Imilimo 12 - Ishiwi Lyakwa Lesa 2015

Balacusha abena Kristu

¹ Muli iyo ine nshita, imfumu Herodi epakutampa ukulacusha bamo aba mu lukuta.

² Yaipaya Yakobo munyina kwa Yoani, yamuputulako umutwe ku lupanga.

³ Ilyo yamona ukuti ici casansamusha Abayuda, yabikapo no kwikata Petelo. Ici cacitike mu nshikunkulu yakulyamo Imikate Ishatutumuka.

⁴ Cilya yaikata Petelo yamuposa mu cifungo. Yaeba ne mpuka shine isha fita fine ukulakomboshanya pakumulinda. Herodi alefwaya ukumulubulwisha pa lwalala panuma ye Pasaka, inshikunkulu ya Cakucilila.

⁵ Ilyo Petelo ali mu cifungo, ulukuta lwena lwabikapofye ukulamupepelako kuli Lesa.

Malaika afumya Petelo mu cifungo

⁶ Ubushiku bwakutila mailo nga bwaca Herodi ali nokulubulwisha Petelo, ena Petelo alele pakati ka fita fibili, ninshi nabamukaka ne minyololo ibili. Kabili pa mpongolo ya cifungo pali fita fyalelonda.

⁷ Awe apopene malaika wa Mfumu aisa aiminina apo ali, na mu kamuputule mwabuuta tuutu ku cengelo. Elyo malaika asunka Petelo mu lubafu, amushibusha. Asosa ati, “Ima bwangu!” Awe ne minyololo yali ku maboko yakwe yapona.

⁸ Elyo malaika amweba ati, “Ale kaka umushipi obe, fwala ne ndyato shobe.” Awe efyo Petelo acita. Kabili malaika amweba ati, “Buula ne cakufimbana cobe, unkonke.”

⁹ Petelo amukonka, afuma na mu cifungo. Lelo Petelo taishibe ukuti ifilecita malaika fyacine cine. Wena aletontonkanya ukuti alemona icimonwa.

¹⁰ Bapita pa mpuka yapakubala iya fita fyalelonda, bapita na pa yabubili, basuka bafika na pa mpongolo ya cela iyakwingililamo mu musumba. Awe iciibi ca mpongolo caisukila icine ceka, bafuma. Awe bati bendeko ukukonka umusebo umo, apopene malaika aya, asha Petelo.

¹¹ Elyo Petelo ashininkisha icicitike. Asosa ati, “Nomba nashininkisha cine cine. Ni Mfumu eintumine malaika waiko pakuti impusushe ukufuma mu minwe yakwa Herodi na kuli fyonse ifyo umushobo wa Bayuda walesubila ukucita.”

¹² Cilya Petelo ashininkisha ifyo cili, alungama ku ŋanda yakwa Maria, nyina kwa Yoani Mako. Ekwalongene abantu abengi, balepepa.

¹³ Elyo Petelo akonkonsha ku ciibi. Awe umukashana umo umubomfi ishina lyakwe ni Roda, aisa kukumfwa uulekonkonsha.

¹⁴ Cilya aishiba ishiwi lyakwa Petelo, asansamuka nganshi. Abwelelamo ulubilo, ukwabula ukuti esuleko iciibi. Aya eba abantu ati, “Petelo ali panse pa mwinshi.”

¹⁵ Bonse bamwasuka abati, “Ale akusabaila!” Elyo nao abikapofye ati, “Ala, cine cinefye!” Nabo bamwasuka abati, “Kanshi ninshi ni malaika wakwe.”

¹⁶ Petelo wena ninshi abikilepofye ukukonkonsha. Elyo baisulako iciibi. Awe bamumona, cabapesha na mano.

¹⁷ Petelo aimya ukuboko pakuti batalale. Elyo alabashimikilako ifyo Imfumu imufumishe mu cifungo. Abeba nokuti, “Bashimikileko Yakobo na babwananyina bonse.” Elyo afumako aya na kumbi.

¹⁸ Cilya bwaca, ifita ifyalelinda Petelo fyasakamikwa nganshi. Fyalati, “Nga cinshi cicitike kuli Petelo?”

¹⁹ Herodi wena akonkomesha ukuti bali nokumufwaya. Lelo bafilililwafye ukumusanga. Kanshi epakulubulwisha ifita fyalemulinda, elyo apingula nokuti bafipaye. Kabili Herodi afuma mu Yudeya, aya ikala pa nshita inono mu Kesalia.

Herodi afwa

²⁰ Herodi tabaleumfwana na bantu ba mu Turi na ba mu Sidoni. Kanshi nabo epakuyako ibumba kukumonana na Herodi. Babalilapo ukusembeleka Blasto no kwikatana nankwe, pantu ewali kangalila wa kwisano. Elyo baya kuli Herodi pakuti bomfwane nao palwa kwikala mu cibote. Pantu icalo cabo calefumya ifyakulya mu calo ca Mfumu Herodi.

²¹ Pa bushiku bwasontelwe, Herodi afwala insalu shakwe ishabufumu. Aikala na pa cipuna cakwe icabufumu. Elyo alalanda ku bantu.

²² Abantu balasowesha abati, “Walandafye kwati mulungu, taulelanda nga muntunse!”

²³ Apopene malaika wa Mfumu aponesha Herodi ubulwele ico ashali na mucinshi kuli Lesa. Awe imititi yalamulya, asuka afwa.

²⁴ Nomba ishiwi lyakwa Lesa lyene lyaya lilelundulukilakofye.

²⁵ Cilya Banaba na Saulo bapwile umulimo wabo, awe babwelelamo ku Yerusalemu, basenda na Yoani Mako.