Imilimo 6 - Ishiwi Lyakwa Lesa 2015

Basala bakafwa cine lubali

¹ Kanshi pa nshita iyi, abasambi baya balefulilako. Abasambi Abayuda abalelanda Icigiriki balailishanya pa basambi Abahibulu. Balasosa abati, “Ifwe bamukamfwilwa wesu cila bushiku tabalebapako ifintu baleyakanya.”

² Kanshi abasole ikumi limo na babili epakulonganya ibumba lyonse ilya basambi. Balabeba abati, “Tacilungeme ukuti tuleyakanya ifyakulya, elyo twalekelesha ukufunda amashiwi yakwa Lesa.

³ Kanshi bamunyinefwe, saleni mwe bene pali imwe, abaume cine lubali, abacetekelwa, abaisulamo na Mupashi Wamushilo, kabili abamano. Abo ebo twalapeela uyu mulimo.

⁴ Elyo ifwe twakulaibikafye pakupepa no kufunda amashiwi yakwa Lesa.”

⁵ Awe ibumba lyonse lyasekela aya amashiwi. Lyasala Stefano, umuntu uwacisumino nganshi, kabili uwaisula na Mupashi Wamushilo. Lyasala na Filipo na Prokoro, na Nikano, na Timoni, na Pamena, na Nikola Umwinafyalo, uwa ku Antioki, uwayalukile kwipepo lya Bayuda.

⁶ Ibumba lya basambi lyabaleta ku basole. Nabo abasole babapepelela, babatambalikila na maboko.

⁷ Awe ne shiwi lyakwa Lesa lyaya lilelunduluka. Abasambi mu Yerusalemu nabo baya balefulilakofye. Elyo ne bumba ilikalamba ilya bashimapepo lyanakila icisumino.

Baikata Stefano

⁸ Stefano ali uwamaka kabili uwakwatisha icikuuku cakwa Lesa. Alecita ifishibilo ifyakupapa ne finjelengwe pakati ka bantu.

⁹ Nomba abantu bamo batampa ukubikana ifikansa na Stefano. Bamo bena Kurene na bena Alekisandilia abafumine ku sinagoga baleti, “Sinagoga ya Bantu balubulwa.” Elyo bambi bena Kilikia na bena Asia.

¹⁰ Nomba bafilwa ukumwansha mufyo alesosa ku mulandu wa mano yakwe, ico Mupashi alemwafwa mufyo alesosa.

¹¹ Elyo basembeleka abantu mu bumfisolo ukuti basose abati, “Ifwe twaumfwile uko Stefano alelanda amashiwi yamusaalula kuli Mose na kuli Lesa.”

¹² Kanshi abantu, na bakalamba na bakafundisha bamafunde epakwimina Stefano. Bamwikata, bamusenda, bamutwala na ku cilye cikalamba ca Bayuda.

¹³ Elyo baletamo na bakambone babufi. Balasosa abati, “Uyu muntu lyonse alandafye amashiwi ayakususha Itempele na Mafunde yakwa Mose.

¹⁴ Twalyumfwile uko alesosa ati, ‘Yesu wa ku Nasaleti akonaula Itempele. Elyo akalula ne ntambi batushila kuli Mose.’ ”

¹⁵ Bashicilye bonse elyo batontomesha amenso pali Stefano. Bamona nokuti impumi yakwe yalamoneka kwati ni mpumi yakwa malaika.