aleposha pa bushiku bwe Sabata. Balefwaisha ukusanga icakumupeelelapo umulandu.

⁸ Nomba Yesu ico eshibe ifyo baletontonkanya, aeba uwa cisansa calemana ati, “Ima, iminina apa pakati.” Awe nao aima, aiminina na pakati.

⁹ Elyo Yesu abeba ati, “Kamwipusheko, bushe calisuminishiwa ukucitapo icisuma pa bushiku bwe Sabata, nangu icibi? Bushe calisuminishiwa ukupususha ubumi bwa muntu nangu ukubulofya?”

¹⁰ Elyo atandanya amenso pali bonse, aeba umuntu ati, “Fungulula icisansa cobe!” Awe nao afungulula icisansa cakwe, no kuba cabafye bwino.

¹¹ Awe bena bafulwa icibi, balalanshanya na pafyo bengacita Yesu.

Yesu asala abasole ikumi limo na babili

¹² Mu nshiku shilya Yesu aile kukupepa pa lupili. Alolelefye bushiku bonse alepepa Lesa.

¹³ Cilya bwaca, aita abasambi bakwe. Asalapo ikumi limo na babili, bena alabeta abasole.

¹⁴ Ni Simoni uo ainike ishina lya Petelo, na Andele munyina, na Yakobo, na Yoani, na Filipo, na Batolomeo,

¹⁵ na Mateo, na Toma, na Yakobo mwana Alufeyo, na Simoni Umuselote,

¹⁶ na Yuda mwana Yakobo, na Yuda uwa ku Kelyoti, uwaposele Yesu ku balwani.

Yesu afunda no kundapa abantu

¹⁷ Elyo atentemuka ulupili na basole, aya iminina pa ncende apabatama. Palipo ibumba ilikalamba ilya basambi bakwe. Elyo palipo na cinkupiti wa bantu ukufuma mu Yudeya monse, ku Yerusalemu, ku Turi na ku Sidoni imisumba ya mu lulamba lwa bemba.

¹⁸ Baishile kukumumfwa na kukundapwa amalwele yabo. Elyo na balecushiwa ku mipashi yakowela, balepola.

¹⁹ Abantu bonse balefwaya ukumukumya pantu amaka yakwe yalefuma no kubaposha bonse.

Ishuko ne shamo

²⁰ Elyo Yesu alolekeshe pa basambi bakwe, alabeba ati, “Mwalishuka imwe mwe balanda, pantu Ubufumu bwakwa Lesa bwenu.

²¹ Mwalishuka imwe mwe bali ne nsala nomba, pantu mukalaikuta. Mwalishuka imwe mwe balelishika nomba, pantu mukalaseka.

²² “Mwalishuka imwe, abantu nga bamupata, no kumutamfya, no kumusebanya, no kumusaalula pa mulandu wa Mwana wa muntu.

²³ Kanshi muli ubo bushiku mukaleyanga no kusansamuka, pantu icilambu cenu cikalamba mu mulu. Kabinge efyo ne fikolwe fyabo fyalecita bakasesema.

²⁴ “Nomba mukacimona imwe mwe bakankala, pantu imwe mwalipokelela kale ukusansamuka kwenu!

²⁵ Mukacimona imwe mwe baleikuta nomba, pantu imwe mukalaba ne nsala! Mukacimona imwe mwe baleseka nomba, pantu mukalaloosha no kulilishika!

²⁶ Mukacimona imwe nga abantu balamutasha, pantu efyo ne fikolwe fyenu fyalecita kuli bakasesema babufi.

Ukutemwa abalwani

²⁷ “Lelo ine ndemweba mwe balentesha nati, muletemwa abalwani benu, mulecita ifisuma ku bamupata.

²⁸ Mulepaala abamulapisha, mulepepelako na bamucusha.

²⁹ Umuntu uwakutoba ulupi pesaya limo, mupilibwile ne libiye line. Elyo umuntu uwakupoka icakufimbana, muleke asende no mwingila wine.

³⁰ Umuntu onse uwakulomba icintu, ulemupeela. Elyo umo nga akusendela icintu cobe, wilamupinda.

