Icitendekelo 1 - Ishiwi Lyakwa Lesa 2015

Ukutendeka

¹ Pa citendekelo Lesa abumbile umulu ne sonde.

² Isonde lyalifye icimfulumfulu, kabili tamwali kantu nelyo kamo. Imfifi yakupile pali bemba uwashika no mupashi wakwa Lesa waleshinguluka pa mulu wa menshi.

³ Elyo Lesa atile, “Nakube ulubuuto,” awe no kubuuta kwabuuta.

⁴ Lesa amona nokuti ulubuuto lwawama. Elyo Lesa alekanya ulubuuto ne mfifi.

⁵ Lesa ainika ulubuuto, “Akasuba,” imfifi yena ainika, “Ubushiku.” Kabili bwaila elyo bwaisaca, e bushiku bwakubalilapo.

⁶ Kabili Lesa atile, “Nakube ulwelele ulwakulekanya amenshi pakati, pakuti yapatulukane pabili.”

⁷ Lesa apanga ulwelele ulwakulekanya amenshi, yamo yaba pesamba, yambi pa mulu wa lwelele. Kanshi efyo cali.

⁸ Lesa ainika ulwelele “Umulu.” Kabili bwaila, elyo bwaisaca, e bushiku bwalenga shibili.

⁹ Kabili Lesa atile, “Amenshi ya mwisamba lya mulu nayalongane mu ncende imo, pakuti kube umushili uwauma.” Kanshi efyo cali.

¹⁰ Lesa ainike umushili uwauma ati, “Umulundu.” Elyo amenshi ayalongene mu ncende imo ati, “Bemba.” Lesa amona nokuti naciwama.

¹¹ Kabili Lesa atile, “Umulundu naupuuke ifimena ifya misango yonse, ifilimwa ifitwala imbuto mu misango yafiko, ne miti ya pesonde iyitwala ifitwalo fya mikoli mu misango yafiko.” Kanshi efyo cali.

¹² Elyo pa mulundu papuuka ifimena ifya misango yonse, ifilimwa ifitwala imbuto mu misango yafiko, elyo ne miti ya pesonde iyitwala ifitwalo fya mikoli mu misango yafiko. Elyo Lesa amona nokuti naciwama.

¹³ Kabili bwaila, elyo bwaisaca, e bushiku bwalenga shitatu.

¹⁴ Kabili Lesa atile, “Mu mulu namube ifisaniko ifyakulekanya akasuba no bushiku, fibe ifyakwishibilako imyaka, inshita shalekana lekana mu myaka, elyo ne nshiku,

¹⁵ kabili fibe ifisaniko mu mulu ifyakuleta ulubuuto pesonde.” Kanshi efyo cali.

¹⁶ Lesa epakupanga ifisaniko fibili ifikalamba. Icisaniko cakulilepo cakuteeka akasuba, elyo icacepelepo cakuteeka ubushiku. Elyo apanga ne ntanda.

¹⁷ Ifisaniko Lesa afibika mu mulu pakuti fileleta ulubuuto pesonde,

¹⁸ fileteeka akasuba no bushiku, kabili filelekanya ulubuuto ne mfifi. Elyo Lesa amona ukuti naciwama.

¹⁹ Kabili bwaila, elyo bwaisaca, e bushiku bwalenga shine.

²⁰ Kabili Lesa atile, “Mu menshi namulesenya ifibumbwa fyabumi, ne fyuni nafilepupuka mu lwelele pa mulu we sonde.”

²¹ Kanshi Lesa epakubumba ifibumbwa ifyabumi ifikalamba nganshi ifyaba muli bemba, ne fyabumi ifya misango yonse ifikala mu menshi ne fyuni ifya misango yonse. Elyo Lesa amona nokuti naciwama.

²² Lesa afipaala, asosa ati, “Fyalaneni, mufule, mwisule bemba, ne fyuni nafisande fifule pesonde.”

²³ Kabili bwaila, elyo bwaisaca, e bushiku bwalenga shisano.

²⁴ Kabili Lesa atile, “Pesonde napabe ifibumbwa fyabumi mu misango yafiko, ifitekwa, ifikulaika pa mushili ne nama sha mpanga imisango yonse.” Kanshi efyo cali.

²⁵ Lesa epakupanga inama sha mpanga mu misango yashiko, ifitekwa nafyo mu misango yafiko, elyo na fyonse ifikulaika pa mushili mu misango yafiko. Elyo Lesa amona nokuti naciwama.

²⁶ Elyo Lesa atile, “Natupange umuntu mu cata cesu, uwakupalana na ifwe. Baleteeka isabi lya mu menshi, ifyuni fya mu lwelele, ifitekwa, elyo ne fikulaika pa mushili fyonse.”

²⁷ Kanshi Lesa epakubumba umuntu mu cata cakwe. Amubumba mu cata cakwe. Ababumba umwaume no mwanakashi.

²⁸ Lesa abapaala, elyo asosa ati, “Fyalaneni, mufule, mwisule pesonde no kupanasha. Muleteeka isabi lya mu menshi, ifyuni fya mu lwelele ne fyabumi fyonse ifyenda pa mushili.”

²⁹ Elyo Lesa atile, “Namupeela ifilimwa fya mbuto fyonse pano isonde ne miti yonse iya fitwalo umwaba inseke, efili nokuba ifyakulya fyenu.

³⁰ Kabili ku finama fya mpanga fyonse ifya pano isonde, ifyuni fya mu lwelele fyonse, ifikulaika pa mushili ne fyaba no bumi fyonse, nafipeela ifyani na mabula ya miti efyo fyakulalya.” Kanshi efyo cali.

³¹ Lesa amona ifintu fyonse ifyo apangile ukuti nafiwama nganshi. Kabili bwaila, elyo bwaisaca, e bushiku bwalenga mutanda.