Imilimo 16 - Ishiwi Lyakwa Lesa 2015

Timote baya na Paulo na Sailasi

¹ Paulo elyo aile ku Debe na ku Lusitila. Kuli uyu musumba ekwaleikala umusambi umo ishina lyakwe ni Timote. Nyina kwa Timote ali Muyuda, kabili uwasumina muli Kristu, lelo wishi ena ali Mugiriki.

² Ababwananyina bonse aba mu Lusitila na ku Ikoniamu balesosa abati, “Timote muntu umusuma.”

³ Paulo alafwaya ukuti baye nankwe pa bulendo. Kanshi epakumusembulula. Acitile ifi ku mulandu wa Bayuda bali muli cilya calo. Pantu bonse balishibe ukuti wishi Mugiriki.

⁴ Ilyo balepitana mu misumba, baleshimikilako abena Kristu amafunde ayo abasole na bakalamba bapingwile mu Yerusalemu. Balebakonkomesha ukulasunga ayo mafunde.

⁵ Awe cisumino ca nkuta calakoselakofye, kabili inshiku shonse inkuta shalafulilakofye ku bwingi.

Paulo amona icimonwa mu Troa

⁶ Paulo na banankwe bapitile mu calo ca Fulugia na mu ca Galatia. Pantu Mupashi Wamushilo talefwaya ukuti babile Imbila Nsuma mu calo ca Asia.

⁷ Cilya bafika ku mupaka wa Musia, balafwaya ukuti baye mu calo ca Bitunia. Lelo Mupashi wakwa Yesu abalesha.

⁸ Kanshi epakulaya, balalanya icalo ca Musia, baya na ku musumba wa Troa.

⁹ Mu nshita ya bushiku, Paulo amona icimonwa. Mu cimonwa amona umwina Makedonia naiminina alemupapata aleti, “Mwabukile kuno calo ca Makedonia, mwise mutwafwe.”

¹⁰ Atile cilya Paulo amona ici cimonwa, awe apopene twalaipekanya ukuya ku Makedonia. Pantu twalishininkishe ukuti Lesa natwita ukuya bila Imbila Nsuma kuli aba bantu.

Ludia asumina muli Kristu

¹¹ Elyo twafuma no bwato ku Troa, twalungamafye ku Samotulake. Bwaisaca epakuya ku Neapoli.

¹² Elyo twafumako twaya ku Filipi, umusumba walumbwike mu citungu ici ca Makedonia. Abena Roma ebaleikalamo. Awe na ifwe twaikalamo inshiku shimo shimo.

¹³ Pa bushiku bwe Sabata, twafumina kunse ya musumba, twaya ku lulamba lwa mumana, ku ncende uko twalesubila ukuti eko Abayuda balongana kukupepa. Twaikala twalalanda na banakashi abalongeneko.

¹⁴ Kanshi umwanakashi umo pali abo baleumfwako, ni Ludia, umwina Tiatila, kashitisha wa nsalu ishakashikila. Uyu mwanakashi alepepa Lesa. Imfumu yamunasha umutima, pakuti apokelele amashiwi Paulo alesosa.

¹⁵ Awe umwine wine na bonse abo aleikala nabo pa ŋanda babatishiwa. Elyo atwita kumwakwe ati, “Nga cine muletontonkanya ukuti na ine ndi wasumina icine cine mu Mfumu, iseni kumwandi eko muleikala.” Awe na ifwe epakuya kumwakwe.

Paulo na Sailasi babaposa mu cifungo

¹⁶ Ubushiku bumo twaleya ku ncende uko bapepela. Elyo twakumanya umukashana umo, umusha, uwawililwe no mupashi uwakowela. Uyu mupashi walengele nokuti alesesema ifili nokucitika kuntanshi. Mukweba abantu ifili nokubacitikila kuntanshi, uyu mukashana alengele bashikulu wakwe ukulamwenamo indalama ishingi.

¹⁷ Uyu mukashana alakonka Paulo na ifwe bene alepunda ati, “Aba bantu e basha bakwa Lesa Mukulu! Ebalemweba amashiwi yakumulanga ifyo muli nokupusuka!”

¹⁸ Efyo akonkanyapo ukucita inshiku ishingi. Asuka Paulo afulwa, apilibuka aeba no mupashi uwakowela ati, “Ku maka yakwa Yesu Kristu, ndekweba fuma muli uyu mukashana!” Awe apopene umupashi uwakowela wamufumamo.

