Hosea 1 - Ishiwi Lyakwa Lesa 2015

¹ Ishiwi lyakwa Yawe lyaishile kuli Hosea mwana Beri pa nshita icalo ca Yuda caleteekwa ne shamfumu Usia, Yotamu, Ahasi na Hesekia, nelyo Yeroboamu mwana Yoashi ateekele icalo ca Israeli.

Muka Hosea na bamwane

² Ilyo Yawe atampile ukulanda amashiwi kuli Hosea, Yawe amwebele ati, “Upa umwanakashi impulumushi ukafyalemo abana ba mu bupulumushi, pantu abantu bandi nababa impulumushi kabili nabansangukila, ine ne Yawe.”

³ Kanshi nao Hosea epakuupa umwanakashi umo, ishina lyakwe ni Gomeri mwana Dibulaimu. Asuka aba na pabukulu, apapa no mwana umwaume.

⁴ Yawe aeba Hosea ati, “Mwinike ishina lya Yesireli, pantu tapakokole ninshi ine nalimuna imfumu ya bena Israeli pa mulandu wa bupondo ubo Yehu wishi acitile kuli Yesireli. Ine nalaswa ndofye ubufumu bwa bena Israeli.

⁵ Pali ilya ine nshita, ine ninshi napwisha amaka ya fita fya bena Israeli mwishika lya Yesireli.”

⁶ Kabili Gomeri aimita apapa umwana na umbi, wena umwanakashi. Yawe aeba Hosea ati, “Mwinike ishina lya Lo Ruhama, emukutila munshilangulukilwa, pantu ine nomba nshakalangulukileko nakabili aba ŋanda yakwa Israeli, kabili nshakababeleleko uluse nakabili iyoo.

⁷ Abena Yuda bena nkabalangulukilako, ine ne Yawe Lesa wabo nkabapususha, lelo kwena pakubapususha ine nshakemye nkondo iyoo, nshakabomfye lupanga, nangufye amata ne mifwi, nangufye bakabalwe na babendelapo bene, lelo nkabapususha ku maka yandi ne mwine.”

⁸ Ilyo Gomeri asumwine mwane Loruhama, nakabili aba pabukulu. Asuka apapa no mwana umwaume na umbi.

⁹ Yawe nao aeba Hosea ati, “Mwinike ishina lya Lo-Ami, emukuti te bantu bandi, pantu mwe bena Israeli nomba tamuli bantu bandi iyoo, na ine wine nomba nshili Lesa wenu iyoo.”

Abena Israeli bakashuka nakabili

¹⁰ Nangu cibe ifyo abena Israeli bakafula ngo musensenga wa mu lulamba lwa bemba, uushingapimwa nangufye ukupendwa. Nomba palya casoselwe palwa bena ukuti, “Imwe tamuli bantu bandi iyoo,” lelo ilyo lyena akalabeba ati, “Imwe muli bana bandi ine ne Lesa Umumi.”

¹¹ Abena Yuda bakakumbinkana pamo na bena Israeli. Abene ebakalaisontela intungulushi imofye iyakubateeka, nakabili bakafula, no kushuka bakalashuka mu calo cabo. Ubo bushiku bwakwa Yesireli bukaba ubukalamba.