Hosea 14 - Ishiwi Lyakwa Lesa 2015

Hosea apapata abena Israeli

¹ Mwe bena Israeli, ala bweleleni kuli Yawe Lesa wenu. Ububi bwenu ebwalenga ukuti muletalansuka, no kuwa mulewa.

² Bweleleni kuli Yawe, ne fyakuya landa pakumupapata nifi. Muyetila amuti, “Wingatubelelako uluse ku fibi fyesu fyonse, umfwa nefyo tulekupapata, pakuti ifwe tulekupeela amalumbo ya tunwa twesu, nge lambo lya fiponti fya ŋombe.

³ Abena Asiria tabakwata maka yakutupusushako, amaceleta ya nkondo kuti yafilwa ukulatupokololako. Utulubi uto twaipangila, tatwakabwekeshepo nakabili ukulatweba atuti, ‘Imwe nimwe Lesa wesu,’ Twashininkisha ukuti niwefye we Yawe ulangulukilako abana banshiwa.

Yawe alaya abena Israeli imikalile ipya

⁴ “Ine nkalungika ubupondamishi bwabo, nakulabatemwa no mutima wandi onse, ine nomba naleka ukubafulilwa.

⁵ Nakulamima pali Israeli, nga filya umume ucita, nabo bakulabengeshima nga maluba ayapakula. Bakulashangila mu calo nge miti iyakosa iya keda ku Lebanoni, iyo imishila yaya panshi.

⁶ Utumisambo twakwe tukapuka, no kuyemba kwakwe kulamoneka nge miolifa. Akalanunkila bwino nge miti ya keda iya ku Lebanoni.

⁷ Bakabwela mukwikala mu cintelelwe candi. Bakulalulubala nge bala lya ŋanu, no kulasanduluka nge bala lya myangashi. Bakulalumbuka ngo mwangashi wa ku Lebanoni.

⁸ We Efulemu, bushe mulimo nshi utulubi tukwete kuli ine? Ine ndomfwa amapepo yobe, no kukusunga ndakusunga, naba ngo mulemu uwalelema, ni kuli ine ekutula ishuko lyobe lyonse.”

Amashiwi yakulekeleshako

⁹ Abamano bali nokwishiba umo ifi filolele, elyo abamucetekanya nabo bakeluka pali ifi fyonse. Inshila shakwa Yawe shintu shalungama na balungami emo benda. Lelo ababifi bena balafilwa ukushikonka.