¹⁹ Nomba bashikulu wa mukashana cilya bamona ukuti nomba nacipwa takuli kwakumwena indalama, baikata Paulo na Sailasi. Babatantanya, babatwala ku cilye mu lubansa lwa cisankano.

²⁰ Babaleta na kuli bakaputula wamilandu. Balabeba abati, “Aba bantu Bayuda, nomba baleleta icimfulunganya mu musumba wesu.

²¹ Elyo balefunda ne misango iyapusana na mafunde yesu, iyo ifwe fwe bena Roma tushingasumina nangu ukukonka.”

²² Elyo ibumba lyawilamo mukupuma Paulo na Sailasi. Bakaputula wamilandu balepaula ifyakufwala fyakwa Paulo na Sailasi, babeba nokuti babome ifikoti.

²³ Awe cilya bapwa ukubalopaula, babaposa na mu cifungo. Elyo bakonkomesha kalinda wa cifungo ukubalinda bwino.

²⁴ Kalinda nao pakumfwa ifyo bamukonkomesha, abaposa mu kamuputule ka mukati na nkati. Elyo akakila amolu yabo mu makoli.

Paulo na Sailasi bafuma mu cifungo ku maka yakwa Lesa

²⁵ Cilya calafika pakati ka bushiku Paulo na Sailasi balapepa, balaimba ne nyimbo shakulumbanya Lesa. Abafungwa bambi bena balekutikakofye.

²⁶ Apopene icinkukuma icikalamba capita, ne ŋanda ya cifungo yonse yalatenta. Elyo kabili apopene ifiibi fyonse fyaisuka, ne minyololo ku bafungwa bonse yaiponenafye iyine.

²⁷ Kalinda wa cifungo ashibuka. Amona nokuti ifiibi fya cifungo fyonse nafisuka. Wena alatontonkanya ukuti abafungwa bonse nabafyuka. Kanshi asomona ulupanga alafwaya ukuipaya.

²⁸ Lelo Paulo apunda ne shiwi likalamba ati, “Leka, wiipaya, bonse emo tuli!”

²⁹ Kalinda wa cifungo epakwita abakuleta ifisaniko. Elyo ayamo ulubilo afukamina Paulo na Sailasi, aletutumafye ku mwenso.

³⁰ Elyo abafumisha panse, alabepusha ati, “Mukwai, ndi nokucita shani pakuti mpusuke?”

³¹ Nabo bamweba abati, “Sumina Imfumu Yesu, elyo iwe na ba mu ŋanda yobe mulepusuka.”

³² Elyo balamufunda na ba mu ŋanda yakwe bonse amashiwi ya Mfumu.

³³ Mu nshita ine iyo iya bushiku kalinda wa cifungo abasenda, alabasambila ne filonda fyabo. Awe apopene bamubatisha pamo na ba mu ŋanda yakwe bonse.

³⁴ Elyo aleta Paulo na Sailasi mumwakwe, abapeela ne cakulya balalya. Awe kalinda wa cifungo pamo na ba mu ŋanda yakwe bonse basansamuka nganshi ico basumina muli Lesa.

³⁵ Cilya bwaca ulucelo, bakaputula wamilandu batuma inkombe kuli kalinda bakonkomesha abati, “Kakula abo bantu, uleke baleya.”

³⁶ Awe kalinda afisha aya mashiwi kuli Paulo. Amweba ati, “Bakaputula wamilandu bakonkomesha ukuti mukakule muleya. Kanshi nomba fumeni, mufikepo umutende.”

³⁷ Paulo aeba inkombe ati, “Ifwe tuli bena Roma. Batuumine pa lwalala, ukwabula ukutulubulwisha, batuposa na mu cifungo. Elyo nomba balefwaya ukutufumya mu bumfisolo? Awe cakaana! Mubebe bakaputula wamilandu abene bese, ebo bese batufumye.”

³⁸ Awe inkombe batumine shaya fisha aya mashiwi kuli bakaputula wamilandu. Cilya baumfwa ukuti Paulo na Sailasi bena Roma, awe umwenso wabekata.

³⁹ Bakaputula wamilandu epakwisa balabapapata. Elyo babafumya mu cifungo. Babalomba nokuti bafume mu musumba.

⁴⁰ Ilyo Paulo na Sailasi bafuma mu cifungo, baya ku ŋanda kwa Ludia. Mwa Ludia emo bamonanina na babwananyina. Cilya bapwa ukubeba amashiwi yacikoseleshi, bafuma baya.