³¹ Ifyo mulefwaya abantu bamucitile, na imwe efyo mulebacitila.

³² “Lelo nga mwatemwafye abamutemwa, cilambu nshi mwingamwenapo? Pantu na babi bene batemwa ababatemwa.

³³ Elyo nga mwalacita ifisuma ku bamucitila ifisuma cilambu nshi mwingamwenapo? Na babi bene nabo efyo bacita.

³⁴ Nga mwalakongwesha abo mulesubila ukuti bakamubwesesha, nga cilambu nshi mwingamwenapo? Na babi bene balakongweshanya, pakuti bakapoke nakabili ifyo fine bakongweshe.

³⁵ Ala muletemwa abalwani benu. Mulebacitila ifisuma. Mulebakongwesha ukwabula ukusubila ukuti bakamubwesesha. Lyena icilambu cenu cikaba icikalamba. Kabili mukaba abana bakwa Lesa Mukulu, pantu wena wacikuuku ku bamiponto na ku babi bene.

³⁶ Muleba abaluse nga filya Shinwe aba uwaluse.

Mwilapingula abanenu

³⁷ “Mwilapingula abanenu, ninshi na imwe tabakamupingule. Mwilapeela muntu umulandu, ninshi na imwe tabakamupeele umulandu. Mulebelela abanenu uluse, na imwe lyena bakamubelela uluse.

³⁸ Mulepeela, ninshi na imwe bakalamupeela. Bakamupeela no kumubikila mu ceni icipimo icaisula paa, icashindaika, icamupaasa. Pantu icipimo mupiminako abanenu, eco na imwe bakamupiminako.”

³⁹ Kabili Yesu abikapo no kubomina ipinda ili ati, “Bushe impofu kuti yatungulula impofu ibiye? Bushe ninshi tekuti shonse shiwile mu cilindi?

⁴⁰ Umusambi tacila kafundisha wakwe. Nomba umusambi uwafundwa bwino bwino kuti aba nga kafundisha wakwe.

⁴¹ “Nga cinshi ulelolekesesha akapapala akali mu linso lyakwa munonko, tausakamana no kumona umulando uuli mu linso lyobe?

⁴² Nga kanshi kuti waeba shani munonko auti, ‘Munyinane, leka nkufule akapapala ako mu linso lyobe,’ mu nshita iwe we mwine taulemona umulando uuli mu linso lyobe? We mfundabuteshi we! Pakubala fumya umulando uuli mu linso lyobe, elyo walalolesha bwino pakufula akapapala akali mu linso lyakwa munonko.

Umuti ne fitwalo

⁴³ “Tapaba umuti usuma uutwala ifitwalo ifibi, nangu umuti ubi uutwala ifitwalo ifisuma.

⁴⁴ Pantu umuti onse bawishibila ku fitwalo fyauko. Abantu tabasaba makunyu ku myunga nangu ukusaba ifitwalo fya mwangashi kuli nkololo.

⁴⁵ Umuntu umusuma afumya ifisuma fya mu cipao cakwe icisuma ica mutima wakwe. Umuntu umubi nao afumya ifibi mu cipao cakwe icibi. Pantu akanwa ka muntu kalanda ifyaisula mu mutima wakwe.

Bakakuula ba mayanda babili

⁴⁶ “Ngeco munjitila amuti, ‘We Mfumu we Mfumu,’ kabili tamucita ifyo ndemweba, bushe cinshi?

⁴⁷ Nalamwebako uyo muntu uwisa kuli ine, uumfwa na mashiwi yandi, no kuyakonka alayakonka.

⁴⁸ Ala, apala ku muntu uwakuti ilyo alakuula iŋanda, aimba umufula, afishafye na pa libwe. Ilyo umumana waisula, waposa, na menshi yalaisa yalapuma mu ŋanda, awe iŋanda teyakusunkana iyoo, pantu yakuulwa bwino.

⁴⁹ Nomba uumfwa amashiwi yandi, akaana no kulayakonka iyoo, ena apala umuntu uwakuti akuula iŋanda pa mushili apabula umufula. Ala kuti cilya umumana waposa, amenshi yalapuma ku ŋanda, awe yawa, yabongoloka icabipisha!”